قازاقستان مەن رەسەي فەدەراتسياسىنىڭ 500 ادامنان ارتىق ادام قاتىسقان وڭىرارالىق ىنتىماقتاستىق فورۋمى بارىسىندا سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ ومبى وبلىسىنىڭ گۋبەرناتورى ۆيتالي حوتسەنكومەن جۇزدەستى. كەزدەسۋدە ەكى ءوڭىر اراسىنداعى ىنتىماقتاستىقتى نىعايتۋ ماسەلەلەرى تالقىلاندى, دەپ جازادى Egemen.kz.
سونداي-اق عاۋەز نۇرمۇحامبەتوۆ رەسەيدىڭ «حلەبپروم» كومپانياسىنىڭ باس ديرەكتورى ياروسلاۆ شادىريامەن كەزدەسۋ وتكىزىپ, «Qyzyljar» ارنايى ەكونوميكالىق ايماعىندا ينۆەستجوبانى جۇزەگە اسىرۋ بويىنشا كەلىسسوزدەر جۇرگىزدى.
«بۇل فورۋم ەكىجاقتى قارىم-قاتىناستاردى دامىتۋعا, سەرىكتەستىك پەن ىسكەرلىك بايلانىستاردى نىعايتۋعا قوسىمشا سەرپىن بەرمەك جانە وڭىرارالىق ىنتىماقتاستىقتىڭ جاڭا پەرسپەكتيۆالى باعىتتارىن دامىتۋدى قامتاماسىز ەتەدى», دەپ جازدى وبلىس اكىمى الەۋمەتتىك جەلىدەگى پاراقشاسىندا.
ايتا كەتەتىن جايت, فورۋمعا قازاقستاننىڭ 8 وبلىسىنىڭ جانە رەسەي فەدەراتسياسىنىڭ 12 وڭىرىنەن وكىلدەر قاتىستى.