«الاڭداۋشىلىق تۋعىزىپ وتىر»: ەكى وڭىردە قىزىلشا اۋرۋى ءورشىپ تۇر

اعىمداعى جاعداي تۋرالى قر دەنساۋلىق ساقتاۋ ءمينيسترىنىڭ ورىنباسارى – قر باس مەملەكەتتىك سانيتارلىق دارىگەرى ايجان ەسماعامبەتوۆا باياندادى. ونىڭ مالىمدەۋىنشە, بۇگىندە ا گەپاتيتى مەن قىزىلشا اۋرۋىنىڭ كوبەيۋى الاڭداۋشىلىق تۋعىزىپ وتىر. ءتيىستى ۆاكتسينا سالدىرماي دەرتكە دۋشار بولعاندار قاتارى كوپ. ماسەلەن, قىزىلشا ەلدىڭ بارلىق ايماقتارىندا تىركەلگەن. اۋرۋدى ەڭ كوپ جۇقتىرعاندار شىمكەنت پەن الماتىدا انىقتالدى.

«وسى رەتتە جەرگىلىكتى اتقارۋشى ورگاندار مەن استانا, الماتى جانە شىمكەنت قالالارىندا قىزىلشاعا قارسى قوسىمشا جاپپاي ەكپە سالۋ ناۋقانىنا دايىندىق شارالارىن قولعا العان ءجون», دەدى ا.ەسماعامبەتوۆا.

ۆيتسە-پرەمەر تامارا دۇيسەنوۆا بۇعان دەرتتىڭ قاۋىپتىلىگى تۋرالى حالىقتىڭ اقپاراتتاندىرىلماۋى سەبەپ بولۋى مۇمكىن ەكەنىن اتاپ ءوتتى.

«ازاماتتاردىڭ ەكپەدەن باس تارتۋى, جۇرگىزىلگەن ناسيحات جۇمىستارىنىڭ ناشار ەكەنىن اڭعارتادى. ادام وزىنە ءوزى جاۋ ەمەس. قاۋىپتىڭ بارىن بىلسە, ءوزىن قورعاۋ شارالارىن قولدانادى. دەنساۋلىق ساقتاۋ مينيسترلىگى جەرگىلىكتى اكىمدىكتەرمەن بىرلەسە وتىرىپ, بۇل باعىتتاعى جۇمىستى كۇشەيتۋى كەرەك», دەپ تاپسىردى تامارا دۇيسەنوۆا.

سونداي-اق جيىندا ەلدەگى دەنساۋلىق ساقتاۋ مەكەمەلەرىندە بولعان تەكسەرۋ جۇمىستارىنىڭ ناتيجەلەرى تۋرالى دا ايتىلدى. بىرقاتار نىسانداردا اۋرۋحاناىشىلىك ينفەكتسيالاردىڭ الدىن الۋعا قاتىستى جەكەلەگەن تالاپتاردىڭ ساقتالماعانى انىقتالعان. ءبىرازىندا زارارسىزداندىرۋ رەجيمى ساقتالماعان, كەيبىرىندە قاراپايىم جەكە قورعانىش زاتتارىنىڭ جەتىسپەۋشىلىگى انىقتالدى.

«دەنساۋلىق ساقتاۋ مەكەمەلەرى ۋاقتىلى قارجىلاندىرىلىپ كەلەدى. ولاي بولسا, مىسالى جەكە قورعانىش قۇرالدارى جەتىسپەۋشىلىگى نەدەن تۋىندادى؟ ءبىزدىڭ ماقسات جازالاۋ ەمەس, وسى ماسەلەلەردى شەشۋ جولدارىن قاراستىرۋ. دەگەنمەن شارا قولدانۋعا وزدەرىڭىز يتەرمەلەيسىزدەر», دەپ اتاپ ءوتتى پرەمەر-ءمينيستردىڭ ورىنباسارى.

سونىمەن قاتار تامارا دۇيسەنوۆا ماسەلە شەشىلمەگەن جاعدايدا كەيبىر دەنساۋلىق ساقتاۋ نىساندارىنىڭ قىزمەتىن ۋاقىتشا توقتاتا تۇرۋ ماسەلەسىن قاراستىرۋ كەرەك ەكەنىن ەسكەرتتى.