استانادا «Qazaqstan: ورنىقتى دامۋ جولىندا» اتتى اناليتيكالىق ماتەريالدار جيناعى كوپشىلىككە تانىستىرىلدى. وعان ەلىمىزدىڭ الەۋمەتتىك-ەكونوميكالىق دامۋىنىڭ نەگىزگى باعىتتارى بويىنشا ەڭبەكتەر جاريالانعان. اتالعان جيناقتى سەنات جانىنداعى جاس ساراپشىلار كلۋبىنىڭ مۇشەلەرى «تالداۋ مەكتەبىنىڭ» تۇلەكتەرىمەن بىرلەسىپ ازىرلەدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
ءىس-شاراعا قاتىسقان سەنات توراعاسى ماۋلەن اشىمباەۆ بىلتىرعى پرەزيدەنت سايلاۋىنان كەيىن ەلىمىزدە ساياسي جۇيە كەشەندى تۇردە جاڭعىرتىلعانىن اتاپ ءوتتى. مەملەكەتتىك قۇرىلىمنىڭ بارىنشا دەموكراتيالىق جانە ورنىقتى ۇلگىسىنە كوشۋ ۇدەرىسى باستالدى. بۇل رەتتە ساپالى اناليتيكا ەلدىڭ قارقىندى دامۋىنىڭ ماڭىزدى شارتى ەكەنى انىق.
«مەملەكەتتىك باسقارۋ جۇيەسىنىڭ تيىمدىلىگىن ارتتىرۋ ءۇشىن مەملەكەتتىك ورگاندار قىزمەتىندە تالداۋ جۇرگىزۋ باعىتىن كۇشەيتۋ قاجەت. پرەزيدەنتىمىز قاسىم-جومارت كەمەل ۇلى توقاەۆ وسى ماسەلەگە ءاردايىم باسا ءمان بەرىپ كەلەدى. مەملەكەت باسشىسى ۇلتتىق قۇرىلتايدىڭ ەكىنشى وتىرىسىندا مەملەكەتتىك باسقارۋدىڭ تيىمدىلىگى نەگىزىنەن تالداۋمەن قامتاماسىز ەتۋدىڭ ساپاسىنا بايلانىستى ەكەنىن ايتتى», دەدى ماۋلەن اشىمباەۆ.
سونداي-اق ول بۇگىندە مەملەكەت الەۋمەتتىك ماسەلەلەردى شەشۋ ءۇشىن كەشەندى زەرتتەۋلەر مەن ۇسىنىستاردى قاجەت ەتەتىنىنە نازار اۋداردى. پالاتا سپيكەرى اتاپ وتكەندەي, بۇل ورايدا ساپالى تالداۋ ورىندى شەشىمدەر قابىلداۋ جانە بەلگىلى ءبىر سالانى دامىتۋدىڭ نەعۇرلىم ءتيىمدى جولىن تاڭداۋ ءۇشىن قاجەت.
ماۋلەن اشىمباەۆ سەنات زاڭ شىعارۋ قىزمەتى اياسىندا ساراپشىلارمەن تىعىز بايلانىستا جۇمىس ىستەپ وتىرعانىن دا تىلگە تيەك ەتتى. كلۋب مۇشەلەرى پالاتا كوميتەتتەرىنىڭ جۇمىس توپتارىنا قوسىلىپ, پارلامەنتتىك تىڭداۋلارعا, ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ جۇمىسىنا جانە تاعى باسقا ءىس-شارالارعا جۇيەلى تۇردە قاتىسىپ كەلەدى.
ايتا كەتەيىك, سەنات 2020 جىلدان باستاپ جاس ساراپشىلارمەن جۇيەلى بايلانىس ورناتىپ, بەلسەندى جۇمىس جۇرگىزىپ كەلە جاتىر. ءار توقسان سايىن جاس ساراپشىلار كلۋبى اياسىندا وزەكتى ماسەلەلەر تالقىلانىپ وتىرادى. سونىڭ ناتيجەسىندە سالالىق مەملەكەتتىك ورگاندارمەن جانە «تالداۋ مەكتەبى» جوباسىنا قاتىسۋشىلارمەن بىرلەسىپ, كەشەندى ۇسىنىمدار ازىرلەنەدى. بۇگىندە اتالعان ەكى الاڭ اياسىندا 150 جاس مامان جۇمىلدىرىلعان. ولار – ەكونوميكادا جانە ەلدىڭ قوعامدىق-ساياسي ءومىرىنىڭ باسقا دا سالالارىندا بەلسەندىلىگىمەن تانىلعان بىلىكتى ماماندار.