قاسىم-جومارت توقاەۆ رەسپۋبليكا كۇنى قارساڭىندا اقوردادا ءبىر توپ ازاماتقا مەملەكەتتىك ناگرادالار مەن سىيلىقتار تاپسىردى. ول ەڭ الدىمەن ۇلتتىق مەرەكەنىڭ ءمان-ماڭىزىنا توقتالدى.
– بۇل – قازاقتىڭ مەملەكەتتىلىك ءداستۇرى قايتا جاڭعىرعان تاريحي كۇن. كوك تۇرىكتەر داۋىرىنەن, التىن وردا, قازاق حاندىعى زامانىنان كەلە جاتقان ەلدىگىمىز تامىرىن تاپقان كۇن. بۇل – الاش ارىستارىنىڭ ازاتتىق جولىنداعى ارپالىسى اقتالعان كۇن. حالقىمىزدا «ەگەمەن بولماي, ەل بولماس» دەگەن ءسوز بار. وسىدان 33 جىل بۇرىن تاريحي ادىلدىك ورنادى. قازاقستاننىڭ مەملەكەتتىك ەگەمەندىگى تۋرالى دەكلاراتسيا قابىلداندى. وسى ماڭىزدى قۇجات جۇرتىمىزدىڭ ازاتتىق الۋىنا جول اشتى. اقجولتاي قۇجات جۇرتىمىزدىڭ تالاپ-تىلەگىنە ساي جازىلدى, وتانشىل ازاماتتاردىڭ اقىل-پاراساتىنىڭ ارقاسىندا قابىلداندى. ولاردىڭ سىن ساعاتتاعى باتىلدىعىن ناعىز ەرلىك دەپ باعالاۋعا بولادى. ءبىز قازىر ادىلەتتى قازاقستاندى قۇرىپ جاتىرمىز. سوندىقتان وتكەن زاماننىڭ قايراتكەرلەرىنە, ولاردىڭ ەڭبەگىنە لايىقتى, ادىلەتتى باعا بەرىپ وتىرۋىمىز كەرەك, – دەدى مەملەكەت باسشىسى.
قاسىم-جومارت توقاەۆ ەلىمىزدىڭ جەتىستىكتەرى تۋرالى ايتا كەلە, ادام كاپيتالىن جاقسارتۋعا باعىتتالعان وڭ وزگەرىستەرگە نازار اۋداردى.
– كوپ ۇزاماي حالقىمىزدىڭ سانى 20 ميلليونعا جەتەدى. بۇل ەلىمىزدىڭ تۇراقتى دامۋىنىڭ ايقىن كورىنىسى دەۋگە بولادى. ءبىر سوزبەن ايتقاندا, ازاماتتارىمىز ءوز ۇرپاعىنىڭ جارقىن بولاشاعىنا جانە ەلىمىزدىڭ ەرتەڭىنە سەنىممەن قارايدى. «ۇلتتىق قور – بالالارعا» باستاماسىن جۇزەگە اسىرۋ ءۇشىن ءتيىستى زاڭ قابىلداندى. نەبارى ەكى ايدان كەيىن بالالارىمىزدىڭ ەسەپشوتىنا قارجى تۇسە باستايدى, – دەدى مەملەكەت باسشىسى.
پرەزيدەنت ايماقتاردى جان-جاقتى دامىتۋ ماسەلەسىن مەملەكەتتىك ساياساتتاعى ماڭىزدى باعىتتىڭ ءبىرى رەتىندە اتاپ ءوتتى.
