قازىرگى تاڭدا ەلىمىزدىڭ مەدياكەڭىستىگىندە ىقپالدى ءارى ءمان-ماڭىزى جوعارى كونتەنت قالىپتاستىرۋ اسا قاجەت. سوندىقتان سالانىڭ باعدار-پايىمى, نەگىزگى ۇستانىمى جۇيەلەنۋگە ءتيىس. بۇل تۋرالى ءاردايىم ءسوز قوزعالىپ جۇرگەنىمەن قانداي دا ءبىر ءىس-قيمىل بايقالمايدى. ارينە, اتالعان باعىتتا ءتيىستى جۇمىستار قولعا الىنىپ جاتۋى دا مۇمكىن, بىراق ونىڭ اسەرى قوعامدا سەزىلمەيدى.
مەملەكەت باسشىسى ق.توقاەۆ «جاڭا قازاقستان: جاڭارۋ جانە جاڭعىرۋ جولى» اتتى جولداۋىندا وتاندىق باق-تىڭ باسەكەگە قابىلەتتىلىگىن كوتەرۋ ماسەلەسىنە ارنايى توقتالعان ەدى. پرەزيدەنت ءبىزدىڭ باق-تىڭ ەلىمىزدە, ايماقتا جانە حالىقارالىق كەڭىستىكتە بولىپ جاتاتىن ۇدەرىستەر مەن اۋقىمدى وقيعالارعا قاتىستى وزىندىك كوزقاراسى بولۋى قاجەتتىگىن, بۇل ءوز كەزەگىندە مەملەكەتىمىزدىڭ شىنايى اقپاراتتىق قاۋىپسىزدىگىنە قاتىستى ەكەنىن اتاپ وتكەن-ءدى. سوندىقتان بىزگە سۇرانىسقا ساي ءارى ۋاقىت تالابىنا لايىقتى جاۋاپ بەرەتىن, ءۇنى انىق, جاھاندىق باسەكەگە توتەپ بەرەتىن اقپاراتتىق كەڭىستىك قۇرۋدىڭ ماڭىزى زور.
الەمدىك كەڭىستىكتە كىم اقپاراتتىق تۇرعىدان وكتەم بولسا, سونىڭ داۋىسى زور, ءسوزى ءوتىمدى, وتىرىگى شىندىق, جامانى جاقسى, جاسىعى قايراتتى, بۇرىسى دۇرىس. ولار وزگەگە ءجابىر كورسەتىپ تۇرسا دا ءوزى جابىرلەنگەن بولىپ كورىنە دە الادى. ويتكەنى ونىڭ ءۇنى انىق, بارىنە ەستىلەدى. ال اقپاراتتىق باسەكەدە ءباسى تومەننىڭ ءجۇزى دە تومەن. سوندىقتان...
وسى تۇستا ەلىمىزدەگى باق-تىڭ الەمدەگى, ايماقتاعى, ءوز قوعامىنداعى ىقپالى نەشىك, قانداي دەڭگەيدە دەگەن مازمۇندا زاڭدى سۇراق تۋىندايدى. بۇل ساۋالعا كوتەرىڭكى كوڭىل-كۇيمەن ماقتانا جاۋاپ بەرە الاتىنداي مۇمكىندىك بار ما بىزدە؟ اتالعان ماسەلەگە قاتىستى ناقتى پالەندەي پىكىر ايتۋ قيىن. الايدا اقپاراتتىق كەڭىستىكتە ۇلتتىق مۇراتتىڭ السىزدىگى وكپەنى قىساتىن جاعىمسىز كورىنىستەرگە قارسى مىقتى يممۋنيتەت قالىپتاستىرا الماي وتىرعانىمىز باسەكەنىڭ تومەندىگىن كورسەتەدى.
بىزدە اتالعان ماسەلەدە ىلگەرى نيەت بولۋى مۇمكىن, بىراق ىزدەنۋ, ىلكىمدى ويعا جۇگىنۋ جوق. سودان كەلىپ, الگى ءتۇزۋ نيەتىڭنىڭ قۇنى ءبىر تيىن بولادى.
