ەل ىشىندەگى دەنساۋلىق ساقتاۋ مەكەمەلەرىنىڭ جۇمىسىن جانداندىرۋ ايرىقشا ماڭىزدى. اۋدان ورتالىعى ستەپنياك قالاسىندا ءبىر مەزگىلدە 200 ادام ەم قابىلدايتىن اۋرۋحانا سالىنىپ جاتىر. ەلدى مەكەندەردە دە وسى سالاعا قاتىستى جاعىمدى جاڭالىق از ەمەس.
جاڭا اۋرۋحانانىڭ بار جۇمىسى كەلەسى جىلى تولىق اياقتالماق. مىنە, سول كەزدە باسى اۋىرىپ, بالتىرى سىزداعان اۋدان تۇرعىندارى ات ارىتىپ الىسقا بارماي-اق, ەم-دوم قابىلداي الادى.
– اۋدانداعى ەلدى مەكەندەردىڭ فەلدشەرلىك-اكۋشەرلىك پۋنكتەرىنىڭ جۇمىسىن بۇگىنگىنىڭ تالابىنا ساي ۇيلەستىرۋ كوزدەلىپ وتىر. ماسەلەن, اڭدىقوجا باتىر اۋىلىندا فەلدشەرلىك-اكۋشەرلىك پۋنكت سالىنادى. جەرگىلىكتى كاسىپكەرلەر دە بۇل ماسەلەگە جەتكىلىكتى كوڭىل ءبولىپ جاتىر. تاياۋدا ەكى زاماناۋي جەدەل جاردەم كولىگىن ساتىپ اپەردى, – دەيدى اۋدان اكىمى دوستانبەك ەسجانوۆ.
سالانىڭ سەرپىندى جۇمىس ىستەۋىنە مەديتسينا كادرلارىنىڭ جەتىسپەۋشىلىگى اسەرىن تيگىزىپ كەلگەن ەدى. الداعى ۋاقىتتا كادر ماسەلەسى بىرتىندەپ شەشىلمەك. اۋدان اكىمىنىڭ گرانتى بويىنشا ەلىمىزدىڭ مەديتسينالىق جوعارى وقۋ ورىندارىندا 9 ستۋدەنت وقىپ, ءبىلىم الىپ جاتىر. دەمەك تاياۋ جىلدارى بۇل ماسەلە تۇبەگەيلى شەشىمىن تاپپاق.
اۋداننىڭ الەۋمەتتىك-تۇرمىستىق جاعدايى دا كوپ-كورىم جاقسارىپ كەلەدى. اۋدان اكىمىنىڭ ايتۋىنا قاراعاندا, وسى جىلى 2 800 شارشى مەتر تۇرعىن ءۇي پايدالانۋعا بەرىلگەن. بۇل ورايداعى جوسپار اسىرا ورىندالعان. قازىرگى كۇنى ستەپنياك قالاسىندا 21 پاتەرلى تۇرعىن ءۇيدىڭ قۇرىلىسى جۇرگىزىلىپ جاتىر. اۋدانداعى كوپپاتەرلى ۇيلەردى جوندەۋ 14 جوبا بويىنشا جۇزەگە اسىرىلىپ جاتىر. حالىقتى ساپالى سۋمەن قامتاماسىز ەتۋدە دە اتاپ ايتارلىقتاي وزگەرىس بار. ماسەلەن, بايمىرزا اۋىلىنىڭ تۇرعىندارىن اۋىز سۋمەن جابدىقتاۋ جەلىلەرىنە جوندەۋ جۇمىستارى جۇرگىزىلدى. سونداي-اق زاوزەرنوە ەلدى مەكەنىندەگى سۋ قۇبىرلارىن جاڭعىرتۋ جوسپارلانىپ وتىر. 7 ەلدى مەكەندە سۋ بەرۋ قۇرىلعىلارى ورناتىلعان. جىل سوڭىنا دەيىن 40 شاقىرىمدىق جول جوندەلمەك.
– قازىر ششۋچينسك – ستەپنياك باعىتىنداعى تاسجولدىڭ جوندەۋ جۇمىستارى جۇرگىزىلىپ جاتىر. بايمىرزا اۋىلىندا – 8, كەڭاششى اۋىلىندا 5 شاقىرىمدىق جول سالىنۋدا, – دەيدى اۋدان اكىمى.
اباتتاندىرۋ جۇمىسى دا مۇقيات قولعا الىنعان. ستەپنياكتاعى ءبىرجان سال مەن چاپاەۆ كوشەلەرىنىڭ بويى اباتتاندىرىلىپ, تازارتىلدى. اۋدان ورتالىعىنداعى ىلكىمدى ءىس اۋىلداردا دا كورىنىس تاپقان. اڭعال باتىر مەن بايمىرزا اۋىلدارىندا سپورت الاڭدارى سالىنىپ, كەڭاششى اۋىلىندا فۋتبول الاڭى پايدالانۋعا بەرىلدى. اۋىل تۇرعىندارىنىڭ سالاماتتى ءومىر سالتىن ساقتاۋىنا مەيلىنشە قولايلى جاعداي تۋعىزىلىپ وتىر. اتاپ ايتاتىن بولساق, زاۋرالوۆكا جانە قۇدىقاعاش اۋىلدارىندا زاماناۋي سپورت الاڭدارى سالىنىپ جاتىر. كەلەسى جىلى تاسشالقار, ءبىرسۋات, ساۋلە, قوعام, ماقپال اۋىلدارىندا وسىنداي الاڭدار سالىنادى. ءبىر سوزبەن ايتقاندا, ءبىرجان سال اۋدانىنىڭ بەرەكەسى كىرىپ-اق كەلەدى.
اقمولا وبلىسى,
ءبىرجان سال اۋدانى