– «قۋاتتى ايماقتار – قۋاتتى مەملەكەت» دەگەنىمىز – جالاڭ ۇران ەمەس. بۇل – ادىلەتتى قازاقستاندى قۇرۋعا قاجەتتى ەڭ باستى قاعيدات. ءبىز بىلتىر ەلىمىزدىڭ اكىمشىلىك-اۋماقتىق قۇرىلىمىنا بىرقاتار وزگەرىس ەنگىزدىك. سول ارقىلى كەيبىر وبلىستىڭ دامۋىنا تىڭ سەرپىن بەردىك. مەنىڭ تاپسىرماممەن اۋىل-ايماقتى دامىتۋ تۇجىرىمداماسى قابىلداندى. بۇل قۇجاتتىڭ ءمان-ماڭىزى زور. ايماقتاردا الەۋمەتتىك, ينجەنەرلىك جانە كولىك ينفراقۇرىلىمىن قۇرۋ – باستى مىندەت. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى باستالدى. وسى جوبانىڭ اياسىندا 655 امبۋلاتوريا جانە فەلدشەرلىك-اكۋشەرلىك نىسان سالىنادى, قۇرال-جابدىقپەن تولىق قامتاماسىز ەتىلەدى. بۇعان قوسا 20 اۋدانارالىق كوپبەيىندى ەمحانا اشىلادى, ال 12 ەمحانا زامان تالابىنا ساي جاڭارادى. ياعني ءتورت ميلليوننان استام اۋىل ازاماتىنا ساپالى دارىگەرلىك قىزمەت كورسەتىلەدى. ەلىمىزدە «جايلى مەكتەپ» جوباسى قولعا الىندى. 2026 جىلعا دەيىن بارلىق ايماقتا جۇزدەگەن جاڭا مەكتەپ بوي كوتەرەدى. اۋىلداردا 100 سپورت ورتالىعى اشىلادى. سونداي-اق 650 مادەنيەت وشاعى سالىنادى جانە جوندەلەدى, – دەدى قاسىم-جومارت توقاەۆ.
پرەزيدەنت قازاقستاننىڭ «ەلدىڭ ىشىندە دە, اينالاسىندا دا بەيبىتشىلىك», ء«ار الۋاندىق ارقىلى – بىرلىككە» دەگەن قاعيداتتاردى ءاردايىم بەرىك ۇستاناتىنىن مالىمدەدى. ونىڭ ايتۋىنشا, قازاقستاننىڭ الدىندا بۇرىن-سوڭدى بولماعان جاڭا سىن-قاتەرلەر تۇر. وسى كۇردەلى كەزەڭدە مەملەكەتىمىزدىڭ ورنىقتى دامۋى وتە ماڭىزدى. ءبىز بولاشاققا سەنىممەن قاراعان ءبىرتۇتاس قازاق ەلىن كۇللى الەمگە تانىتۋىمىز كەرەك.
– ەگەمەندىككە قول جەتكىزۋ وڭاي ەمەس, ال ونى ساقتاپ تۇرۋ ءتىپتى قيىن. شىن مانىندە, تاۋەلسىزدىك – بارىنەن قىمبات. تاۋەلسىزدىكتى ساقتاۋ, بۇل, ەڭ الدىمەن, تۇتاس ۇلتتىڭ جاۋاپكەرشىلىگى. ءبىز ەگەمەندىكتى تىنىمسىز ەڭبەكپەن, مىزعىماس بىرلىكپەن كۇن سايىن قورعاۋىمىز كەرەك. ەڭ باستىسى, ەلىمىزدەگى تۇراقتىلىقتى ساقتاۋىمىز قاجەت. سەبەبى تىنىشتىق بولماسا, باسقانىڭ ءبارى بەكەر. الەمدەگى احۋالدىڭ قانداي كۇردەلى ەكەنىن كورىپ وتىرسىزدار. بەدەلدى حالىقارالىق ساراپشىلار قازاقستاندى بەيبىتشىلىكتىڭ بەسىگى دەپ اتايدى. قازىر ءبىز ايماقتىڭ مادەني-رۋحاني ورتالىعىنا اينالدىق. بيىل شەتەلدىڭ ونەر ۇجىمدارى ەلىمىزدە 200-دەن اسا مادەني ءىس-شارا وتكىزدى. بۇل – تۇراقتىلىقتىڭ, تىنىشتىقتىڭ ايقىن كورىنىسى. مۇنى باسقالارعا ۇلگى-ونەگە دەۋگە بولادى. ال تۇراقسىزدىق جايلاعان ەلگە ەشكىم ۇمتىلا قويماسى انىق. بەيبىتشىلىك – ءبىزدىڭ باستى بايلىعىمىز. ونىڭ قادىرىنە جەتىپ, باعالاي ءبىلۋ – بارىمىزگە ورتاق پارىز. مۇنى ەلىمىزدىڭ ءاربىر ازاماتى, اسىرەسە وسكەلەڭ ۇرپاق تەرەڭ ءتۇسىنۋى قاجەت, – دەدى مەملەكەت باسشىسى.
