باتىس قازاقستان وبلىسىندا سوڭعى ۋاقىتتا گاز تاپشى بولا باستادى. كولىگى سۇيىتىلعان وتىنمەن جۇرەتىن ورالدىقتار جانارماي بەكەتىندە ساعاتتاپ كەزەك كۇتۋگە ءماجبۇر.
باتىس قازاقستان وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ دەرەگىنشە, وڭىردەگى گاز تاپشىلىعى اتىراۋ مۇناي وڭدەۋ زاۋىتى كۇردەلى جوندەۋگە جابىلعان سوڭ قالىپتاسقان. بيىلعى 1 قازان مەن 3 قاراشا ارالىعىندا اتىراۋ زاۋىتى جۇمىسىن توقتاتقاندىقتان, باتىس قازاقستان وبلىسىنا قاجەتتى 3240 توننا سۇيىق وتىن «سنپس-اقتوبەمۇنايگاز» كومپانياسىنان بولىنگەن.
– 1 قاراشا كۇنگى مالىمەت بويىنشا اقتوبەدەن بولىنگەن سۇيىق وتىن تولىق كولەمدە تەمىرجول بوشكەلەرىنە تيەلىپ, ورالعا اتتاندىرىلعان. ەكى اراداعى ىركىلىس جۇكتىڭ تۇزتوبە (سول-يلەتسك) ستانساسىندا تۇرىپ قالۋىنا بايلانىستى بولىپ تۇر. ولاردى ورالعا جەتكىزەتىن تەپلوۆوز بولماي قالعان. باتىس قازاقستان وبلىسى اكىمدىگى, «قازاقستان تەمىر جولى» ۇلتتىق كومپانياسى جانە ەنەرگەتيكا مينيسترلىگى سۇيىق وتىندى ورالعا كىدىرتپەي جەتكىزۋ ءۇشىن كۇندەلىكتى ارەكەت ەتۋدە. سونىڭ ناتيجەسىندە, قازىر كىدىرىس جويىلدى. قازان ايىنىڭ 31-ىندە تيەلگەن 5 ۆاگون باتىس قازاقستان وبلىسىنا بۇگىن جەتۋى كەرەك, – دەپ ءتۇسىندىردى بىزگە باتىس قازاقستان وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى ميرجان نۇرتازيەۆ. بۇل اڭگىمە 1 قاراشا كۇنى بولدى.
باسقارمانىڭ مالىمەتىنشە, 30 قازان كۇنى اتىراۋ مۇناي وڭدەۋ زاۋىتى جۇمىسىنا قايتا كىرىسىپ, باتىس قازاقستان وبلىسىنا قاجەتتى سۇيىق وتىندى بەرە باستاعان. قاراشا ايىندا وبلىسقا بارلىعى 3522 توننا سۇيىق وتىن بولىنگەن.
«وڭىردە قازىر 400 توننا سۇيىتىلعان وتىن قورى بار. بۇل 3 كۇنگە ەسەپتەلگەن. ال وبلىستىڭ ايلىق تۇتىنۋ كولەمى – 4,0 مىڭ توننا». بۇل – باسقارما بەرگەن سوڭعى اقپارات.
جانارماي قۇيۋ بەكەتتەرىندە قازىر سۇيىق وتىننىڭ باعاسى ليترىنە 64 تەڭگەدەن ساتىلىپ جاتىر. بىراق گاز تاپشىلىعى, ۇزىن سونار كەزەك ازىرگە ءالى دە بار. ء«بىزدى WhatsApp جەلىسىندەگى «گاز قايدا بار؟» اتتى توپ قۇتقارىپ تۇر. كولىگى گازبەن جۇرەتىن جۇرگىزۋشىلەر قاجەتتى سوڭعى اقپاراتتى وسى جەردە ءبولىسىپ وتىرامىز», دەيدى ورالدىق ەركىن قارين.