احمەت ياساۋي ۋنيۆەرسيتەتىندە I حالىقارالىق تۇركى الەمى بيولوگيا كونگرەسى وفلاين ءھام ونلاين فورماتتا ءوتىپ, وعان تۇركيا, قىرعىزستان, وزبەكستان, گرەكيا, جاپونيا, ءۇندىستان, ت.ب. مەملەكەتتەردەن, ناقتى اتاعاندا بارلىعى 24 ەلدەن 150-دەن استام عالىم قاتىستى. بيىل العاش رەت ۇيىمداستىرىلعان كونگرەستى الداعى ۋاقىتتا تا ءداستۇرلى تۇردە ۇيىمداستىرىپ وتىرۋ كوزدەلىپ وتىر, دەپ جازادى Egemen.kz.
اشىلۋ سالتانىندا ۋنيۆەرسيتەت رەكتورى جانار تەمىربەكوۆا ءسوز الىپ, «بيولوگيا كونگرەسىنىڭ العاش رەت ۋنيۆەرسيتەتىمىزدە ءوتۋى – ۇلكەن قۋانىش! 24 ەلدىڭ عالىمدارى, 20-دان استام سەكتسيا – مۇنىڭ بارلىعى وڭاي جۇمىس ەمەس. بۇل – ۇيىمداستىرۋشىلىق قابىلەت پەن ۋنيۆەرسيتەتتىڭ عىلىمي پوتەنتسيالىنىڭ تاعى ءبىر ايعاعى. بيولوگيا كافەدراسىندا جىل سايىن ستۋدەنتتەر سانى دا ارتىپ وتىر, سەبەبى – بيولوگيا ماماندارىن دايىنداۋدا قارقىندى جۇمىستار جۇرگىزىلىپ كەلەدى», دەدى.
عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنىڭ مالىمەتىنشە ەكى كۇنگە سوزىلعان كونگرەسس جۇمىسىندا قازىرگى بيولوگيا جانە بيوتەحنولوگيا ماسەلەلەرى مەن بولاشاعى; قۇرىلىمدىق بوتانيكا, ميكرولوگيا جانە ميكروبيولوگيا عىلىمىنىڭ ماسەلەلەرى; عىلىمي زەرتتەۋلەر مەن بيولوگيالىق ءبىلىم بەرۋدىڭ يننوۆاتسيالىق تەحنولوگيالارى; بيوالۋانتۇرلىلىكتى قورعاۋدا ەرەكشە قورعالاتىن تابيعي ايماقتىڭ ءرولى; قازاقستاننىڭ بيولوگيا سالاسى زەرتتەۋلەرىنىڭ قازىرگى جاعدايى جانە ت.ب. ماسەلەلەر عالىمداردىڭ تالقىسىنا ءتۇستى.
حالىقارالىق جيىندا بيولوگيا سالاسىنداعى بىرلەسكەن جوبالاردى ودان ءارى زەرتتەۋ جانە جۇرگىزۋ جوسپارى ناقتىلاندى.
ءىس-شارا بيولوگيا عىلىمىنىڭ دامۋىنا ايتارلىقتاي ۇلەس قوسىپ, ءارتۇرلى ەلدەردىڭ عالىمدارى اراسىندا ءبىلىم مەن تاجىريبە الماسۋعا ىقپال ەتىپ, كونگرەسكە قاتىسۋشىلارعا ارنايى سەرتيفيكاتتار تابىستاۋ راسىمىمەن مارەسىنە جەتتى.