وتباسى بانكتىڭ ماڭعىستاۋ وبلىستىق فيليالى ۇجىمى رەسپۋبليكا كۇنى قارساڭىندا ۇيىمداستىرىلعان اعاش وتىرعىزۋ اكتسياسىنا قاتىستى.
فيليال قىزمەتكەرلەرى اقتاۋ قالاسىنىڭ 18 شاعىن اۋدانىندا «باقىتتى وتباسى» جانە «شاڭىراق» مەملەكەتتىك باعدارلاماسى اياسىندا بوي كوتەرگەن №18, 19, 20, 21 ۇيلەر جانىنا 50 ءتۇپ زياندى جاندىكتەرگە جانە شاڭ-توزاڭعا قارسى كۇرەسۋ قابىلەتى بار ايلانتا تۇقىمدى كوشەتتەرىن وتىرعىزدى. شاھاردىڭ ءسانى مەن ەكولوگياسىنا ۇلەس قوساتىن ءىس-شاراعا اقتاۋ قالالىق اكىمدىگى مەن قاجەتتى قۇرال-سايماندار, تىڭايتقىشتار جانە سۋارۋ تەحنيكاسىن ۇسىنعان «كوكتەم» مەكەمەسى قولۇشىن بەردى.
– اتالعان ۇيلەر 2022 جىلى قولدانىسقا بەرىلىپ, اكىمدىكتە كەزەكتە تۇرعان 180 ازامات باسپانالى بولدى. بۇل العاشقى ۇيىمداستىرىپ جاتقان اكتسيامىز ەمەس, وسىعان دەيىن دە مەملەكەتتىك باعدارلاما اياسىندا بەرىلگەن باسقا تۇرعىن ءۇي كەشەندەرىنىڭ جانىنا اعاش وتىرعىزعان ەدىك. اعاش وتىرعىزۋ – كەز كەلگەن ازاماتتىڭ پارىزى دەپ ەسەپتەيمىن. وزگەلەردىڭ اعاش وتىرعىزعانىن كورىپ, قالا تۇرعىندارىنىڭ قىزىعۋشىلىعى ويانادى دەپ ويلايمىن. بانكىمىزدە تەك كوگالداندىرۋ باعىتىندا ەمەس, نەسيە بەرۋ باعىتىندا دا جۇمىستار جۇيەلى جۇرگىزىلۋدە. تۇجىرىمداما شەڭبەرىندە نەسيەلەر باستاپقى جارنا 10% بولعان كەزدە جىلدىق 2% (2%-دان جىلدىق ءتيىمدى سىياقى مولشەرلەمەسى (جتسم) جانە 5% (5,2%-دان جتسم) مولشەرلەمەسى بويىنشا بەرىلەتىن بولادى. نەسيەلەۋ مەرزىمى 20 جىلعا دەيىن. جىلدىق 2% مولشەرلەمە بويىنشا قارىزدارعا I جانە II توپتاعى مۇگەدەكتىگى بار ادامدار, مۇمكىندىگى شەكتەۋلى بالالارى بار نەمەسە مۇگەدەكتىگى بار بالالاردى تاربيەلەپ وتىرعان وتباسىلار, جەتىم بالالار مەن اتا-اناسىنىڭ قامقورلىعىنسىز قالعان بالالار, سونداي-اق كوپبالالى وتباسىلار ۇمىتكەر بولا الادى. كەزەكتە تۇرعانداردىڭ بارلىق باسقا ساناتتارى باعدارلاماعا قاتىسا الادى جانە جىلدىق 5% مولشەرلەمە بويىنشا قارىزدارعا ۇمىتكەر بولا الادى, – دەدى «وتباسى بانك» اق ماڭعىستاۋ وبلىستىق فيليالىنىڭ ديرەكتورى م.ابۋگاليەۆ.
فيليال باسشىسىنىڭ ايتۋىنشا, باسپانا الۋشىلارعا جەڭىل شارتتارمەن, ياعني 10% باستاپقى جارنا جانە 5% -دىق جىلدىق مولشەرلەمە بويىنشا نەسيە (جتسم – 5,2%) راسىمدەلگەن.
وتباسى بانكى ارقىلى 2019 جىلى باستالعان «باقىتتى وتباسى» باعدارلاماسى اياسىندا 2019-2020 جىلدارى كوپبالالى وتباسى, مۇگەدەكتىگى بار بالا تاربيەلەپ وتىرعان وتباسى جانە تولىق ەمەس وتباسى ولشەمشارتتارى بويىنشا 255 وتباسىنا, ەكىنشى ترانشتا – 169, ءۇشىنشى جانە ءتورتىنشى ترانشتاردا سايكەسىنشە 379 جانە 141 وتباسىنا, بارلىعى 941 وتباسىنا پاتەر بەرىلگەن.
وتباسى بانك بەرگەن مالىمەتكە سۇيەنسەك, اقتاۋ قالاسىنداعى 19 ا شاعىن اۋدانىندا 2023-2029 جىلدارعا ارنالعان تۇرعىن ءۇي-كوممۋنالدىق ينفراقۇرىلىمدى دامىتۋ تۇجىرىمداماسى اياسىندا 432 پاتەرلىك 5 ءۇي سالىنعان. ونىڭ ىشىندە 324 پاتەر اكىمدىكتە كەزەكتە تۇرعاندار اراسىندا بولىنگەن. قازىرگى تاڭدا ساتىپ الۋ-ساتۋ شارتتارىنا قول قويۋ ۇدەرىسى ءجۇرىپ جاتىر جانە ول تۇرعىن ۇيدەگى قونىستويىن تاۋەلسىزدىك كۇنىنە وراي اتاپ ءوتۋ جوسپارلانعان.
بانك قىزمەتكەرلەرى وزدەرى ارقىلى بەرىلگەن تۇرعىن ءۇي كەشەنىنە تۇرعىندار تولىقتاي قونىستانعان سوڭ مىندەتتى تۇردە سەنبىلىك ۇيىمداستىرۋدى جوسپارلاپ وتىر.
ماڭعىستاۋ وبلىسى