ارتىنا رۋحتى جىرلارىن قالدىرعان الداسپان اقىن, ەل تاۋەلسىزدىگىن اڭساعان اقبەرەن باتىر ماحامبەت وتەمىس ۇلىنىڭ ەسىمى ۇرپاق جادىندا جاڭعىرا بەرەدى. اتىراۋدا ءور تۇلعانىڭ تۋعانىنا 220 جىل تولۋىنا وراي «شاندوز» اتتى مۋزىكالىق-پوەتيكالىق ادەبي كەش ءوتتى.
«شاندوز» كومپوزيتسياسىنىڭ باستى كەيىپكەرىن بەلگىلى كۇيشى, «ەرەن ەڭبەگى ءۇشىن» مەدالىنىڭ يەگەرى جانىبەك جاميەۆ سومدادى. تەاتر ارتىستەرى ماحامبەتتىڭ «تارلانىم», «جورىق», «جاۋعا شاپقان», «ارىسىمنان ايىرىلدىم», «وكىنىش», «كىشكەنتاي» كۇيلەرىن ورىنداپ, اقىن جىرلارىن وقىدى. ارنايى كورمەگە رۋحتى اقىننىڭ ءومىرى مەن شىعارماشىلىعى تۋرالى كىتاپتار, رەسپۋبليكالىق سيمپوزيۋمعا قاتىسقان سۋرەتشىلەردىڭ تۋىندىلارى قويىلدى.
ادەبي كەشكە ارنايى قاتىسقان اتىراۋ وبلىسى اكىمى اپپاراتىنىڭ باسشىسى نۇرلىبەك جەڭىسبەك ۇلى, مەملەكەتتىك سىيلىقتىڭ لاۋرەاتى, قازاقستاننىڭ حالىق ءارتىسى تۇڭعىشباي جامانقۇلوۆ, بەلگىلى جازۋشى جۇماباي شاشتاي ۇلى, اقىن, حالىقارالىق «الاش» ادەبي سىيلىعىنىڭ لاۋرەاتى مارجان ەرشۋ ماحامبەت مۇرالارى حاقىنداعى ويىمەن ءبولىستى. داۋىلپاز اقىننىڭ وي-ارمانىنان, جان سارايىنان, ىشكى تانىمى مەن تولعانىسىنان تۋعان ولەڭ-جىرلارى اۋەلەگەن ساحنالىق قويىلىم كورەرمەندى بەيجاي قالدىرمادى.
جازۋشىلار وداعى اتىراۋ وبلىستىق فيليالىنىڭ ديرەكتورى, اقىن ءاليا داۋلەتباەۆانىڭ ايتۋىنشا, ادەبي كەش ەل تاۋەلسىزدىگىن اڭساپ, جالىندى جىرلارىمەن ەل جادىندا ساقتالعان اقىننىڭ شىعارمالارىن ناسيحاتتاۋ ماقساتىندا ۇيىمداستىرىلعان.
«قازاقتا ۇلى تۇلعالار از ەمەس. ال ماحامبەت وتەمىس ۇلى – ءوز ءداۋىرىنىڭ بىرەگەي تۇلعاسى. سول سەبەپتەن, باتىر ءارى اقىننىڭ تۋعانىنا 220 جىل تولۋىنا وراي وتكەن «شاندوز» اتتى ادەبي ءىس-شارادا ونىڭ كۇيلەرى مەن جىرلارىنىڭ كوپشىلىگى قامتىلدى. ءبىر سوزبەن ايتقاندا, ونەردىڭ سيمبيوزىن جاساۋعا تىرىستىق», دەيدى ءا.داۋلەتباەۆا.
ەلىمىزدىڭ ءار وڭىرىندە ماحامبەت وتەمىس ۇلىنىڭ ەسىمى وقۋ ورىندارى مەن كوشەلەرگە, وزگە دە نىساندارعا بەرىلگەن. ال اتىراۋداعى قازاق اكادەميالىق دراما تەاترى ءور تۇلعانىڭ ەسىمىمەن اتالادى.
اتىراۋ وبلىسى