بىرنەشە ەۋروپالىق مەملەكەت ترانسكاسپيلىك حالىقارالىق كولىك باعدارىنا كىرۋگە قىزىعۋشىلىق تانىتىپ وتىر. بۇل تۋرالى كولىك ءمينيسترى مارات قاراباەۆتىڭ بريۋسسەلدە ەۋروپالىق ۇيىمداردىڭ باسشىلارىمەن وتكىزگەن بىرقاتار ەكىجاقتى كەزدەسۋىندە بەلگىلى بولدى.
مينيسترلىكتىڭ ءباسپاسوز قىزمەتى حابارلاعانداي, بەلگيا استاناسىندا مارات قاراباەۆ ەۋروپالىق كوميسسيانىڭ ۆيتسە-پرەزيدەنتى ماروش شەفچوۆيچپەن, كولىك جونىندەگى ەۋروكوميسسار ادينا ۆالەانمەن, ەقدب پرەزيدەنتى وديل رەنو-باسسومەن, سونداي-اق BESIX بەلگيالىق-فرانتسۋزدىق قۇرىلىس كومپانياسىنىڭ باس ديرەكتورى فيليپپ دەسسومەن كەزدەسىپ, وندا قازاقستان مەن ەۋروپالىق وداقتىڭ قۇرىلىس, ەنەرگەتيكا, كولىك جانە لوگيستيكا سالاسىنداعى ىنتىماقتاستىعىن تەرەڭدەتۋ ماسەلەلەرى تالقىلانعان.
بۇلارمەن بىرگە, م.قاراباەۆ Hyrasia One كومپانياسى مەن «سارجا» تەڭىز تەرمينالى اراسىنداعى قۇرىق پورتىنان ەۋروپاعا تازا سۋتەگى مەن اممياكتى تاسىمالداۋ جونىندەگى كەلىسىمگە قول قويۋ راسىمىنە قاتىسقان. بۇل كەلىسىمشارت تاعى ءبىر كوپفۋنكتسيونالدى «سارجا» تەرمينالىنىڭ قۇرىلىسىن باستاۋعا مۇمكىندىك بەرەدى.
ء«بىز ءتيىمدى ترانزيتتىك ترانسكونتينەنتالدىق دالىزدەر مەن مارشرۋتتار جەلىسىن قۇردىق. شىعىس-باتىس باعىتى بويىنشا ترانسكاسپيلىك حالىقارالىق كولىك باعدارىنىڭ ءرولى ارتا ءتۇستى. بۇعان 2022 جىلدىڭ قورىتىندىسى بويىنشا ەو, وا جانە قحر اراسىنداعى جۇك تاسىمالى كولەمىنىڭ ەكى ەسە ءوسۋى دالەل», دەدى كولىك دالىزدەرى بويىنشا پلەنارلىق جانە پانەلدىك سەسسياعا قاتىسقان كولىك ءمينيسترى.
سونىمەن قاتار 2017 جىلدان باستاپ قازاقستان, قىتاي, ازەربايجان, گرۋزيا, تۇركيا, رۋمىنيا, پولشا جانە بولگاريانىڭ قاتىسۋىمەن حالىقارالىق تحكب قاۋىمداستىعى جۇمىس ىستەيتىنىن اتاپ ءوتتى. ءمينيستردىڭ ايتۋىنشا, بۇل كۇندەرى اۋستريا, گەرمانيا, ليتۆا, لاتۆيا, ەستونيا جانە ماجارستان اتالعان كولىك باعدارىنا كىرۋگە قىزىعۋشىلىق تانىتىپ وتىر.