بيىكتىك! تابىلدى دوسىموۆتىڭ «بيىكتىگى» گيتارانىڭ شەگىنە ءتۇسىپ, ءان بولىپ العاش شىرقالعان ساتتەن باستاپ تىڭداعان جاننىڭ كەۋدەسىندە اياۋلى ءبىر بەلگىدەي جاتتالىپ قالدى. سودان بەرى تابىلدىنى تانيتىن جۇرت ءۇشىن «بيىكتىك» ۇعىمى, تەك تابىلدىنى ەسكە تۇسىرەدى. زەڭگىر كوك اسپاندى, تاۋدى ءومىرى كورمەگەن, تابانى تيمەگەن اتىراۋدى, تاۋلارى جوق توبەلەردى ەلەستەتەدى. اۋەزدى ءانى ىشتەن ىڭىلداپ شىعىپ, الدەبىر جاقتان تابىلدىنىڭ داۋسى ەستىلەدى.
سول «بيىكتىكتى» ساحنادان تاعى دا تىڭدادىق. ەلوردانىڭ تورىندە ۇلتتىق اكادەميالىق كىتاپحانادا تابىلدىنىڭ تاعى ءبىر سازدى كەشى ءوتتى. قاراشانىڭ قاراسۇر كەشىندە تابىلدى اندەرىن تىڭداۋعا اعىلدىق. كورمەدەگى سۋرەتتەرىنە, ساحناداعى قوڭىر گيتاراسىن ۇستاعان اسىل بەينەسىنە قاراپ, ءوزىن كورگەندەي, ءوز داۋسىن ەستىگەندەي ەلىتتىك. ءۇش ساعات بويى تالانتتى تۇلعانىڭ اندەرى ايتىلدى. سوناۋ جىلداردان بەرى گيتارا تارتقان اركىم دە تابىلدىعا ەلىكتەپ, تابىلدىشا تەبىرەنىپ شىرقاعىسى كەلەتىنى اقيقات. بۇل كەشتە دە بارد اقىننىڭ ىزىنەن ەرگەن جاس تالانتتار ساحناعا شىقتى. زامانداس قۇرداستارى دا قولىنا گيتارا الدى, ەستەن كەتپەس ەسكى جىلدارداعى ىستىق ەستەلىكتەرىمەن ءبولىستى. اقىننىڭ ءوزى ايتقانداي:
«ويانباي قالام, بۇل شىندىق,
ۇرىسپا قارعام,
شولمەك-تىرلىكتىڭ بەلگىلى
قۇلاي سىنارى...
گيتارامدى الىپ ەلەۋسىز
بۇرىشتا قالعان,
باۋىرىڭا باسىپ ەگىلىپ,
جىلايسىڭ ءالى...»
دەپ, ءدال سولاي بۇرىشتا قالعان گيتاراسىن الىپ, بىرىنەن كەيىن ءبىرى توگىلگەن اندەرىنە جىلاپ تا وتىرمىز. ءار ءانى ءبىر تاريح, ءبىر وقيعا. ءار ءانى سىرىن شاعىپ, مۇڭىن ايتادى. ءار ءانى ءومىردىڭ ەلەۋسىز ءبىر شىندىعىن, جالعاندىعىن, وتكىنشىلىگىن جىرلايدى. سوزدەرى دە قوڭىر اۋەنمەن قوسىلا سىزداپ, توكپەلەي جونەلەدى. ءدال ءبىر جاستىق شاعىڭنىڭ كۋاسىندەي, اياۋلى ءساتىڭنىڭ ءانۇرانىنداي, سەنىڭ تاعدىر-سىرىڭدى ءان قىلىپ تۇرعانداي ۇزىلەدى كەلىپ.
اڭىزعا بەرگىسىز عۇمىر كەشكەن تابىلدىنىڭ اندەرى قانشاما جۇرەكتى تەربەدى! تالاي ادام وعان ۇقساپ, قىر بالاسى اتاندى – تاۋعا قۇمارتقان جوق. تالاي جاس تابىلدىدان كەيىن قولىنا العاش رەت گيتارا الىپ, يمەنە تارتىپ, «الماتىدا قالعان قىزدى» ۇيرەندى. تالاي جاس تۋعان كۇندەردە تابىلدىنىڭ اندەرىن تابىلدى ماقامىمەن شىرقاپ باقتى. تالاي جىگىت سۇيگەنىنە سول اندەردى ايتىپ, سىرلاسقان بولار. تالاي ادام وعان ۇقساپ, ولىمنەن قورىقپاۋعا تىرىستى. تاۋسىز جەردە تۋعان تالانتتى جاننىڭ ءبىر اتى – بيىكتىك, ەكىنشى اتى تاۋ بولدى. وسى ەكى ۇعىم قازاق ونەرىندە تابىلدى جىرى ارقىلى ليريكالىق مانگە ۇلاستى.