پرەزيدەنت «ادال ازامات» ۇعىمىنا ايرىقشا توقتالىپ, جاستاردى قۇندىلىقتاردى باعالاۋعا شاقىردى.
– ەلىمىزدە جۇزەگە اسىرىلىپ جاتقان ءاربىر باستاما, ەڭ الدىمەن, سىزدەرگە ارنالادى. قازىرگى رەفورمالاردىڭ يگىلىگىن كورەتىن دە, ەلدىك ىستەردى جالعاستىراتىن دا – سىزدەر. بۇگىنگى جاستاردى قازاقستاننىڭ كەلبەتى دەۋگە بولادى. شىن مانىندە, كەز كەلگەن مەملەكەتتى تۇرعىندارىنا قاراپ باعالايدى. ياعني ءبىزدىڭ قانداي ەل بولارىمىز وسكەلەڭ ۇرپاققا بايلانىستى. سوندىقتان جاستارىمىز وتانشىل, ءبىلىمپاز, ەڭبەكقور, ۇنەمشىل, ءادىل ءارى جاناشىر بولۋى قاجەت. جاستار سپورتپەن, دەنەشىنىقتىرۋمەن اينالىسۋى كەرەك. مەن مۇنى ۇنەمى ايتىپ ءجۇرمىن. وسى قۇندىلىقتاردى بارىنشا ناسيحاتتاپ, تاراتۋ قاجەت. سوندا جەكە ادامنىڭ قاسيەتى تۇتاس ۇلتتىڭ قاسيەتىنە اينالادى. جاستار كەز كەلگەن وزگەرىسكە بەيىم بولادى. ءار نارسەنى بويىنا تەز سىڭىرەدى. مەن سىزدەردى جاقسىدان ۇيرەنۋگە, جاماننان جيرەنۋگە شاقىرامىن. ۇلى اباي ايتقان بەس نارسەدەن قاشىق, بەس نارسەگە اسىق بولىڭىزدار. سىزدەر دارىپتەگەن قۇندىلىقتار قوعامدا تەز ورنىعادى. سىزدەر قولداعان وزگەرىستەر جىلدام جۇزەگە اسادى. ءبارىمىزدىڭ تىلەگىمىز – ءبىر, بۇل – قوعامىمىزدا جاپپاي ادىلەتتىك ورناتۋ. ەندەشە, ماقساتىمىزعا بىرگە جەتەيىك, – دەدى قاسىم-جومارت توقاەۆ.
پرەزيدەنت مەملەكەتتىلىك تۇعىرىن نىعايتا ءتۇسۋ ءۇشىن زاڭ ۇستەمدىگىن ورنىقتىرۋ وتە ماڭىزدى دەپ سانايدى. مەملەكەت باسشىسىنىڭ ايتۋىنشا, ادىلەتتى قازاقستاندى قۇرۋ ءۇشىن قۇقىقتىق مادەنيەتتى دامىتۋ قاجەت.
– زاڭسىزدىق, تارتىپسىزدىك, مادەنيەتسىزدىك ەلدى جارعا جىعادى. مۇنداي جاعىمسىز ۇردىستەرگە بۇكىل قوعام بولىپ قارسى تۇرۋىمىز كەرەك. ال تارتىپكە باعىنعان قوعام وركەنيەتتى بولادى. بۇل – زاڭدىلىق. ءار ازامات ەلىمىزدىڭ زاڭىن قۇرمەتتەسە, بەرەكە-بىرلىك تە, باقۋاتتى تۇرمىس تا بولادى. ياعني زاڭ تولىعىمەن ورىندالسا, ءتورت قۇبىلامىز تۇگەل بولماق, – دەدى مەملەكەت باسشىسى.
سونداي-اق مەملەكەت باسشىسى ەلىمىزدە كەيىنگى ەكى جىل ىشىندە ىسكە اسىرىلىپ جاتقان رەفورمالارعا توقتالىپ, ونىڭ قوعام ساناسىن وزگەرتۋگە ىقپالى تۋرالى ايتتى.
