اباي وبلىسى بويىنشا قىزىلشانىڭ زەرتحانالىق راستالعان 75 جاعدايى تىركەلگەن. ونىڭ ىشىندە سەمەي قالاسىندا - 44, اياگوز اۋدانىندا - 12, ءۇرجار اۋدانىندا - 11 جانە جارما اۋدانىندا - 8 فاكتى انىقتالعان. بۇل تۋرالى اباي وڭىرلىك كوممۋنيكاتسيالىق ورتالىعىندا وتكەن ءباسپاسوز ءماسليحاتىندا وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسىنىڭ ورىنباسارى ايگۇل توقتاباەۆا مالىمدەدى, دەپ حابارلايدى Egemen.kz.
- سىرقاتتانۋشىلىقتىڭ 55 جاعدايى ياعني, 73,3% 14 جاسقا دەيىنگى بالالار اراسىندا تىركەلگەن. جاسوسپىرىمدەر اراسىندا دەرتتىڭ ءورشۋى ۆاكتسيناتسيادان باس تارتۋ سالدارىنان ورىن الىپ وتىر. قازىرگى ۋاقىتتا رەسپۋبليكا بويىنشا 6 ايدان 10 ايعا دەيىنگى بالالاردى قىزىلشا جانە پاروتيتكە قارسى قوسىمشا جاپپاي يممۋنداۋ باستالدى. جاپپاي يممۋنداۋ ەپيدەميولوگيالىق جاعداي تۇراقتالعانعا دەيىن جالعاسادى, - دەدى ا.توقتاباەۆا.
بۇگىندە جاپپاي يممۋنداۋ شەڭبەرىندە 2449 ادام ەكپە العان. ونىڭ ىشىندە 6 ايدان 10 اي 29 كۇنگە دەيىنگى بالالار سانى – 1400, 2-4 جاستاعى بالالار – 1013, مەديتسينا سالاسىنىڭ 36 قىزمەتكەرى ۆاكتسيناتسيالانعان.
ايگۇل توقتاباەۆانىڭ ايتۋىنشا, قىزىلشانى جۇقتىرۋدىڭ, يا بولماسا, اسقىنۋىنىڭ الدىن-الۋدىڭ ءبىر عانا جولى – ۆاكتسيناتسيا الۋدا. سول نەگىزدە وبلىس بويىنشا 6 ايدان 11 ايعا دەيىنگى 9191, 2 جاستان 4 جاسقا دەيىنگى 25700 نارەستەنى ۆاكتسيناتسيادان وتكىزۋ جوسپارلانىپ وتىر.
ەكپەلەردى جۇرگىزۋ ءۇشىن ددۇ سەرتيفيكاتتاعان جانە مەملەكەتتىك تىركەۋدەن وتكەن قىزىلشاعا, قىزامىققا, ەپيدەميالىق پاروتيتكە قارسى ارالاس ۆاكتسينا قولدانىلادى. ۆاكتسيناتسيا وبلىستاعى رۇقسات ەتىلگەن بارلىق مەديتسينالىق نىسانداردا تەگىن جۇرگىزىلەدى.