ەرەك تالانتتى ەسكە الۋعا ارنالعان «بيىكتىك» اتتى ادەبي-سازدى كەشكە اقىننىڭ جارى قارلىعاش يباتوۆا, ۇلى ابىل دوسىموۆ, بىرگە ءجۇرىپ, بىتە قايناسقان باۋىرجان وماروۆ, ارمان سقابىل ۇلى, ەلەنا ابدىحالىقوۆا باستاعان دوستارى, ءماجىلىس دەپۋتاتى جاناربەك ءاشىمجان, باۋىرجان باباجان ۇلى, داۋلەتكەرەي كاپ ۇلى قوستاعان اقىندار, «تابىلدى دوسىموۆ اتىنداعى قوردىڭ» جەتەكشىسى بيجان قالماعانبەتوۆ, زيالى قاۋىم وكىلدەرى مەن شاكىرتتەرى قاتىستى. مادەني ءىس-شارا تابىلدى دوسىموۆتىڭ ءومىرى مەن شىعارماشىلىعىنا ارنالعان بەينەروليكپەن اشىلدى. كەشتە اقىننىڭ ء«ىز تاستاپ اققان ءبىر جۇلدىز....» كىتابىنىڭ تۇساۋى كەسىلدى. جيناقتا بارد اقىننىڭ ولەڭدەرى مەن ول جايىندا ەستەلىكتەر توپتاستىرىلعان.
سونداي-اق اتىراۋدان, ماڭعىستاۋدان, اقتوبەدەن, الماتىدان ارنايى كەلگەن تالانتتى انشىلەر اقىن-سازگەردىڭ شىعارمالارىن ورىندادى, اڭىز-اقىنعا ارنالعان ولەڭدەرىن وقىدى.
بارد اقىننىڭ ۋنيۆەرسيتەتتە بىرگە وقىعان دوسى, بەلگىلى تەلەجۋرناليست ارمان سقابىل ۇلى سول جىلدارداعى ىستىق ەستەلىگىن باياندادى.
«باعانادان بەرى تەك ءان تىڭداپ, باسقا ءبىر الەمگە ەنىپ كەتكەندەي بولدىق. تابىلدى ەكەۋمىز, الدىمەن كۋرستاس بولدىق. كەيىن ارامىزدان قىل وتپەيتىن دوس بولدىق. جاڭا ورىندالىپ جاتقان «بيىكتىك» دەگەن ءان ءبىزدىڭ نارىنقولعا بارعان كەزدە حانتاڭىرىنە تامسانعاننان تۋعان ەدى. سول ەكى كۇننىڭ ىشىندە قازىر قىر بالاسىنىڭ گيمنىنە اينالىپ كەتكەن ءاندى شىعاردى. العاشقى نۇسقاسىندا ء«بىزدىڭ جاقتا ءجۇرىپ قايتسا ءبىر جازداي, تۇماعاڭدار كەتەر ەدى جىر جازباي» دەگەن جولدارى بولعان. كەيىن «تۇماعاڭدا نەڭ بار؟» دەپ وزگەرتكىزدىك. جالپى, تابىلدىنىڭ ساحناسى – جاستار, ستۋدەنتتەردىڭ تۋعان كۇنى بولاتىن. تابىلدىنىڭ سول ءوزى وقىعان جىلدارى بۇكىل قازۇۋ-دىڭ گيمنىنە اينالعان «قىپشا بەلىڭ-اي» دەگەن ءان بولدى. كەيىن ول «استانانىڭ ارۋى» اتالىپ كەتتى. جاتاقحانا بالكونىنان تابىلدى ءان ايتقاندا, كورشى تاريح, فيلولوگيا, بيولوگيا فاكۋلتەتتەرىنىڭ قىز-جىگىتتەرى تەگىس بالكونعا شىعىپ, تىڭداپ وتىراتىن. تابىلدى ءانىن ايتىپ بولسا, تاعى سۇرايتىن. وسىلاي وتىرىپ تابىلدى شاعىن كونتسەرت بەرەتىن», دەيدى اقىننىڭ دوسى.
بۇدان بولەك ادەبيەتشى عالىم باۋىرجان وماروۆ, ءماجىلىس دەپۋتاتى جاناربەك ءاشىمجان, ءانشى-كومپوزيتور ەلەنا ابدىحالىقوۆا, «Túrkistan» گازەتىنىڭ باس رەداكتورى باۋىرجان باباجان ۇلى ورتاعا شىعىپ, تابىلدىنىڭ ءومىرى مەن شىعارماشىلىعى حاقىندا ءوز ەستەلىكتەرىمەن ءبولىستى.
مۋزىكالىق كەش سوڭىندا اقىننىڭ تۇياعى ابىل تابىلدى ۇلى اۋلەت اتىنان جينالعاندارعا ريزاشىلىعىن ءبىلدىرىپ, كەلگەن كوپشىلىككە اكەسىنىڭ ءانىن ورىنداپ بەردى.
P.S.: سول كۇنى ميدا تەك تابىلدىڭ ءانى ويناپ تۇردى. كەش ءبىتىپ, كۇزدىڭ كەشكى سالقىنىن سەزسەك تە ميداعى اۋەن توقتامادى. استانا كوشەلەرىندەگى كەپتەلىس تە بىلىنبەدى – سانادا تابىلدىڭ ءانى. ۇيقىعا دا قىردا ءجۇرىپ كەتكەندەيمىز, تۇسىمىزدە دە اسپانعا قول سوزىپ تۇرعاندايمىز. ءتۇۋ الىستا تاۋلار اعاراڭدايدى.