قاراعاندى شاحتاسىنداعى قايعىلى وقيعا تۋرالى ەستىپ, بۇكىل ەلمەن بىرگە قابىرعام قايىسىپ وتىر. «تاس تۇسكەن جەرىنە اۋىر» دەيدى قازاق. قازا تاپقان كەنشىلەردىڭ وتباسىنا قازاقستان قارۋلى كۇشتەرىنىڭ ارداگەرلەرى اتىنان, جەكە ءوز اتىمنان كوڭىل ايتىپ, قايعىلارىڭىزعا ورتاقپىز دەگىم كەلەدى.
قيىندىعى مول, قاۋىپ-قاتەرگە تولى شاحتەر ەڭبەگىنىڭ باعاسىن ءوز باسىم جاقسى بىلەمىن. ويتكەنى سول كوستەنكو اتىنداعى شاحتادا بەس جىل بويى پروحودچيك بولىپ ەڭبەك ەتتىم. وسى جاعدايدى جۇرەگىمە جاقىن قابىلداعانىم دا سوندىقتان شىعار.
وقيعا ورنىنا مەملەكەت باسشىسى بارىپ, حالىقپەن كەزدەستى, شۇعىل شەشىمدەر قابىلداۋعا نۇسقاۋ بەردى. سونداي-اق پرەزيدەنت ەشكىمنىڭ مەملەكەت قامقورلىعىنان تىس قالمايتىنىن نىقتاپ ايتتى. «ارسەلورميتتال تەمىرتاۋ» كومپانياسىمەن ينۆەستيتسيالىق ىنتىماقتاستىق توقتاتىلاتىن بولدى. ەندى قاراپايىم حالىقتىڭ جاعدايىن جاسايتىن جاڭا ينۆەستور كەلەدى دەپ ۇمىتتەنەيىك.
ەلىمىزدە 29 قازان – جالپىۇلتتىق ازا تۇتۋ كۇنى دەپ جاريالاندى. «قايعىنى بولىسسە ازايادى» دەيدى حالىق دانالىعى, ەندەشە جۇدىرىقتاي جۇمىلىپ, ەلدىگىمىزدى تانىتساق, بۇل قيىندىقتى دا ەڭسەرەتىنىمىز انىق.
مۇحتار التىنباەۆ,
حالىق قاھارمانى, «قازاقستان قارۋلى كۇشتەرى ارداگەرلەرى» رقب توراعاسى, ارميا گەنەرالى