پرەزيدەنت قاسىم-جومارت توقاەۆ مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى راسىمدە ەگەمەندىك دەكلاراتسياسى قالاي قابىلدانعانىن ايتتى, دەپ حابارلايدى Egemen.kz.
«شىن مانىندە, ەگەمەندىك دەكلاراتسياسىن قابىلداۋ وڭايعا سوققان جوق. ەلىمىزدىڭ ۇلتتىق قۇرامى بىركەلكى ەمەس ەدى. سول كەزدەگى پارلامەنتتە, ياعني جوعارعى كەڭەستە جانە بۇكىل قوعامىمىزدا ۇزاق پىكىرتالاس, قىزۋ تالقىلاۋ بولدى. قۇجاتتىڭ ءار ءسوزىن, ءار بابىن قورعاۋعا تۋرا كەلدى. ءاليحان بوكەيحان «بوستاندىققا اپاراتىن جالعىز جول – ۇلتتىق ىنتىماق قانا» دەگەن. ەل اعالارى حالقىمىزدىڭ ارداقتى ۇلىنىڭ بۇل وسيەتىنە ادال بولدى. ولار جاۋاپتى ساتتە ۇيىمشىلدىقپەن ۇلت مۇددەسىن قورعاي ءبىلدى. اقجولتاي قۇجات جۇرتىمىزدىڭ تالاپ-تىلەگىنە ساي جازىلدى, وتانشىل ازاماتتاردىڭ اقىل-پاراساتىنىڭ ارقاسىندا قابىلداندى. ولاردىڭ سىن ساعاتتاعى باتىلدىعىن ناعىز ەرلىك دەپ باعالاۋعا بولادى», دەدى مەملەكەت باسشىسى.