ەلىمىزدىڭ اقپاراتتىق كەڭىستىگىندەگى كونتەنتتىڭ ساپاسىن كوتەرۋ ماڭىزدى. سوندا عانا ونىڭ ءوز قوعامىمىزداعى اۋديتورياسى كەڭەيەدى, ودان بولەك ايماقتىق, ءتىپتى الەمدىك اقپاراتتىق كەڭىستىكتەگى سۇرانىسقا يە بولا باستايدى. ناقتى ءىس-قيمىلدار جاسالسا, جەمىسىن بۇگىن ءبىز جەمەسەك تە كەلەر ۇرپاعىمىز قىزىعىن, پايداسىن كورەدى. سوندىقتان دا بىزگە ءبىرىنشى كەزەكتە ەلىمىزدەگى اقپارات سالاسىنىڭ قازىرگى الەۋەتىنە, تىنىس-تىرشىلىگىنە مەملەكەتتىك دەڭگەيدە شىنايى ساراپتاما جاسالىپ, تالداۋ-تارازىلاۋ جۇمىستارى جۇرگىزىلۋى ماڭىزدى. بۇل اينالىپ كەلگەندە سالانىڭ كەلەشەككە ءتيىمدى قادام جاساۋى ءۇشىن قاجەت. وسى تالداۋ جۇمىستارى ورتاق يدەولوگەمالاردى ناقتىلاۋعا مۇمكىندىك بەرۋگە ءتيىس. سونداي-اق «بۇگىنگى تاڭداعى اقپاراتتىق كەڭىستىگىمىزدەگى ونىمدەردىڭ ساپاسى مەن باسەكەگە قابىلەتتىلىگى قانداي, وتاندىق باق-قا حالىقتىڭ سەنىمى, ونىڭ قوعامداعى الەۋمەتتىك جاۋاپكەرشىلىگى قاي دەڭگەيدە؟» دەگەن سۇراقتارعا لايىقتى جاۋاپ الىنعانى ءجون. اتالعان ساۋالدارعا ءتيىستى ءارى شىنايى جاۋاپ تابىلىپ جاتسا, باق سالاسىنا قاجەتتى ماماندار دايارلاۋدىڭ قانشالىقتى وزەكتى ەكەندىگى ايقىندالار ەدى.
اقپاراتتىق كەڭىستىكتەگى بۇرىننان قالىپتاسقان ەسكى سۇرلەۋلەردەن تۇبەگەيلى باس تارتۋ مۇمكىن ەمەس, ارينە. الايدا قازاق قوعامىنىڭ سۇرانىسىن زەرتتەپ, سوعان ساي جاڭاشىلدىققا نەگىزدەلگەن وزىق تەحنولوگيالاردى ەنگىزۋ, تىڭ يدەيالار ىزدەۋ, ۋاقىت تالابىنا وراي ءىس-قيمىلدارعا يەك ارتۋ قاجەتتىگى وزدىگىنەن بەلگىلى بولىپ تۇرعان قازىرگى كەزەڭدە لايىقتى, جاڭا مامانداردىڭ قۋاتتى بۋىنىن قالىپتاستىرۋ وزەكتى.
قالاي دەسەك تە, باسقانى بىلاي قويعاندا ءوزىمىزدىڭ اقپاراتتىڭ كەڭىستىگىمىزدە ۇستەم بولىپ, ءۇنىمىز انىق ەستىلگەنى ابزال. ونسىز حالقىمىزدى ورتاق مۇددەگە جۇمىلدىرۋ قيىن. بارىنەن دە, ويىمىزدى ونعا, سانامىزدى سانعا بولەتىن وزگەنىڭ كوزقاراستارى مەن ۇستانىمدارىنا بوي الدىرىپ كەتپەۋىمىز ءۇشىن, ۇلتتىق قۇندىلىقتارىمىزدى ورتاق يگىلىك رەتىندە تانۋ ءۇشىن, ساياسي, مادەني-رۋحاني باعىتىمىز ءبىر بولۋى ءۇشىن ءوز اقپاراتتىق كەڭىستىگىمىزگە يە بولۋىمىز كەرەك. سوندا ەلدىگىمىزدى ساقتاۋ, ەگەمەندىگىمىزدى نىعايتۋ, مەملەكەت رەتىندەگى بەدەلىمىزدى ارتتىرۋ باعىتىنداعى جۇمىستارىمىز ناتيجەلى بولماق. ولاي بولماسا, ءوز الەمىمىزدى وزگەنىڭ شاڭ-توزاڭى باسا بەرەدى.
قورىتا ايتقاندا, ءوزىمىزدىڭ مەدياكەڭىستىگىمىز كىم كورىنگەننىڭ ويىنا كەلگەنىن ىستەيتىن يەسىز الاڭ بولىپ قالماعانى ءجون. سوندىقتان اقپارات سالاسىنداعى باسەكەدە ءباسىمىز جوعارى بولۋى ءۇشىن ۇمتىلىس كەرەك.