دەنساۋلىق ساقتاۋ ءمينيسترى ەل ازاماتتارىن قىزىلشاعا قارسى قوسىمشا يممۋنداۋ شارالارىنا قاتىسۋعا شاقىردى. قازىرگى ۋاقىتتا قازاقستاندا, سونداي-اق الەمنىڭ كوپتەگەن ەلىندە قىزىلشا اۋرۋىنا قاتىستى قولايسىز ەپيدەميولوگيالىق جاعداي قالىپتاسىپ وتىر, دەپ حابارلايدى Egemen.kz.
ينفەكتسيا جۇقپالى, ول اۋا تامشىلارى ارقىلى تەز تارالادى. سوڭعى ەكى ايدا ەلىمىزدە سىرقاتتانۋشىلار سانى كۇرت ءوستى.
بيىل 13 مىڭنان استام ادام قىزىلشا جۇقتىرعان. ونىڭ 83%-ى بالالار, نەگىزىنەن 5 جاسقا دەيىنگىلەر. ولاردىڭ 70%-ى ەكپە الماعان. ناۋقاستاردىڭ اراسىندا ەكپە الماعان ەرەسەكتەر دە بار.
ينفەكتسيانىڭ تارالۋىنىڭ ارتۋى سالدارىنان قازاقستاندا قوسىمشا جاپپاي يممۋنداۋ جۇرگىزۋ تۋرالى شەشىم قابىلداندى.
ول قاڭتار ايىنىڭ سوڭىنا دەيىن جالعاسادى. ءمينيستردىڭ ايتۋىنشا, ۆاكتسينا جەتكىلىكتى.
«ۆاكتسينالاۋ مارتەبەسى جوق بالالارعا, ينفەكتسيا وشاقتارىندا بولعان ەرەسەكتەرگە ەكپە ەگەمىز. بارشاڭىزدى اۋرۋدان ساقتانۋ ءۇشىن ەمحاناعا شاقىرامىز», دەدى اجار عينيات.دەنساۋلىق ساقتاۋ ءمينيسترى ينفەكتسيالىق اۋرۋدىڭ سالدارىن دا نازارعا سالدى.
«بۇگىنگى تاڭدا قىزىلشا ۆيرۋسىنىڭ وزىنە ءتان ەمى جوق, سوندىقتان مۇنداي قاۋىپتى ينفەكتسيادان قۇتىلۋدىڭ جالعىز جولى ەكپە ەگۋ بولىپ وتىر. ۆاكتسينانىڭ وزىنەن قورىقپاۋ كەرەك, ول تەكسەرىلگەن. ءبىز ونى جىل سايىن ۇلتتىق ەگۋ كۇنتىزبەسىنە سايكەس قولدانامىز», دەپ تۇيىندەدى اجار عينيات.