تورتكۇل دۇنيەگە ورتاق فۋتبول ويىنى اۋىل بالالارىنا تاڭسىق ەمەس. الادوپ اياققا ىلىنسە, قولدان قاقپا جاساپ, ەكىگە جارىلا جارىسا كەتۋ – ۇيرەنشىكتى ءادىس. جاسىل الاڭ, جاقسى دوپ بولماسا دا فۋتبولدان حابارى بار ءار بوزبالانىڭ كوكەيىندە اتى اڭىزعا اينالعان پەلە, مارادونادان باستاپ, بۇگىنگى رونالدۋ, مەسسيدىڭ ويىن ورنەگى تۇرارى حاق.
بۇلارعا قوسا وتاندىق فۋتبولشىلارىمىز ابات ايىمبەتوۆ, اسحات تاعىبەرگەن, باقتيار زاينۋتدينوۆ, يسلامبەك قۋات, ابزال بەيسەبەكوۆتەردىڭ ىزىنەن ىلەسكىسى كەلەتىن اۋىل بالالارىنىڭ قيالىنا قانات ءبىتىرىپ, ولاردى سپورتتىڭ وسى تۇرىنە باۋلۋدى نيەت ەتكەن جۋرناليست ءارى سپورت جاناشىرى سەرىك مامبەتوۆ دوپقۇمار بالالاردان جاساقتالعان كوماندالاردىڭ جاتتىعۋىنا, جارىستارعا قاتىسۋىنا, ءبىر سوزبەن ايتقاندا, اۋىل فۋتبولىن دامىتۋ ماقساتىندا رەسپۋبليكالىق «اۋىلفۋتبول» جوباسىن جۇزەگە اسىرۋعا كىرىسىپ كەتكەلى ءۇش جىلدىڭ ءجۇزى بولدى. وسى ۋاقىت ارالىعىندا جوقتان بار جاساپ, بىرقاتار ىسكە ۇيىتقى بولعانى بەلگىلى.
جۋىردا اتالعان جوباعا «حالىق» قايىرىمدىلىق قورى كومەك قولىن سوزىپ, ەكىجاقتى مەموراندۋمعا قول قويدى. قاراساي اۋدانى جىبەك جولى اۋلىنداعى «اق-بارىس» سپورت كەشەنىندە وتكەن يگى ءىس-شاراعا «اۋىلفۋتبول» جوباسىنىڭ نەگىزىن قالاۋشى سەرىك مامبەتوۆ جانە «حالىق» قايىرىمدىلىق قورى الماتى وبلىستىق فيليالىنىڭ ديرەكتورى عالىمبەك جاقسىلىقوۆ قاتىستى. سونداي-اق جان جىلىتار جاڭالىقتى ەستىگەن اۋىلداعى فۋتبول كوماندالارى مەن اتا-انالار جينالىپ, وزگە وڭىرلەردەن ات تەرلەتىپ جەتكەن سپورت جاناشىرلارى دا توبە كورسەتتى.
«ەكى ۇلىمدى فۋتبول ويناتۋ ءۇشىن قالاعا تاسىمالداۋمەن, كەپتەلىستە تۇرۋمەن كۇنىمىز وتەتىن. وعان ەكىنىڭ ءبىرىنىڭ مۇمكىندىگى بولا بەرمەيدى. وسىنى ەسكەرە كەلە رايىمبەك اۋىلىنان كوماندا قۇرۋدى قولعا العان ەدىك, العاشىندا 25 بالا جينالا كەتتى. وسىدان-اق اۋىل بالالارىنىڭ فۋتبولعا دەگەن قىزىعۋشىلىعىن, ىنتاسىن كوردىك. سودان بەرگى ءۇش جىل ىشىندە 120 بالا تۇراقتى تۇردە فۋتبولمەن اينالىسىپ جاتىر. اۋىلدا ستاديون جوق. سوعان قاراماستان مەكتەپتەردىڭ الاڭىندا جاتتىققان جاس فۋتبولشىلاردىڭ جەتىستىكتەرى از ەمەس», دەيدى «اۋىلفۋتبول» جوباسىنىڭ جەتەكشىسى س.مامبەتوۆ.
دەسە دە, بار ماسەلەنىڭ قارجىعا تىرەلەرى ايتپاسا دا تۇسىنىكتى. وسى ءبىر تۇيتكىلدىڭ ءتۇيىنىن تارقاتۋ جولىندا «حالىق» قايىرىمدىلىق قورى اتالعان جوبانىڭ جاندانۋىنا قولۇشىن بەرۋدى ءجون ساناپتى. الداعى ۋاقىتتا اۋىلداعى جاس وسكىننىڭ فۋتبول ويىندارىنا قاتىسىپ, شىنىعۋىنا, دودالى جاراستاردا باق سىناسۋىنا ۇلكەن مۇمكىندىكتەر تۋادى.
