قازاقستاننىڭ حالىق ءارتىسى اتاعى قايتا ورالاتىنىن جانە بۇل ماراپاتتى العاش يەلەنەتىندەردىڭ قاتارىندا ءوزىمنىڭ بولاتىنىمدى ماعان قاسىم-جومارت كەمەل ۇلىنىڭ ءوزى ۇشاقتا بىرگە كەلە جاتقانىمىزدا ايتقان بولاتىن. ارينە, ەستىگەندە وتە قاتتى قۋاندىم.
بۇل قۇرمەتتى ءوزىمنىڭ ازدى-كوپ جاساپ جاتقان ەڭبەگىمنىڭ باعالانعانى جانە حالىق تاراپىنان كورسەتىلگەن قولداۋ رەتىندە قابىلدايمىن. دەگەنمەن ءبىز سەكىلدى ونەر ادامدارى ءۇشىن ەڭ باستى بايلىق – ول حالىقتىڭ ىقىلاسى مەن ماحابباتى. ەلدىڭ قۇرمەت-قوشەمەتىن ەشبىر ماراپاتپەن الماستىرا المايدى. بۇگىنگى العان اتاعىما لايىقپىن با, جوق پا, ونى دا حالىق ايتادى. مۇمكىندىگىنشە وسى بيىكتەن كورىنۋگە, حالىق ءارتىسى دەگەن اتقا ساي بولۋعا تىرىسىپ, ونەرىمدى باعالايتىن جۇرتشىلىقتى جاقسى اندەرىمىزبەن قۋانتا بەرەمىز.
ءاۋ باستان مەنىڭ ءاربىر اياق الىسىمدى قولداپ-قۋاتتاپ كەلە جاتقان حالقىما جانە بۇگىن اقوردانىڭ تورىندە ءوز قولىنان ماراپاتتى تاپسىرعان پرەزيدەنتكە باسىمدى ءيىپ راحمەت ايتامىن. ەڭ باستىسى, ەلىمىز امان, جۇرتىمىز تىنىش بولسىن!
ديماش قۇدايبەرگەن,
قازاقستاننىڭ حالىق ءارتىسى, ءانشى