جەتىسۋ وڭىرىندە ەڭ كرەاتيۆتى, باستاماشىل جانە دارىندى جاستار تاڭدالماق. وبلىس اكىمىنىڭ جىل سايىنعى «كوشباسشى-2023» سىيلىعىنا ىرىكتەۋ جانە ۇسىنۋ بويىنشا وتىنىشتەر قابىلداۋ مەرزىمى قاراشا ايىنىڭ 20-سىنان باستالدى, دەپ حابارلايدى Egemen.kz.
قاتىسۋ شارتتارى مەن ەرەجەلەرىن جەتىسۋ اۋداندىق قوعامدىق دامۋ باسقارماسى باسشىسىنىڭ ورىنباسارى ءىلياس تۇستىكباەۆ پەن «جەتىسۋ جاستارى» كمم ديرەكتورىنىڭ ورىنباسارى جانسايا سماعۇلوۆا باياندادى.
بايقاۋدا 14 پەن 35 جاس ارالىعىنداعى جاستار اراسىندا بەلسەندىلىكتى ىنتالاندىرۋعا باستى نازار اۋدارىلادى. ءبىر جىل ىشىندە جاستار ساياساتىنا ەلەۋلى ۇلەس قوسىپ, بەلگىلى ءبىر جەتىستىكتەردى باعىندىرا العان, وزگە جاستارعا ۇلگى وق بويى وزىق تۇلعالارعا ەرەكشە كوڭىل بولىنەدى. قۇجاتتار بەلگىلەنگەن ەرەجەلەرگە سايكەس 3 جەلتوقسانعا دەيىن قابىلدانادى.
«بيىل «ۇزدىك جاس قوعام قايراتكەرى», «ۇزدىك جاس سپورتشى», «ۇزدىك ستۋدەنت», «ۇزدىك وقۋشى», ء«بىلىم جانە عىلىم سالاسىنداعى ۇزدىك جاس كوشباسشى», «ۇزدىك جاس وتباسى», «ۇزدىك جاس كاسىپكەر», «مادەنيەت سالاسىنداعى ۇزدىك جاس كوشباسشى», «مەديتسينا سالاسىنداعى ۇزدىك جاس كوشباسشى» جانە «ۇزدىك جاس جۋرناليست» نوميناتسيالارى بويىنشا سەن تۇر مەن اتايىندار انىقتالادى. نوميناتسيا جەڭىمپازى بولۋ ءۇشىن ۇمىتكەرلەر كورسەتىلگەن سالالاردا جەتىستىككە جەتۋى كەرەك. سونداي-اق وبلىستىق, رەسپۋبليكالىق, حالىقارالىق بايقاۋلاردىڭ جەڭىمپازدارى, قوعامدىق جۇمىستارعا بەلسەنە ارالاسىپ, ەل العىسىن العان جاستار قاتارىنان كورىنۋى ابزال. ۇمىتكەر سىيلىققا ۇسىنىلۋ ءۇشىن بەلسەندى, ءبىلىمدى, كرەاتيۆتى ويلايتىن, ءبىر سوزبەن ايتقاندا, ناعىز كوشباسشى بولۋى كەرەك. قاتىسۋشىلار قازىرگى ۋاقىتتا جەتىسۋ وڭىرىندە تۇرىپ, جۇمىس ىستەۋگە نەمەسە وقۋعا مىندەتتى», دەدى ءىلياس تۇستىكباەۆ.
«جەتىسۋ جاستارى» كمم ديرەكتورىنىڭ ورىنباسارى جانسايا سماعۇلوۆا دا بيىلعى جىلدىڭ باستى ەرەكشەلىكتەرى - نوميناتسيالار بارلىق سالانى قامتيتىنىن, كەيبىرەۋلەرى بىرىكتىرىلىپ, جاڭارتىلعانىن مالىمدەدى. مىسالى, «ۇزدىك جاس قوعام بەلسەندىسى» اتالىمى بويىنشا جاس ساياساتكەرلەر, جاس مەملەكەتتىك قىزمەتشىلەر, ۆولونتەرلار جانە ۇكىمەتتىك ەمەس ۇيىمداردىڭ جەتەكشىلەرى باق سىناي الادى. سونىمەن قاتار «مادەنيەت سالاسىنداعى ۇزدىك جاس كوشباسشى» نوميناتسياسى جاس ونەرپازدار مەن اقىن-جازۋشىلاردى قامتيدى. «جاس ۇستاز» جانە «جاس عالىم» نوميناتسيالارى بىرىكتىرىلدى, ياعني ءبىزدىڭ ۇستازدارىمىز, ماگيسترلەرىمىز, دارىگەرلەرىمىز ء«بىلىم جانە عىلىم سالاسىنداعى ۇزدىك جاس كوشباسشى» ءۇشىن باقتالاسپاق. تاعى ءبىر جاڭالىق, بيىلعى جىلى ءار نوميناتسيانىڭ جەڭىمپازى 500 مىڭ تەڭگە كولەمىندە سىياقى الادى. كوميسسيا قۇرامىنا دا بىرقاتار وزگەرىس ەنگىزىلدى. قاتىسۋشىلار تەك وبلىستىق دەڭگەيدە عانا ەمەس, رەسپۋبليكالىق دەڭگەيدە دە كوميسسيا مۇشەلەرىنىڭ باقىلاۋىنان وتەدى. ايتا كەتۋ كەرەك, ءوتىنىم قۇجاتتارى باسپا تۇرىندە دە, ەلەكتروندى تۇردە دە ۇسىنىلۋى ءتيىس.