ءوز كەزەگىندە باس دەمەۋشىلەر 100 اۋىلدىڭ بالالار فۋتبول كومانداسىنا جاتتىعۋ جابدىقتارىن ساتىپ الۋعا جاردەمدەسۋدى, اۋىل كوماندالارى اراسىندا 17 وبلىستىق تۋرنير جانە رەسپۋبليكالىق دەڭگەيدە فينالدىق تۋرنير وتكىزۋدى, 100 اۋىل جاتتىقتىرۋشىسىن ۋەفا-نىڭ «D» ساناتى بويىنشا وقىتۋ, سونداي-اق الماتى وبلىسى قۇراما كوماندالارىنىڭ وقۋ-جاتتىعۋ ۇدەرىسىن جانە ولاردىڭ بەدەلدى جارىستارعا قاتىسۋىن قامتاماسىز ەتۋدى ءوز مىندەتىنە الىپ وتىر. جىل ون ەكى ايدا جۇزەگە اساتىن جۇمىس جوسپار اياسىندا 3 مىڭنان اسا اۋىل بالاسىن قامتۋ كوزدەلگەن.
بۇعان دەيىن بيىل ماۋسىم ايىندا «حالىق» قايىرىمدىلىق قورى الماتى وبلىسىنان كەلگەن 200-دەن اسا جاس فۋتبولشىنىڭ باسىن قوسقان ەكى كۇندىك Halyk Open Cup تۋرنيرىنە دەمەۋشىلىك جاسادى. ۇزدىك ويىنشىلاردان الماتى DUFL ليگاسى مەن الماتى بالالار ليگاسىنا قاتىساتىن كوماندا جاساقتالدى.
قور كوماندانى قاجەتتى قۇرال-جابدىقتارمەن قامتاماسىز ەتىپ, قالاعا جەتكىزۋ اقىسىن تولەدى. ناتيجەسىندە, 2013 جىلى تۋعان بالالاردان قۇرالعان «اۋىلفۋتبول» كومانداسى DUFL قولا جۇلدەگەرى اتانسا, ال 2014 جىلدان كەيىنگى تۋعان بالالار كومانداسى الماتى بالالار ليگاسىنىڭ چەمپيونى بولدى. قوردىڭ «اۋىلفۋتبول» جوباسىن قولداۋى تابىستى ءارى ءتيىمدى بولۋدا, وعان اۋىلدىق بالالار فۋتبول كوماندالارى اراسىندا قىزىعۋشىلىقتىڭ ارتۋى جانە «اۋىلفۋتبول» جوباسى اۋقىمىنىڭ كەڭەيۋى دالەل.
Halyk Open Cup ءتۋرنيرى وتكەننەن كەيىن «اۋىلفۋتبول» جوباسى اۋىلدارداعى بالالار كوماندالارى اراسىندا بۇرىنعىدان دا تانىمال بولا ءتۇستى. تۋرنيردەن كەيىنگى ءۇش اي ىشىندە جوباعا قاتىسۋشى كوماندالار سانى 35 پايىزعا, ياعني 24-تەن 32 كومانداعا دەيىن ءوستى. وسى 3,5 جىلدا بىرنەشە جوبا جۇزەگە اسىرىلعان. اتاپ ايتساق, قاراساي اۋدانىنداعى رايىمبەك جانە اباي, اششىبۇلاق, كوكساي, ىرگەلى اۋىلدارىندا, سونداي-اق قىزىلوردا وبلىسىنىڭ تورەباي اۋلىندا جاڭا كلۋبتار قۇرىلعان. جۋىردا تۇركىستان جانە سولتۇستىك قازاقستان وبلىستارىندا بىرنەشە كلۋب اشىلادى دەپ كۇتىلىپ وتىر. سونىمەن قاتار الماتى جانە اقتوبە وبلىستارىندا 2 فۋتبول الاڭى سالىندى.
«كىشكەنە ىستەر ساياساتى» اتتى بالالار كوماندالارىن قولداۋ باعدارلاماسى ىسكە قوسىلىپ, 80-نەن اسا بالالار كومانداسى دەمەۋشىلەر كومەگىمەن جاتتىعۋ جابدىقتارىمەن, فورمالارمەن, دوپتارمەن قامتىلدى.
ء«ارتۇرلى شاعىن جوبالارعا بىرقاتار دەمەۋشى تارتىلدى. 35-تەن اسا, ونىڭ ىشىندە 6 رەسپۋبليكالىق تۋرنير وتكىزىلدى. اۋىل كوماندالارى جاتتىقتىرۋشىلارىنا 30-دان اسا سەمينار وتكىزىلدى», دەيدى جوبا جەتەكشىسى.