– ءبىز بىرتىندەپ قوعامدى وزگەرتۋ جانە دەموكراتيا قاعيداتتارىن ەنگىزۋ جولىنان اينىمايمىز. الەمدە ساياسي جانە ەكونوميكالىق احۋال قۇبىلىپ تۇرعان زاماندا زاڭ جانە قۇقىق ۇستەمدىگىن قامتاماسىز ەتۋ وتە ماڭىزدى. ەكى جىلعا دا جەتپەيتىن از ۋاقىتتا ەلىمىزدە ىسكە اسىرىلعان رەفورمالار حالىقتىڭ ساياسي سانا-سەزىمىن ەداۋىر وزگەرتتى. ەندى جۇرتىمىز مەملەكەتتى باسقارۋدىڭ بۇرىنعى ءتاسىلىن قايتارۋعا جول بەرمەيتىنىنە سەنىمىم مول. رەفورمالاردان كەيىن وتكەنگە قايتا ورالمايمىز. وزگەرىستەر ءالى جالعاسادى جانە مەملەكەتىمىزدىڭ سيپاتىن تولىق وزگەرتەدى. بىراق ءبىز رەفورمانى جۇزەگە اسىرعاندا, ەڭ الدىمەن, ىشكى ساياسي تۇراقتىلىقتىڭ ماڭىزدىلىعىن ەستەن شىعارماۋىمىز كەرەك. ايتپەسە, قازاقستاننىڭ مەملەكەتتىلىگىنە زور قاۋىپ-قاتەر ءتونۋى جانە ونىڭ سالدارى ۇلت بولاشاعى ءۇشىن وتە اۋىر بولۋى مۇمكىن. سوندىقتان مەن ءاربىر ازامات زاڭ مەن ءتارتىپتى ساقتاۋى كەرەك دەپ ۇنەمى ايتىپ ءجۇرمىن. ءبىز سوزبەن دە, ىسپەن دە قوعامدى ورتاق ماقساتقا جۇمىلدىرۋعا جانە جالپىۇلتتىق بىرلىكتى نىعايتا بەرۋگە ءتيىسپىز. حالقىمىز ازات ەل بولىپ, مىقتى ءارى ادىلەتتى مەملەكەت قۇرۋ تۋرالى ارمانىن بەرەكە-بىرلىگىنىڭ ارقاسىندا عاسىرلار تەزىنەن امان الىپ شىعىپ, اقيقاتقا اينالدىردى. بۇگىندە ءبىزدىڭ مەملەكەتتىلىگىمىز قارقىندى دامىعان ەگەمەن رەسپۋبليكانىڭ وركەنيەتتى ءارى قۇقىقتىق سيپاتىنا يە بولدى, – دەدى پرەزيدەنت.
پرەزيدەنت ءسوزىن قورىتىندىلاي كەلە, ەلىمىزدىڭ دامۋىنا ەلەۋلى ۇلەس قوسقان ءبىر توپ ازاماتقا جوعارى مەملەكەتتىك ناگرادالار, سىيلىقتار مەن اتاقتار تابىس ەتتى.
– تاۋەلسىز ەلدىڭ تابىسىن ارتتىرۋعا ازاماتتارىمىز ماڭداي تەرىمەن ۇلەس قوسىپ ءجۇر. شىن مانىندە, تاباندى ەڭبەك زور تابىسقا جەتكىزەدى. بارلىق سالانى, اسىرەسە ءوندىرىستى بىلىكتى ماماندار دامىتادى. سوندىقتان ءبىز ءبىر ەل بولىپ قوعامدا ەڭبەكقورلىقتى دارىپتەيمىز. ادال ەڭبەك پەن جاۋاپكەرشىلىك جاڭا قوعامدىق ەتيكانىڭ وزەگى بولۋى كەرەك. «ەڭبەگىنە قاراي – قۇرمەتى» دەگەن. ەڭبەگىمەن دارالانىپ, كوپشىلىكتىڭ قۇرمەتىنە يە بولعان ازاماتتىڭ ءبىرى – كورنەكتى مەملەكەت جانە قوعام قايراتكەرى باقتىقوجا ىزمۇحامبەتوۆ. ول مۇناي-گاز سالاسىندا, وندىرىستە جانە مەملەكەتتىك قىزمەتتە ۇزاق جىل بويى تابىستى جۇمىس ىستەدى. ونىڭ ءومىر جولى وسكەلەڭ ۇرپاققا ونەگە بولارى ءسوزسىز. بۇگىن مەن ەلىمىزگە وراسان زور ەڭبەك سىڭىرگەن قايراتكەر باقتىقوجا سالاحاتدين ۇلىنا «قازاقستاننىڭ ەڭبەك ەرى» اتاعىن بەرۋ تۋرالى شەشىم قابىلدادىم, – دەدى قاسىم-جومارت توقاەۆ.
