كەلەسى جىلدان باستاپ زاڭ قازاق تىلىندە جازىلادى

ءماجىلىس دەپۋتاتى ابزال قۇسپان بۇعان دەيىن دە قازاقستاندا زاڭدار ورىسشا جازىلىپ, قازاق تىلىنە اۋدارىلاتىنىن ساۋالدارىندا بىرنەشە رەت ايتقان.

«بۇگىن ءماجىلىس كوميتەتىندە وتىرىستى جۇرگىزگەن دەپۋتات ءۇنزيلا شاپاققىزى بۇل ماسەلە بويىنشا ۇكىمەتكە ساۋال جولدادى. ءبارىمىز قولدادىق. سودان كەيىن ۇكىمەتتىڭ اتىنان ۆيتسە-پرەمەردىڭ قولى قويىلعان قاعاز كەلدى. وندا «2024 جىلدان باستاپ زاڭدار قازاق تىلىندە دايىندالادى» دەپ جازىلعان. بىراق ۆيتسە-پرەمەر التاي كولگىنوۆ قىزمەتىنەن كەتتى. الايدا ول كەتكەنىمەن, ۇكىمەت ورنىندا عوي. سوندىقتان ولاردىڭ ۋادەلەرىنە سەنىپ وتىرمىز», دەدى ابزال قۇسپان. 

سونداي-اق دەپۋتات ەكى زاڭدى قازاق تىلىندە جازىپ جاتقانىن اتاپ ءوتتى.

«مىسالى, مەن 2 زاڭ جوباسىن دايىنداپ جاتىرمىن. ونىڭ اتتارىن ايتا المايمىن. بىراق ولاردى قازاق تىلىندە دايىنداپ جاتىرمىن. زاڭ شىعارۋ باستاماسى دەپۋتاتتاردىڭ دا قولىندا بار. بىراق بىزدە نەگىزىنەن ۇكىمەت (زاڭدى) دايىندايدى. ەندى 2024 جىلدىڭ 1 قاڭتارىنان باستاپ كورەمىز. وسى ماسەلەگە قايتا ورالامىز», دەدى ابزال قۇسپان.

دەپۋتات حاتتا زاڭدار 2024 جىلدان باستاپ مەملەكەتتىك تىلدە جازىلادى دەپ كورسەتىلگەنىن ايتتى.

«حاتتا التاي كولگىنوۆتىڭ قولى قويىلعان. ادام اۋىسقانىمەن, ۇكىمەت قول قويدى عوي. مۇنى ۇكىمەتتىڭ پوزيتسياسى دەپ تۇسىنەمىز. ۇكىمەت ۋادەسىندە تۇرا ما, تۇرماي ما, بۇل – كەلەر جىلدىڭ ەنشىسىندەگى شارۋا», دەدى ول.