سولتۇستىك قازاقستان وبلىستىق پروكۋراتۋراسىنىڭ مالىمدەۋىنشە, ع.مۇسىرەپوۆ اۋدانىندا بيۋدجەت قاراجاتىن قولدى قىلۋ دەرەگى انىقتالعان. بۇل زاڭسىزدىقتى پروكۋراتۋرا قىزمەتكەرلەرى 2022 جىلعى مالىمەتتەردى تەكسەرۋ بارىسىندا اشكەرەلەپ وتىر.
اۋداننىڭ تۇرعىن-ءۇي كوممۋنالدىق ءبولىمىنىڭ باسشىسى «مەملەكەتتىك ساتىپ الۋ تۋرالى» زاڭعا سايكەس تەندەردى ۇتىپ العان مەردىگەر كومپانيا ورىنداۋعا ءتيىستى اۆتوموبيل جولدارىنىڭ جوندەلمەگەنىنە قاراماستان اتقارىلماعان جۇمىس اكتىسىنە قول قويىپ, 427 ملن تەڭگە تولەگەن.
وسىنشاما قوماقتى قارجىنى زاڭسىز تولەگەن ادامنىڭ ەسىمى ءالى كۇنگە اتالماي وتىر. سونىمەن بىرگە قارجىنى تۇك ىستەمەي قالتاسىنا باسقان مەردىگەر كومپانيا باسشىسىنىڭ دا اتى-ءجونى بەلگىسىز. جوندەۋ جۇمىستارىن باقىلاۋعا مەملەكەت تاراپىنان تاعايىندالعان تەحنيكالىق قاداعالاۋ ساراپشىسىنىڭ دا ەسىمى بەيمالىم. جولدىڭ جوندەلگەنىن قاداعالاۋعا تاعايىندالعان ساراپشى دا «جول جوندەلدى» دەگەن وتىرىك اكتىگە قول قويعان. وسى ءىستى قاراعان پەتروپاۆل قالالىق سوتى قىلمىستىق كودەكستىڭ 189-بابىنىڭ 4-تارماعى 2-تارماقشاسىمەن قاراستىرىلعان قىلمىستىق قۇقىق بۇزۋشىلىق جاساعانى ءۇشىن ىسكە تىكەلەي قاتىستى ۇشەۋىنىڭ ارقايسىسىنا 7 جىل مەرزىمگە باس بوستاندىعىنان ايىرۋ تۇرىندەگى جازا تاعايىندادى.
بىراق جولعا قاتىستى مۇنداي وقيعالار وڭىردە ءالى دە كوپ ەكەنىن تۇرعىندار جاقسى بىلەدى. ويتكەنى بيىل عانا جوندەلگەن جولدار كەلەسى جىلى شۇرق-تەسىك بولىپ جاتادى. بۇل دا جوندەۋ جۇمىستارىنىڭ جانە قولدانىلعان ماتەريالداردىڭ وتە ساپاسىز, تەك كوزبوياۋشىلىق ءۇشىن عانا جاسالعانىن كورسەتەدى.
پروكۋراتۋرا ورگاندارى مۇنداي ولقىلىقتاردى پەتروپاۆل قالاسىنىڭ جوندەلدى دەگەن جولدارىنان تاۋىپ وتىر. وبلىس پروكۋراتۋراسىنىڭ رەسمي سايتىندا: «اۆتوموبيل جولدارى تۋرالى» زاڭ تالاپتارىن بۇزا وتىرىپ, پەتروپاۆل قالاسىنىڭ تۇرعىن ءۇي-كوممۋنالدىق شارۋاشىلىق ءبولىمىنىڭ لاۋازىمدى ادامدارى قالانىڭ 20 كوشەسىن اعىمداعى جانە ورتاشا جوندەۋ ءۇشىن ورىندالعان جۇمىستار اكتىلەرىنە قول قويعان, ولار ءىس جۇزىندە قازاقستان رەسپۋبليكاسى ۇلتتىق ستاندارتىنىڭ بەلگىلەنگەن نورمالارىنا سايكەس كەلمەيدى», دەپ جازىلعان.
مەردىگەر جولداردى شالا جوندەپ, سەرتيفيكاتقا ساي كەلمەيتىن اسفالت-بەتون قوسپاسىن پايدالانعان. ال باقىلاۋ مەن قاداعالاۋعا ءتيىستى شەنەۋنىكتەر ساپاسىز جاسالعان جولداردى تولىق جوندەلگەن دەگەن اكتىگە قول قويعان. وسىنداي ولقىلىقتار وبلىس ورتالىعىنىڭ جوندەلدى دەگەن 20 كوشەسىنىڭ جولدارىنان تابىلعان. ارينە, بۇل جەردە دە «بارماق باستى, كوز قىستىلىق» بار ەكەنى كورىنىپ تۇر. ايتپەسە, قاراجاياۋ ادامدار ەمەس, تكش-نىڭ ماماندارى جولدىڭ قالاي جوندەلگەنىن بىلۋگە ءتيىس. بيىل عانا جوندەلگەن جولداردىڭ شۇرق-تەسىك بولىپ جاتقانىن تۇرعىندار كۇندە كورەدى.
پروكۋراتۋرا ورگاندارى تەكسەرىپ, ءتيىستى اكت جاساعاننان كەيىن بۇزۋشىلىقتاردى جويۋ جانە جۇمىستى قابىلداۋ اكتىسىنە قول قويعان لاۋازىمدى ادامداردى جاۋاپكەرشىلىككە تارتۋ جونىندە شارالار جۇرگىزىلىپ جاتىر.
پەتروپاۆل