سونىمەن قاتار پرەزيدەنت باسقا دا سالادا, سونىڭ ىشىندە اۋىل شارۋاشىلىعىندا ءونىمدى ەڭبەك ەتىپ جۇرگەن ازاماتتار تۋرالى ايتا كەلە, وسىنداي ناعىز ەڭبەك ادامىنىڭ ءبىرى رەتىندە سىر ەلىنىڭ ازاماتى يمامزادا شاعىرتاەۆتىڭ ەسىمىن اتادى. «ونىڭ اۋىلى دا, شارۋاسى دا كوپشىلىككە ۇلگى بولىپ وتىر. تابىسقا جەتكەن ءاربىر جان ءوز اۋىلىنا ءدال وسىلاي قامقور بولسا, نۇر ۇستىنە نۇر بولار ەدى. ايماقتى دامىتۋعا وراسان زور ۇلەس قوسقان يمامزادا قۋانىشباي ۇلى بۇگىن «قازاقستاننىڭ ەڭبەك ەرى» اتاعىنا يە بولدى», دەدى مەملەكەت باسشىسى.
پرەزيدەنت ەلىمىزدىڭ دامۋىنا ەلەۋلى ۇلەسىن قوسىپ جۇرگەن ەڭبەك ادامدارىنىڭ قاتارىندا ۇستازدار قاۋىمىنىڭ ورنى ەرەكشە ەكەنىن ايتتى. بۇگىنگى زامان ءبىلىمنىڭ ءداۋىرى بولعاندىقتان, سوندىقتان بىلىمپازدىق ەڭ باستى قاسيەتتىڭ بىرىنە اينالۋعا ءتيىس ەكەنىن تىلگە تيەك ەتكەن مەملەكەت باسشىسى: «مۇعالىمنىڭ مارتەبەسىن كوتەرىپ, جاعدايىن جاقسارتۋ وتە ماڭىزدى. استانادا وتكەن ۇستازدار سەزىندە بۇل ماسەلەگە ارنايى توقتالدىم. ويتكەنى ۇستازدار قاۋىمى ۇلتتىڭ جاڭا ساپاسىن قالىپتاستىرادى. مۇعالىم بولىپ, ۇرپاق تاربيەلەۋ – قاسيەتتى ميسسيا. ەلىمىزدە مىڭداعان ادام وسى مىندەتىن ادال اتقارىپ ءجۇر. ولار كۇندەلىكتى ەڭبەگىمەن قازاقستاندى دامىتۋعا زور ۇلەس قوسىپ جاتىر. سول سەبەپتى مۇعالىمدەردىڭ قوعامداعى ورنى ەرەكشە بولۋعا ءتيىس. ۇستازعا بارلىق جەردە قۇرمەت كورسەتىلۋى كەرەك. بىرنەشە جىل بۇرىن مەنىڭ تاپسىرماممەن «قازاقستاننىڭ ەڭبەك سىڭىرگەن ۇستازى» اتاعى بەلگىلەندى. جاقىندا ءبىر توپ پەداگوگتى ءوزىم ارنايى ماراپاتتادىم. وسى يگى ءۇردىس بۇگىن دە جالعاسىن تاپپاق» دەپ, ەلۋ جىل بويى ۇرپاققا ءبىلىم مەن تاربيەنى قاتار بەرىپ كەلە جاتقان سەمەي قالاسىنداعى №7 مەكتەپ-ليتسەيدىڭ ماتەماتيكا ءپانى مۇعالىمى الما شۇكەجانوۆانى «قازاقستاننىڭ ەڭبەك ەرى» اتاعىمەن ماراپاتتاۋ تۋرالى شەشىم قابىلداعانىن جەتكىزدى.
پرەزيدەنت قاسىم-جومارت توقاەۆتىڭ باستاماسىمەن بيىل «قازاقستاننىڭ حالىق جازۋشىسى» جانە «قازاقستاننىڭ حالىق ءارتىسى» اتاقتارى قايتادان بەرىلە باستادى.
