اۋىل وقۋشىلارىنىڭ رەسپۋبليكالىق وليمپياداسى وسى جىلدىڭ قاراشاسى مەن 2024 جىلدىڭ قاڭتارى ارالىعىندا العاش رەت وتكىزىلەدى. اتالعان باستاما قالا مەن اۋىل مەكتەپتەرى اراسىنداعى الشاقتىقتى ازايتۋعا باعىتتالعان.
«دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى عاجدەمبەك تۇرسىنوۆتىڭ ايتۋىنشا, وليمپياداعا اۋىل مەكتەپتەرىنىڭ 9-11 سىنىپ وقۋشىلارى قاتىسا الادى. مۇنداعى ماقسات – ەلىمىزدىڭ شالعاي ەلدى مەكەندەرىندەگى دارىندى جانە تالانتتى بالالاردىڭ قابىلەتتەرىن انىقتاپ, دامىتۋ, حالىقارالىق وليمپيادالارعا قاتىسۋعا ىنتالاندىرۋ.
– رەسپۋبليكالىق وليمپيادالاردا اكادەميالىق ادالدىقتى قامتاماسىز ەتۋ ءۇشىن تاپسىرمالار ءار قاتىسۋشىعا ەلەكتروندى تۇردە جەكە جىبەرىلەدى. وليمپيادانىڭ بارلىق كەزەڭىندە وقۋشىلاردىڭ اتى-ءجونى جاسىرۋلى تۇرادى. ءار كەزەڭنەن كەيىن تاپسىرمالاردىڭ سكانەرلەنگەن نۇسقاسى, قاتىسۋشىلاردىڭ جۇمىستارى مەن دۇرىس جاۋاپتارى ورتالىقتىڭ سايتىندا جاريالانادى, – دەيدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى.
جوعارىدا اتالعان قاعيدالاردىڭ بارلىعى ەڭ بەدەلدى الەمدىك IMO, IPhO, IChO, IBO, IGeO, IOI جانە IOL وليمپيادالارىنىڭ ەرەجەلەرىنە سۇيەنىپ جاساقتالعان. بۇل وليمپيادالاردا جەڭىمپاز بولعان وتانداستارىمىزعا مەملەكەت تاراپىنان 500 ايلىق ەسەپتىك كورسەتكىشتەن 1500 ايلىق ەسەپتىك كورسەتكىشكە دەيىن قارجىلىق قولداۋ كورسەتىلەدى. بيىل 23 وقۋشى جۇلدەلى ورىندارعا يە بولعان.
– وتاندىق وقۋشىلاردىڭ وسىنداي جوعارى جەتىستىكتەرىن ەسكەرە وتىرىپ, حالىقارالىق ۇيىمداستىرۋ كوميتەتى بيولوگيادان ەڭ بەدەلدى الەمدىك وليمپيادانى 2024 جىلى استانادا وتكىزۋ تۋرالى شەشىم قابىلدادى. وعان 80 ەلدەن 330-عا جۋىق ۇزدىك جاس بيولوگ قاتىسادى دەپ كۇتىلىپ وتىر, – دەيدى عاجدەمبەك تۇرسىنوۆ.
وقۋ-اعارتۋ ءمينيسترى عاني بەيسەمباەۆ اتاپ وتكەندەي, مۇنداي اۋقىمدى ءىس-شارانىڭ وتكىزىلۋى ءبىز ءۇشىن ۇلكەن مارتەبە. ءارى بۇل ەلىمىزدىڭ وقۋ-اعارتۋ سالاسىنداعى ۇلكەن جەتىستىك.
– پاندىك وليمپيادا – بالالاردىڭ ساناسىندا العاشقى عىلىمي ىزدەنىستەرگە جول سالاتىن, بولاشاق عالىمداردى شابىتتاندىراتىن, عىلىممەن ەركىن اينالىساتىن جاستار توبىن قالىپتاستىراتىن ەڭ اۋقىمدى باعدارلامالىق سايىس. وتاندىق مەكتەپ وقۋشىلارىنىڭ بەدەلدى وليمپيادالارعا قاتىسۋ رەيتينگى جەڭىس قورجىنىندا مەدالدار سانىنىڭ كوبەيگەنىن, ءبىلىم ساپاسىنىڭ ارتقانىن كورسەتەدى. سوندىقتان رەسپۋبليكالىق وليمپيادالاردىڭ ارقايسىسىنىڭ ساپالى ءارى جوعارى دەڭگەيدە ءوتۋى ماڭىزدى, – دەيدى عاني بەيسەمباەۆ.
ايتا كەتۋ كەرەك, ەلىمىزدە جىل سايىن جالپى ءبىلىم بەرەتىن پاندەر بويىنشا مەكتەپ وقۋشىلارى اراسىندا وليمپيادالار ۇيىمداستىرىلادى. ولارعا 300 مىڭعا جۋىق مەكتەپ وقۋشىسى قاتىسادى.