بۇگىن عانا قاراعاندىعا ارنايى بارىپ, جاعدايدى كوزبەن كورىپ قايتتىم. ءبىراز مارقۇمدى مەشىتتە جانە شىركەۋدە جانازاسىن شىعارىپ, ارۋلاپ شىعارىپ سالدىق. ول جەردەگى تۋىستارىنىڭ جاعدايىن كورگەندە جۇرەگىڭ اۋىرادى.
بىرەۋدىڭ وتباسىن اسىراپ وتىرعان وتاعاسى, بىرەۋدىڭ جالعىز بالاسى اياق استى قاتەردەن و دۇنيەلىك بولدى. ءبارىنىڭ وتباسى مەن تۋىستارىنا قايعىرىپ كوڭىل ايتامىز. اۋرۋحانادا ەم الىپ جاتقان ادامداردىڭ تەزىرەك ساۋىعىپ, اياقتارىنان تىك تۇرىپ كەتۋىنە تىلەكتەسپىز.
اپات بولعاننان كەيىن پرەزيدەنت «ارسەلورميتتال تەمىرتاۋ» كومپانياسىنا قاتىستى ۇكىمەتكە تاپسىرما بەردى. قازىرگى كۇنى بۇل مەكەمەگە 8 شاحتا جانە قۇرىش بالقىتۋ زاۋىتى قارايدى. ەندى ولاردىڭ جاعدايى قالاي بولادى؟ جۇمىسشىلارى دالادا قالماي ما دەگەن قاۋىپ ايتىلىپ جاتىر. مەملەكەت ەشكىمدى دالادا قالدىرمايدى. بۇعان ەشكىم الاڭداماسىن. قوردالانعان بارلىق ماسەلە شەشىمىن تابادى. ەڭ باستىسى, زارداپ شەككەن ادامداردىڭ وتباسىلارىنا ءتيىستى جاردەم بەرىلۋگە ءتيىس. مەملەكەت تاراپىنان دا, كومپانيا تاراپىنان دا جاردەم بولادى. سونىمەن قاتار ۇكىمەت ءتيىستى قاۋلى قابىلداپ, كادر ماسەلەسىن شەشىپ, قاۋىپسىزدىكتى ارتتىرۋعا باعىتتالعان شارالاردى قولعا الۋى كەرەك.
ەلىمىزدە جۇمىس ىستەپ جاتقان وسىنداي ءىرى جەكەمەنشىك كومپانيالارعا قاتىستى زاڭدارعا وزگەرىستەر ەنگىزىلۋى قاجەت دەپ سانايمىن. ءاۋ باستا ولارعا كوپ ەركىندىك بەرىلىپ قويدى. سونىڭ سالدارىنان جۇمىسشىلاردىڭ جاعدايىنا سالعىرت قاراۋ باسىم بولدى. سالدارى – كوز الدىمىزدا. ولار ءوز جۇمىسشىلارىنىڭ بارلىق جاعدايىن جاساۋى قاجەت. جالاقىسىنان بولەك, قاۋىپسىزدىگى, الەۋمەتتىك كومەگى, ەم-دومى, تاماعىنا دەيىن بارلىق قاجەتتىلىكتەرىن ويلاستىرۋعا ءتيىس.
ال كەشەگى اپاتقا جول بەرگەن بارلىق لاۋازىمدى تۇلعا جاۋاپقا تارتىلۋى كەرەك. مۇنى قازىر قوعام دا كۇتىپ وتىر. ەگەر ءتيىستى جازا بولماسا, وسىنداي قايعىلى جاعدايلار جالعاسا بەرەدى. مەيلى ول شەتەلدىك, مەيلى ءوز ازاماتىمىز بولسىن, زاڭعا ساي جازاسىن الادى. ءىس قوزعالدى. ەندى ناتيجەسىن كۇتەمىز.
قۇدايبەرگەن بەكسۇلتانوۆ,
ءماجىلىس دەپۋتاتى