قىزىلوردا وبلىسىندا جىل باسىنان بەرى قىزىلشامەن اۋىرعان 709 ناۋقاس لابوراتوريالىق جولمەن انىقتالىپتى. جاعدايدىڭ كۇردەلەنىپ بارا جاتقانىن ايتىپ, دابىل قاققان دارىگەرلەر دەرەگىنشە, اۋرۋدىڭ 86 پايىزى 14 جاسقا دەيىنگى بالالاردىڭ بويىنان بايقالىپ وتىر. ماماندار, اسىرەسە ءالى جاسقا تولماعان 163 نارەستەنىڭ قىزىلشا جۇقتىرۋىنا قاتتى الاڭدايدى.
جۇقپالى اۋرۋعا شالدىققانداردىڭ كۇرت كوبەيۋىنە بايلانىستى وڭىرلىك شتاب قۇرىلىپتى. سونىمەن قاتار باس مەملەكەتتىك سانيتارلىق دارىگەردىڭ 1 قاراشاداعى №7 قاۋلىسىنا سايكەس 6 قاراشادان باستاپ 6-11 اي ارالىعىنداعى بالالارعا قىزىلشاعا, قىزامىققا جانە پاروتيتكە قارسى قوسىمشا جاپپاي ەكپە ەگۋ جوسپارلانىپ وتىر. تۇراقتى تىركەلمەگەن, قىزىلشاعا قارسى ەگىلۋ دەرەگى جوق ازاماتتار كەلىسىم بويىنشا ءبىر رەت يممۋندالادى. بۇرىن بۇل اۋرۋعا قارسى ەگىلمەگەن 55 جاسقا دەيىنگى مەديتسينا قىزمەتكەرلەرى دە ەكپە الىپ, حالىق اراسىندا اقپاراتتىق تۇسىندىرمە جۇرگىزىلەدى.
– وبلىستا ۆاكتسينادان باس تارتقان تۇرعىنداردىڭ ۇلەسى كوبەيىپ وتىر. جوسپارلى ەكپەنى الماي جۇرگەندەر دە از ەمەس. قازىر قىزىلوردا وبلىسى اۋرۋ كورسەتكىشىنەن رەسپۋبليكا بويىنشا التىنشى ورىندا تۇر. الدىن الۋ شارالارىن كۇشەيتپەسەك, جاعداي ءبىز ويلاعاننان دا قيىنداي ءتۇسۋى مۇمكىن, – دەيدى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ابدىقايىموۆا.
مامانداردىڭ ايتۋىنشا, جۇقپالى اۋرۋلار كورسەتكىشىنىڭ 4-5 جىل ارالاتىپ كوتەرىلىپ تۇراتىنى بار. قىزىلشاعا شالدىققانداردىڭ ارتۋى 2019 جىلى دا بايقالعان. ەڭ قاۋىپتىسى – قىزىلشانىڭ پنەۆمونيا, برونحيت, ەنتسەفاليت سەكىلدى اۋرۋلاردى اسقىندىرىپ جىبەرەتىنى. سوندىقتان ەڭ دۇرىسى – ەكپە الۋ.
– اۋرۋ جۇقتىرعاندار اراسىندا ەكى جارىم ايلىق سابيلەر دە بار. نەگىزى بالا جاسقا دەيىن يممۋنيتەتتى انا سۇتىنەن الىپ, قىزىلشامەن اۋىرماۋى كەرەك. سۇراستىرا كەلسەك, بۇل نارەستەلەردىڭ انالارى كەزىندە وسى جۇقپالى اۋرۋعا قارسى ەگىلمەگەنى انىقتالىپ وتىر. وسى كۇنى وبلىس بويىنشا 330 توسەكتىك ورىن ازىرلەندى. ونىڭ ىشىندە 20 توسەكتىك جانساقتاۋ ءبولىمى بار. اۋدانداعىلاردىڭ جاعدايى اۋىرلاي قالسا, ساناۆياتسيا ارقىلى كومەك كورسەتىلەدى, – دەيدى وبلىستىق جۇقپالى اۋرۋلار اۋرۋحاناسىنىڭ باس دارىگەرى اينا مۇحامبەتوۆا.
بيىلعى 5 جەلتوقساننان باستاپ قوسىمشا يممۋنداۋدىڭ ەكىنشى تولقىنى باستالادى دەگەن قاۋىپ بار. بۇل رەتتە 2-4 جاستاعى بالالار قامتىلماق. ويتكەنى دارىگەرلەردىڭ ايتۋىنشا, ىندەت جۇقتىرعانداردىڭ قاتارىن وسى جاستاعىلار كوبەيتىپ وتىر.
كوروناۆيرۋس پاندەمياسى كەزىندە قىزىلشا مەن قىزامىققا قارسى ەكپەگە دە سەنبەستىك تانىتىپ, سالدىرماعاندار كوپ بولعان ەدى. سونىڭ زاردابىن ەندى تارتىپ وتىرمىز.
قىزىلوردا