مەملەكەت باسشىسىنىڭ ايتۋىنشا, رەسەي پرەزيدەنتىنىڭ قازاقستانعا ساپارى ەكى ەل اراسىنداعى قارىم-قاتىناستى دامىتۋ پەرسپەكتيۆاسىن ايقىنداۋ تۇرعىسىنان ەرەكشە مانگە يە. بۇگىندە ستراتەگيالىق سەرىكتەستىك جانە وداقتاستىق رۋحىنداعى ەكىجاقتى ىنتىماقتاستىق بارلىق باعىتتا تابىستى دامىپ كەلەدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«ەكى ەلدىڭ دامۋ جولدارىن ءوز بەتىنشە ءارى دەربەس تاڭداۋى قوس تاراپقا كەدەرگى كەلتىرمەيدى, كەرىسىنشە, بۇل تەڭ قۇقىلى جانە ءوزارا ءتيىمدى ارىپتەستىكتىڭ پايدالى جاعىن ەسەلەي تۇسەدى. مۇنى قازاقستاندا دا, رەسەيدە دە جاقسى تۇسىنەدى», دەدى پرەزيدەنت.
قاسىم-جومارت توقاەۆ بىرلەسكەن كۇش-جىگەردىڭ ارقاسىندا قازاقستان مەن رەسەي اراسىنداعى شەكارا ەكى ەل ەكونوميكالارىنىڭ يگىلىگى ءۇشىن بەلسەندى جۇمىس ىستەپ جاتقانىنا نازار اۋداردى. مۇنىڭ ناقتى پايداسىن شەكارا ماڭىنداعى وڭىرلەردە تۇراتىن 25 ميلليونعا جۋىق ادام سەزىنىپ وتىر.
«عاسىرلار بويى ءبىر-بىرىمەن قوڭسىلاس ءومىر سۇرگەن اتا-بابالارىمىز دوستىق, سەنىم مەن تاتۋ كورشىلىك قارىم-قاتىناستىڭ مىزعىماس قۇندىلىقتارىن بىزگە امانات ەتتى. ءبىز بۇل قۇندىلىقتاردى ساقتاپ, كەلەسى ۇرپاققا جەتكىزۋىمىز كەرەك», دەدى پرەزيدەنت.
كەلىسسوز بارىسىندا تاراپتار ەكىجاقتى ەكونوميكالىق كۇن ءتارتىبىنىڭ نەگىزگى اسپەكتىلەرىن جان-جاقتى تالقىلادى. سونداي-اق الداعى ىنتىماقتاستىقتىڭ نەگىزگى باعىتتارىن ايقىنداپ, دەنساۋلىق ساقتاۋ, ەنەرگەتيكا, كولىك, اۋىل شارۋاشىلىعى, سپورت جانە تاعى دا باسقا سالالارداعى ىقپالداستىقتى نىعايتۋدى كوزدەيتىن بىرقاتار ۋاعدالاستىققا قول جەتكىزدى.
ۆلاديمير پۋتين ءداستۇرلى قوناقجايلىعى ءۇشىن قاسىم-جومارت توقاەۆقا العىس ايتىپ, شاعىن قۇرامداعى كەلىسسوزدىڭ ناتيجەلى بولعانىن اتاپ ءوتتى
«رەسەي مەن قازاقستان – جاي عانا ەمەس, ەڭ جاقىن وداقتاستار. مۇنداي قارىم-قاتىناس ۇزاق جىلدار بويى قالىپتاستى. حالىقتارىمىزدىڭ يگىلىگىنە قالتقىسىز قىزمەت ەتەتىن بايلانىستارىمىزدى نىعايتۋ ءداستۇرىن جالعاستىرىپ وتىرعانى ءۇشىن قاسىم-جومارت كەمەل ۇلىنا العىس ايتقىم كەلەدى», دەدى رەسەي پرەزيدەنتى.
ۆلاديمير پۋتين اۋىل شارۋاشىلىعىمەن قاتار, ءبىلىم جانە عىلىم, جوعارى تەحنولوگيا, ماشينا جاساۋ, حيميا ونەركاسىبى, ونەركاسىپتىك ءوندىرىس سياقتى سالالار ىنتىماقتاستىعىمىزدىڭ باسىم باعىتتارىنا اينالۋعا ءتيىس دەپ سانايدى. كەزدەسۋ سوڭىندا پرەزيدەنتتەر قازاقستان مەن رەسەي اراسىنداعى كوپجاقتى قاتىناستاردى نىعايتۋعا جانە ەۋرازيا كەڭىستىگىندەگى ينتەگراتسيالىق ۇدەرىستەردى ىلگەرىلەتۋگە قوس تاراپ تا بەيىلدى ەكەنىن راستادى.