– ۇلتتىڭ رۋحانياتىن دامىتىپ, رۋحىن كوتەرۋگە قالامگەرلەرىمىز ەرەكشە ىقپال ەتەدى. بۇعان دەيىن «قازاقستاننىڭ حالىق جازۋشىسى» اتاعىن قايتارۋ تۋرالى باستاما كوتەرىلدى. مەن تۇركىستاندا وتكەن ۇلتتىق قۇرىلتايدىڭ وتىرىسىندا وسى ۇسىنىسقا قولداۋ ءبىلدىردىم. قۇرمەتتى اتاق شيرەك عاسىردان سوڭ جازۋشىلارىمىزعا قايتا بەرىلە باستادى. ءتول ادەبيەتىمىزدى دامىتۋعا زور ۇلەس قوسقان ءبىر توپ كورنەكتى قالامگەر بۇگىن «قازاقستاننىڭ حالىق جازۋشىسى» اتاندى.
مەنىڭ تاپسىرماممەن «قازاقستاننىڭ حالىق ءارتىسى» اتاعى دا قايتارىلدى. بۇل اتاق بۇرىنعىداي تەاتر, كينو, مۋزىكا جانە تاعى باسقا ونەر سالاسىنىڭ ەلىمىزگە تانىمال تارلاندارىنا بەرىلەدى, – دەدى پرەزيدەنت. سونداي-اق ول بيىل كوكتەمدە وتكەن قازاقستان حالقى اسسامبلەياسىنىڭ ءحححىى سەسسياسىندا ەل بىرلىگىن جانە قوعامدىق كەلىسىمدى نىعايتۋعا ۇلەس قوسقان ازاماتتاردى ارناۋلى «ەل بىرلىگى» وردەنىمەن ماراپاتتاۋ تۋرالى تاپسىرما بەرگەنىن اتاپ ءوتتى.
– مەملەكەت ەلىمىزدىڭ عىلىم سالاسىن دامىتۋعا, عالىمدارىمىزدىڭ جەتىستىكتەرى مەن ەڭبەگىن باعالاۋعا ايرىقشا ءمان بەرەدى. بيىل ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىق قازاقستاننىڭ ۇلتتىق يادرولىق ورتالىعىنىڭ عالىمدار ۇجىمىنا بەرىلدى. ورتالىق اتوم-ەنەرگەتيكاسى سالاسىندا تەڭدەسسىز زەرتتەۋلەر جۇرگىزىپ, الەمدىك دەڭگەيدەگى وزىق ازىرلەمەلەر جاسادى.
قاۋىپ-قاتەردەن قايمىقپاي, وزگەنىڭ ءومىرىن قۇتقارۋ – ناعىز ەرلىك. مۇنداي ادامدار شىنايى قۇرمەتكە لايىق. بۇگىن وسىنداي بىرنەشە ازاماتتى ماراپاتتايمىن. جالپى, ەلىمىزدىڭ دامۋىنا ءار ايماقتىڭ تۇرعىندارى, ءار سالانىڭ ماماندارى زور ۇلەس قوسىپ ءجۇر. ءبىز ولارعا ءاردايىم قۇرمەت كورسەتەمىز. مەملەكەتتىك ماراپاتتى, ەڭ الدىمەن, حالىقتىڭ العىسى دەپ تۇسىنگەن ءجون. شىن مانىندە, تۋعان ەلدىڭ ىقىلاسىنان ارتىق ەشتەڭە جوق. ەندەشە, جۇرتتىڭ ريزاشىلىعىن الىپ, تابىستى ەڭبەك ەتە بەرىڭىزدەر! – دەدى پرەزيدەنت.
سالتاناتتى جيىننان كەيىن پرەزيدەنت قاسىم-جومارت توقاەۆ رەسپۋبليكا كۇنىنە ارنالعان كونتسەرتتى تاماشالادى. مەرەكەلىك ءىس-شارا «استانا وپەرا» تەاترىندا ءوتتى.
كونتسەرتتە الىبەك دىنىشەۆ, روزا رىمباەۆا, مايرا مۇحامەدقىزى, ايگۇل ۇلكەنباەۆا, ديماش قۇدايبەرگەن, باسقا دا بەلگىلى مادەنيەت قايراتكەرلەرى, سونداي-اق حورەوگرافيالىق توپتار مەن سيمفونيالىق وركەستر ونەر كورسەتتى.