«Futbol Week End» اتتى باعدارلاما اياسىندا سپورت جارىستارى, مادەني-تانىمدىق ءىس-شارالار جانە دارىستەر وتكىزىلگەنىن اتاۋ ارتىق ەتپەس. ەرەسەكتەر مەن اتا-انالاردىڭ فۋتبولعا قىزىعۋشىلىعىن ارتتىرۋ ماقساتىندا 2 رەت «وتباسى جانە فۋتبول» فەستيۆالى ۇيىمداستىرىلىپ, جوباعا قاتىسۋشى 30-دان اسا كوماندا ءتۇرلى جارىستاردىڭ, سونىڭ ىشىندە حالىقارالىق جارىستاردىڭ تۇراقتى قاتىسۋشىلارىنا اينالعان. ماسەلەن, ماڭعىستاۋدىڭ «اقشۇقىر» كومانداسى قازاقستان چەمپيونى جانە قىرعىزستاندا وتكەن حالىقارالىق ءتۋرنيردىڭ جەڭىمپازى اتانعان.
«اۋىلفۋتبول» جوباسى بۇگىندە بىرقاتار وبلىستا قانات جايعان. «حالىق» قايىرىمدىلىق قورى دەنساۋلىق ساقتاۋ, ءبىلىم بەرۋ, سپورت, مادەنيەت جانە الەۋمەتتىك قورعاۋ سياقتى قوعامدىق ءومىردىڭ ماڭىزدى سالالارىندا اۋقىمدى قايىرىمدىلىق جوبالارىن جۇزەگە اسىرۋ جانە قولداۋ بويىنشا تابىستى قىزمەت اتقارىپ كەلەدى. قور قىزمەتىنىڭ باسىم باعىتتارىنىڭ ءبىرى – سپورت سالاسىنداعى جوبالاردى قولداۋ», دەيدى عالىمبەك جاقسىلىقوۆ.
قايىرىمدىلىق ءىس-شارالارى مۇنىمەن شەكتەلمەيدى. اتالعان قوردىڭ كەشەندى قولداۋ كورسەتۋ ماقساتىندا 2019-2020 جىلدارعا ارنالعان «حالىق ليگاسى» قايىرىمدىلىق باعدارلاماسى اياسىندا ۇلتتىق باسكەتبول فەدەراتسياسىنىڭ جاتتىقتىرۋشىلار قۇرامىن جالاقى قورىمەن قامتاماسىز ەتۋ جانە بالالار ءۇيىنىڭ تاربيەلەنۋشىلەرىن ء«ۇمىت كۋبوگى» چەمپيوناتىنا دايىنداۋ ءۇشىن سپورت قۇرال-جابدىقتارىن ساتىپ الۋ تۇرىندە كومەك كورسەتىلگەن.
بيىل 4 ماۋسىمدا «حالىق» قورىنىڭ قولداۋىمەن الماتى قالاسىندا بارلىق ءستيلدى كاراتەدەن حالىقارالىق تۋرنير ءوتتى. تۋرنيرگە قاتىسۋشىلاردىڭ جارتىسىنان كوبى جۇلدەگەر اتاندى. تاتاميگە ۋكراينا, تاجىكستان, وزبەكستان, قىرعىزستان, ازەربايجان, تۇرىكمەنستان, موڭعوليا جانە قازاقستاننىڭ ءار وڭىرىنەن, سونىڭ ىشىندە شاعىن اۋىلداردان 500 سپورتشى شىقتى. جارىسقا ءتۇرلى جاستاعى بالالار قاتىستى. ولاردىڭ ەڭ كىشكەنتايى 5 جاستا بولسا, ەڭ ۇلكەنى – 17 جاستا. بۇل بالالار ءۇشىن زور جەتىستىك ءارى ۇلكەن مۇمكىندىك بولعانى انىق.
وسىنداي جوبالار ارقىلى «حالىق» قايىرىمدىلىق قورى پرەزيدەنت قاسىم-جومارت توقاەۆتىڭ جولداۋىندا ايتىلعان بۇقارالىق سپورتتى دامىتۋ تۋرالى تاپسىرماسىن جۇزەگە اسىرۋعا اتسالىسىپ كەلەدى. سونداي-اق سپورتتى دامىتۋعا جانە ناسيحاتتاۋعا, مىقتى سپورتشىلاردى انىقتاۋعا, وسكەلەڭ ۇرپاق اراسىندا سالاماتتى ءومىر سالتىن ناسيحاتتاۋعا ۇلەس قوسىپ جاتىر.
الماتى وبلىسى
سۋرەتتە: جاسىل الاڭدا جاس فۋتبولشىلار