مەملەكەت باسشىسىنا ەلىمىزدىڭ اۋىل شارۋاشىلىعى سەكتورىنىڭ بيىلعى 10 ايدا اتقارعان جۇمىستارىنىڭ نەگىزگى كورسەتكىشتەرى جونىندە مالىمەت بەرىلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنتكە اگروونەركاسىپ كەشەنىن دامىتۋدىڭ 2030 جىلعا دەيىنگى تۇجىرىمداماسىندا بەكىتىلگەن مىندەتتەردىڭ ورىندالۋى تۋرالى باياندالدى, سونداي-اق اتالعان سالانى ودان ءارى جەتىلدىرۋگە قاتىستى جوسپار تانىستىرىلدى.
اۋىل شارۋاشىلىعى ءمينيسترى ايداربەك ساپاروۆ قاسىم-جومارت توقاەۆقا جيىن-تەرىن ناۋقانىنىڭ قورىتىندىسى, بيىل وتاندىق شارۋالاردىڭ قيىن جاعدايدا جۇمىس ىستەگەنى جانە ۇكىمەت قابىلداعان قولداۋ شارالارى جايىندا ايتتى.
كەزدەسۋ سوڭىندا مەملەكەت باسشىسى مينيسترگە سالانى 5 جىل ىشىندە دامۋدىڭ جاڭا بەلەسىنە شىعارۋ, سونىڭ ىشىندە اۋىل شارۋاشىلىعىنىڭ جالپى ءونىم كولەمىن 2 ەسە ارتتىرۋ جونىندە مىندەت جۇكتەدى. ول ءۇشىن اتالعان سالادا مەملەكەتتىك قولداۋ جۇيەسىن جەتىلدىرۋگە, شارۋالاردى جەڭىلدەتىلگەن قارجىمەن جانە سۋبسيديامەن قامتاماسىز ەتۋگە, ەگىس القاپتارىن ارتاراپتاندىرۋعا جانە اۋىل شارۋاشىلىعى عىلىمىن دامىتۋعا باعىتتالعان قۇرىلىمدىق جانە ينستيتۋتسيونالدىق رەفورمالار جۇرگىزۋ قاجەت.