ادام ۇرلاعان تورتەۋ

قالالىق سوتتىڭ ءباسپاسوز قىز­مە­تى حابار­لاعانداي, سوتتا الگى ءتورت ازاماتتىڭ ءىسى قىلمىستىق كودەكستىڭ 125-بابىنىڭ 1, 2, 3-تارماقتارى بويىنشا, ياعني «الدىن الا ءسوز بايلاسقان ادامدار توبىنىڭ كۇش قولدانا وتىرىپ ادام ۇرلاۋى, ومىرىنە نەمەسە دەنساۋلىعىنا قاۋىپتى كۇش قولدانۋى» جانە كودەكستىڭ 191, 194-باپتارى بويىنشا قارالعان. قىلمىستىق تەرگەپ-تەكسەرۋ ءىس-شارالارىنىڭ ماتەريالدارىنا سۇيەنسەك, سوتتالعاندار وتكەن جىلدىڭ قاراشا ايىن­دا زارداپ شەگۋشىنى ۇرلاپ اكەتىپ, كولىك ­گاراجىنا اپارعان. ول جەردە ۇرىپ-سوعىپ, كۇش كورسەتىپ: «پاتەرىڭدى, اۆتوكولىگىڭدى جانە 2 ملن تەڭگەنى بىزگە بەرمەسەڭ, ومىرىڭمەن قوشتاساسىڭ», دەپ قورقىتقان. سول كۇنى قىلمىستىق وقيعاعا قاتىسقانداردىڭ ۇشەۋى زارداپ شەككەن ازاماتتىڭ ايەلىنە بارىپ, كۇيەۋىن ۇرىپ-سوعۋ ساتىنەن تۇسىرگەن بەينەجازبانى كورسەتەدى. سويتەدى دە: «ەگەر پاتەر مەن اۆتوكولىكتى, قوماقتى مولشەردە اقشا بەرمەسەڭ, جازبانى تاراتامىز», دەپ قورقىتقان. ادام ۇرلاعان توپ مۇشەلەرى الگى بەينەجازبا ەر ازاماتتىڭ ابىروي-بەدەلىنە زور نۇقسان كەلتىرەدى دەپ ەسەپتەسە ­كەرەك, ەكى كۇننەن كەيىن ولار جازبانى تاراتپاۋ ءۇشىن ءتىپتى 7 ملن تەڭگە سۇراعان. بۇل ءىس بويىنشا ۇرلانعان ازاماتتان بولەك تاعى ەكى ادام زارداپ شەككەن.

پروكۋرور سوتتا بارلىق ءتورت ايىپتالۋشىنى­ باس بوستاندىعىنان ايىرۋدى سۇرادى. ولار ءوز كىنالارىن تولىق مويىندادى. قىلمىستىق ءىس اۋىر قىلمىستار ساناتىنا جاتا­تىندىقتان, قىلمىستىق كودەكستە 12 جىلعا دەيىن باس بوستاندىعىنان ايىرۋ كوزدەلگەن. جاسالعان قىل­مىس­تىق ارەكەتتەردىڭ بارلىعى زارداپ شەگۋشىلەرمەن, كۋاگەر ازاماتتارمەن, سوت ساراپتاماسىنىڭ قورىتىندىلارىمەن, وزگە دە سوت ايعاقتارىمەن دالەلدەندى. جاسالعان بارلىق قىلمىستى ەسەپكە الا وتىرىپ, سوت ايىپتاۋشىلاردىڭ ەكەۋىن 8 جىلعا كەستى. ءۇشىنشى ايىپتالۋشى 7 جىل 4 ايعا, ءتورتىنشىسى 7 جىلعا باس بوستاندىعىنان ايىرىلدى. سونداي-اق زارداپ شەگۋشى قوس ازامات جالعان ايعاقتار بەرگەنى ءۇشىن سوت ولارعا قاتىستى جەكە قاۋلى شىعارىپ, قۇجات پاۆلودار وبلىسىنىڭ پروكۋراتۋراسىنا جونەلتىلدى.

پاۆلودار وبلىسى,

اقسۋ قالاسى