كوستەنكوداعى وقيعا ءبىر كۇندە بولا قويعان اپات ەمەس قوي. تەحنيكالار سىر بەردى مە, قاۋىپسىزدىك شارالارى ەسكەرىلمەدى مە, ول جاعى ءالى تەكسەرىلەدى, انىقتالادى.
ءبىز شاحتادا ەڭبەك ەتكەن جىلدارى قاۋىپسىزدىك شارالارى قاتاڭ باقىلاناتىن. شاحتانى, ءاربىر ۋچاسكەنى بىرنەشە مامان تەكسەرەتىن. جۇمىس باستالعاننان اياقتالعانعا دەيىن ديسپەتچەرلەر قاۋىپسىزدىكتى باقىلاپ وتىراتىن. كەن سالاسىنداعى كومپانيالار ەڭ ءبىرىنشى كەزەكتە جۇمىسشىلاردى ويلاۋى كەرەك ەمەس پە؟ جاۋاپتى ماماندار ۋچاسكەلەردى تىڭعىلىقتى تەكسەرەتىن. قاتال قارايتىن. ودان بەرىگە دەيىن قانشاما وزگەرىس بولىپ جاتىر عوي. ءبىرىن بىلسەك, ءبىرىن بىلە بەرمەيمىز. بىراق بەرىدە ەلدەگى بىرنەشە شاحتادا جارىلىس بولدى. ال بۇرىن اپاتتى جاعدايلار سيرەك بولاتىن. قازىر كوبەيىپ كەتتى. قانشاما كەنشىنىڭ وتباسى قارا جامىلىپ وتىر. جاقسى ەمەس. قايعىلى وقيعا كومپانيانىڭ كوستەنكوداعى جۇمىسشىلاردىڭ قاۋىپسىزدىگىن قاتاڭ قاداعالاماعانىن كورسەتتى. اركىم ءوز ىسىنە جاۋاپ بەرۋى كەرەك. تەكسەرۋشىلەر ۋچاسكەنى تەكسەرگەنىن ديسپەتچەرگە ۇنەمى ەسكەرتىپ وتىرۋى قاجەت. قازىر قالاي ەكەنىن بىلمەدىم, ءبىزدىڭ كەزدە جۇيە كۇشتى بولدى. جۇمىسشىلارمەن كەڭەسەتىن. قاراۋ, باقىلاۋ كوپ بولدى. بۇرىن ءبىر شاحتادا قىسقا-قىسقا بىرنەشە لاۆا بولاتىن. قازىر ءبىر لاۆا. لاۆادا مەتان گازى جويقىن جارىلادى. بەتىن اۋلاق, توڭىرەكتى جويىپ, ك ۇلىن كوككە ۇشىرىپ جىبەرەدى. گاز دەگەن جىلت ەتكەن ۇشقىننان جارىلادى. كەنشىلەردىڭ وتباسىنا ماتەريالدىق كومەك كورسەتىلەدى دەپ جاتىر. بىراق ادامدى قايتا ءتىرىلتىپ اكەلە المايسىڭ.
جالپى, بۇعان دەيىن دە قانشا جارىلىس بولدى. ساباق الاتىن كەز كەلدى عوي. شەگىنە جەتتى. بۇيتە بەرسە شاحتادا جۇمىس ىستەيتىن ادام قالمايدى عوي. بۇرىن جالاقى, ۇستەمەاقى, جەڭىلدىكتەر جاقسى بەرەتىن. جۇمىسشىنىڭ ەڭبەگى جاقسى باعالاناتىن. قازىر جەڭىلدىكتەر الىنىپ تاستالدى. شەتەلدىك ەمەس, ءوز كومپانيالارىمىز بولعاندا جۇمىسشىلاردىڭ پىكىرىنە قۇلاق اسىپ, ىمىرادا جۇمىس ىستەيتىن ەدى دەگەن وي كەلەدى.
باياعىدا جۇمىسشىنىڭ قۇقى باستىقتان دا جوعارى بولاتىن. تالاپ-ارىزدارىن تىكە ايتاتىن. باسشىلار سوعان قۇلاق اساتىن. ءبىرىنشى شاحتەرلەرگە قارايلاساتىن.
باسشىلار شاحتاعا تۇسسە, جاعدايدى تۇسىنەر ەدى. ءيا, شاحتەرلەردىڭ جاعدايىن ايتىپ شىرىلداپ جۇرگەن دەپۋتاتتار مەن بەلسەندى ازاماتتار بولدى. بىراق ونى تىڭدايتىن ادام بولسا قانە؟ شاحتەردى تىڭداسا, جاعداي مۇنداي بولماس پا ەدى؟! ءبىرىنشى ورىنعا تابىس, كىرىس ەمەس, جۇمىسشىنىڭ مارتەبەسى, قاۋىپسىزدىگى تۇرسا, مۇنداي جاعدايعا جول بەرىلمەيدى.
الپىس نۇربەكوۆ,
ارداگەر كەنشى