كوستەنكو شاحتاسىندا جارىلىس بولاردىڭ الدىندا كەزەكشىلىگىن تاپسىرىپ, 12 مينۋت بۇرىن شىعىپ ۇلگەرگەن كەنشىلەردىڭ ءبىرى وقيعا تۋرالى بايانداپ بەردى, دەپ حابارلايدى Egemen.kz kaz.inform.kz سايتىنا سىلتەمە جاساپ.
كەنشىنىڭ ايتۋىنشا, جۇمىس بارىسىندا جارىلىس بولاتىنداي ەش قۇرىلعى سىر بەرمەگەن.
«مەن جەلدەتۋ جانە قاۋىپسىزدىك تەحنيكاسىنىڭ تاۋ-كەن شەبەرىمىن, بۇل لاۆادا كەزەكشىلىكتە بولدىم, ءورت بولاتىنداي ەشقانداي سەبەپ بولعان جوق. مۇنىڭ قايدان شىققانىن ەشكىم بىلمەيدى, قۇرىلعىلارداعى كورسەتكىشتەر قالىپتى بولدى, ءبارى اياقاستى بولدى», دەدى يۋري كورەنكوۆ.
ول جارىلىس بولاردىڭ الدىندا كەزەكشىلىگىن تاپسىرىپ, كەنىشتەن 12 مينۋت بۇرىن شىعىپ ۇلگەرگەن ەكەن.
«كەنشىلەر اۋىسىمدى تاپسىرىپ, بىرەر مينۋت سويلەسىپ, ۇيىمىزگە قايتتىق. ال باسقا اۋىسىم جىگىتتەرى جۇمىستارىنا ەندى كىرىسىپ جاتتى. كلەتكە (شاحتادان كوتەرەتىن جابدىق) دەيىن ادەتتەگىدەي ترامۆايمەن باردىق. ءبىز تۇنگى 02:23-تە شاحتادان شىقتىق, ال جارىلىس 02:35-تە بولدى», دەدى يۋري كورەنكوۆ.
ول سونداي-اق ءتىرى قالعان ارىپتەستەرى بولىسكەن كەيبىر دەرەكتەردى دە ايتىپ بەردى.
«مەنىڭ كۇيەۋ بالام ءتورتىنشى اۋىسىمعا كىرىسكەن بەتتە جارىلىس تولقىنىنا ءتۇستى. اۋىر سوققىعا ۇشىراعان ەكى جۇمىسشىنى قۇتقارىپ قالدى. ەكەۋىنە دە ءوزىن-ءوزى قۇتقارۋ قۇرىلعىسىن كيگىزىپ, امان الىپ قالعان. ءبىرىنىڭ ەسىمى ۆيكتور پلوتنيكوۆ, ەكىنشىسىنىڭ اتى يۋري, فاميلياسى ەسىمدە جوق. ولاردى زۆەنوشى الەكساندر الەكساندروۆيچ كلادكو قۇتقاردى. ۆيكتور پلوتنيكوۆ باسىن قاتتى سوعىپ, زاقىم العان. قازىر ول ماقاجانوۆ اتىنداعى كوپسالالى اۋرۋحانادا جاتىر», دەدى ول.