شىعىس قازاقستان وبلىسىندا قاناتقاقتى رەجىمدە اۋدان اكىمدەرىنىڭ سايلاۋى باستالدى. جەكسەنبى كۇنى تاڭ بوزىنان گلۋبوكوە مەن التاي اۋداندارىنىڭ سايلاۋ ۋچاسكەلەرىنىڭ ەسىكتەرى ايقارا اشىلىپ, سايلاۋشىلاردى قارسى الۋعا دايىندىقتى باستاپ كەتتى.
ادەتتەگىدەي تاڭەرتەڭ ەلىمىزدىڭ ءانۇرانى ورىندالدى. اۋدان تۇرعىندارى ءوز اكىمدەرىن وزدەرى تۇڭعىش رەت سايلاپ تۇر. سوندىقتان دا بارلىعى دەرلىك جاۋاپكەرشىلىك تانىتۋعا تىرىستى.
– ءبىزدىڭ اۋدان وسى سايلاۋعا قاتىساتىن 45 قاناتقاقتى ءوڭىردىڭ قاتارىندا ەكەنىن بىلگەن بويدا دايىندىقتى باستادىق. بۇل – وتە ماڭىزدى جوبا. ول قوعامدى دەموكراتيالاندىرۋ جولىنداعى پروگرەسسيۆتى وزگەرىستەردى جانە «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدى كورسەتەدى. بۇگىندە 44 سايلاۋ ۋچاسكەمىزدىڭ بارلىعى دەر كەزىندە اشىلدى, جۇمىس جوسپارعا ساي ءجۇرىپ جاتىر. ءبىزدىڭ ازاماتتار بۇل كۇندى اسىعا كۇتتى, داۋىس بەرۋگە بەلسەندى قاتىسىپ جاتىر, – دەدى گلۋبوكوە اۋدانىنىڭ اۋماقتىق سايلاۋ كوميسسياسىنىڭ توراعاسى كساننا سارىچەۆا.
گلۋبوكوە اۋدانىندا بارلىعى 39,5 مىڭنان استام سايلاۋشى تىركەلگەن. ەسكە سالا كەتەيىك, مەملەكەت باسشىسى بيىلعى قىركۇيەكتەگى قازاقستان حالقىنا جولداۋىندا اۋدان, وبلىستىق ماڭىزى بار قالا اكىمدەرىن تىكەلەي سايلاۋ ەنگىزىلەتىنىن مالىمدەگەن بولاتىن.
التاي قالاسىنداعى مەكتەپ-ليتسەي بازاسىندا ورنالاسقان №636 سايلاۋ ۋچاسكەسىندە دە تاڭنان بەرى سايلاۋ ناۋقانى قىزۋ ءجۇرىپ جاتىر.
– جاڭا اكىمنىڭ جاستارعا كوبىرەك كوڭىل بولگەنىن قالايمىن. قالامىز بەن اۋدانىمىزدى وركەندەتسە ەكەن دەيمىز, – دەيدى اعىلشىن ءتىلى ءپانىنىڭ مۇعالىمى انەل ساپارعاليەۆا.
سونىمەن قاتار №636 سايلاۋ ۋچاسكەسىندە العاشقىلاردىڭ ءبىرى بولىپ جەرگىلىكتى كەن بايىتۋ زاۋىتىنىڭ جۇمىسشىلارى يسلام مارتسەنيۋك پەن الەكساندر تروشكوۆ ءوز تاڭداۋىن جاسادى. ولار مۇنداي فورماتتا العاش رەت وتكىزىلىپ وتىرعان سايلاۋ ۇلكەن ءۇمىت بەرەتىنىنە سەنىم ءبىلدىردى.
شىعىس قازاقستان وبلىسى