وسىدان ءبىر اي بۇرىن الماتى قالاسىندا توپجارعان ەتنو-مادەني ورتالىعى ۇيىمداستىرعان قايىرىمدىلىق ءىس-شاراسىندا قازاقستاندا تۇڭعىش رەت تۇيە ۇستىندە وتىرىپ جامبى اتىپ, رەكورد ورناتقان ارۋجان ميراۆيلداەۆانىڭ جەتەكشىسى عابيت تاڭاتوۆپەن تىلدەسىپ, پىكىرىن بىلگەن ەدىك.
– «جامبى اتۋ» ۇلتتىق ويىنىمىزدا جىلقىمەن ونەر كورسەتىلەتىنىن بىلەمىز, ال تۇيە ۇستىندە وتىرىپ جامبى اتۋ دەگەندى بۇرىن-سوڭدى ەستىمەپپىز, مۇنداي يدەيا قالاي, قاشان تۋدى؟
– نەگىزى ءبىزدىڭ ۇلتىمىزدا «ۇيات بولادى», «بۇرىن ەشكىم ىستەمەگەن» دەگەن سەكىلدى كومپلەكستەر بار, الايدا, بۇرىن جاسالماعاندى جاساۋعا بولادى عوي. يدەيا باسىمىزعا وسىدان ەكى جىل بۇرىن كەلگەن. بىراق, ىڭعايى كەلمەدى, ناقتى ايتقاندا تۇيە تاپپادىق. سودان سوناۋ شىمكەنت جاقتاعى سوزاقتان ءۇش جاسار قازاقى ەكى تۇيە ساتىپ الدىق. ۇيرەتىلمەگەن اساۋ تۇيەنى ۇيرەتتىك, «بىلايشا ايتقاندا نولدەن باستادىق». ودان كەيىن تۇيە ۇرىكپەسىن دەپ اۋەلى شىبىقپەن-اعاشپەن ساداق اتىپ جاتقان سەكىلدى جاعدايلارعا تۇيەنى ۇيرەتىپ, سودان كەيىن عانا بارىپ, ساداقپەن اتۋدى باستادىق, جامبىنى جىلقى ۇستىندە ءوزىمىز دە اتىپ ءجۇرمىز عوي, ال تۇيەمەن سەكۋندىنا دەيىن ەسەپتەپ ارنايى جاتتىعىپ جۇردىك, ءۇش جارىم اي ۋاقىتىمىز كەتتى.
– رەكوردتىق ءىستى جۇزەگە اسىرۋداعى ماقساتىڭىز قانداي بولدى جانە وزگەشە رەكورد ورناتقان شاكىرتىڭىز تۋرالى ايتا كەتسەڭىز.
– الماتى قالاسى تۇرعىندارىنا تۇيە تاڭسىق, ونىڭ ۇستىنە ءبىر جاعىنان جاستاردى تاڭعالدىرۋ ءۇشىن, ال ەڭ باستىسى ۇلتتىق ويىنىمىزدى جاڭاشا مازمۇنمەن تولىقتىرۋ ماقساتىندا اتالعان ءىستى جۇزەگە اسىردىق. قازاقستاندا تۇڭعىش رەت تۇيەنىڭ ۇستىندە وتىرىپ 100 مەتردى 12 سەكۋندتا باعىندىرىپ, اراقاشىقتىعى 30 مەتر بولاتىن 3 نىسانانى كوزدەپ جامبى (ساداق) اتىپ, وسى جىلعى 4 قازاندا رەكورد ورناتقان ارۋجان امانگەلدىقىزى توپجارعان ەتنو-مادەني ورتالىعىندا جۇمىس ىستەيدى, قازىر جاسى 18-دە. ول 5 جاسىنان باستاپ ات قۇلاعىندا ويناپ وسكەن, جامبىل وبلىسىنا قاراستى مەركىنىڭ تۋماسى. الداعى ۋاقىتتا توپجارعان ەتنو-مادەني ورتالىعىنىڭ تىڭ جوسپارلارى بار, ۋاقىتى كەلگەندە جۇزەگە اسىرامىز دەگەن ويدامىز.