ەلوردادا «قايىرىمدىلىق كەرۋەنى» رەسپۋبليكالىق فورۋمى ءوتتى. ۇلتتىق مەرەكە قارساڭىندا ۇيىمداستىرىلعان ءداستۇرلى ءىس-شارانىڭ باستى ماقساتى – ەرەكشە قاجەتتىلىكتەرى بار دارىندى بالالارعا قولداۋ كورسەتۋ, ولاردىڭ قابىلەتىن اشۋعا مۇمكىندىك بەرۋ. سونداي-اق قازاقستان حالقى اسسامبلەياسىنىڭ وسى باعىتتا بيىل اتقارعان جۇمىسىن قورىتىندىلاندى.
قايىرىمدىلىق – وتانداستارىمىزدىڭ بىرلىگىن بەكەمدەپ, ىنتىماعىن ارتتىراتىن يگى ءىس. جىل باسىنان بەرى اسسامبلەيا وسى ۇلتتىق قۇندىلىقتى دارىپتەپ, 250 مىڭنان اسا ادامعا كومەك قولىن سوزدى. جاقسىلىقتىڭ جارشىسىنا اينالعان جاندار جالپى كولەمى 2 ملرد تەڭگەگە جۋىق قارجى جۇمساعان.
– ەلىمىزدىڭ ەگەمەندىگى تۋرالى دەكلاراتسيا قابىلدانعان بۇل ايتۋلى داتا – ەلدىڭ تۇعىرى بەرىك مەملەكەت قۇرۋ جولىنداعى تاريحي قادامنىڭ نىشانى رەتىندە ايرىقشا ماڭىزعا يە مەرەكە. بۇل كۇن ءبىرتۇتاس حالقىمىزدىڭ بىرلىگىن ارتتىرۋعا, مەملەكەتتىگىمىزدى نىعايتۋعا باعىتتالعان ءىس-شارالار وتكىزۋمەن ەرەكشەلەنەدى. وسىنداي ءىس-شارالاردىڭ ءبىرى ءارى بىرەگەيى – «قايىرىمدىلىق كەرۋەنى» اكتسياسى. فورۋمدا قايىرىمدىلىق جاساۋشىلاردىڭ ىزگى نيەتى مەن جومارتتىعىنا قۇرمەت كورسەتەمىز. ويتكەنى اسسامبلەيا ەل باسىنا كۇن تۋعان شاقتا كوپپەن بىرگە سۇرىنگەنگە – سۇيەۋ, قينالعانعا دەمەۋ بولا ءبىلدى. ءار مىڭ سانىنىڭ ارتىندا ناقتى ءبىر ادام, وتباسى تۇر. ماسەلەن, «مەكتەپكە جول» اكتسياسى اياسىندا عانا بالالارعا 153 ملن تەڭگە كولەمىندە كومەك كورسەتتىك. اباي وبلىسىنداعى ورتتەن زارداپ شەككەندەرگە دە 47 ملن تەڭگە كولەمىندە كومەك بەرىلدى. ءبىز كومەككە مۇقتاج ءاربىر جان مەملەكەت پەن قوعامنىڭ قولداۋىن سەزىنەتىندەي قوعام قۇرىپ جاتىرمىز. ادىلەتتى قازاقستان ەڭ الدىمەن, ينكليۋزيۆتى مەملەكەتتەن باستاۋ الادى. «قايىرىمدىلىق كەرۋەنى» جوباسى اياسىندا ءبىز قوعامنىڭ نازارىن بالالاردىڭ ونەرى مەن شىعارماشىلىعىنا اۋدارامىز. وسى ورايدا, 40-تان اسا قۇلاعى ەستىمەيتىن جانە ناشار ەستيتىن بالالاردان قۇرالعان سولتۇستىك قازاقستان وبلىسىنىڭ «Sensitive» بي ءانسامبلىن ەرەكشە اتاپ وتكىم كەلەدى, – دەدى اسسامبلەيا توراعاسىنىڭ ورىنباسارى مارات ءازىلحانوۆ.
فورۋمدا جىل قورىتىندىسى بويىنشا قايىرىمدىلىق سالاسىنا ۇلەس قوسقان جانە ەرەكشە قاجەتتىلىكتەرى بار دارىندى بالالارعا قولداۋ كورسەتكەن ازاماتتار اسسامبلەيا اتىنان «جومارت جان» توسبەلگىسىمەن ماراپاتتالدى. جان-جاقتان جينالعان كورەرمەنگە شىعارماشىلىق نومىرلەر ۇسىنىلدى. سونداي-اق الاڭدا مامانداردىڭ ينكليۋزيۆتى جانە ارنايى ءبىلىم بەرۋدەگى يننوۆاتسيالىق ادىستەمەلەرىنىڭ تاجىريبەلىك كەيستەرى تانىستىرىلدى. ىم-يشارا ءتىلىن قولدانۋ, كورۋ قابىلەتى بۇزىلعان بالالاردى وقىتۋ جانە تاربيەلەۋ, اتا-انالارعا, پەداگوگتەرگە جانە ۇەۇ-عا ادىستەمەلىك كومەك كورسەتۋ ماسەلەلەرى قارالدى.
– دەپۋتاتتىق كورپۋس ينكليۋزيۆتى بالالار ماسەلەلەرىنە قاتىستى ارنايى دوڭگەلەك ۇستەل وتكىزدى. جيىندا ءبىلىم بەرۋ, پسيحولوگتەردىڭ دەڭگەيى, كاسىبي ساراپشىلار اراسىندا قانداي سۇراقتار كوتەرىلەدى جانە ارنايى ورتالىقتاردا ساراپشىلار قانداي بولۋى كەرەك سىندى تاقىرىپتار كوتەرىلدى. قاتىسۋشىلار اراسىندا قحا مۇشەلەرى, وقۋ-اعارتۋ مينيسترلىگى وكىلدەرى, ءماجىلىس دەپۋتاتتارى دا بار. ويتكەنى قحا بيىل ەلىمىزدەگى پارتيالارمەن مەموراندۋمعا قول قويدى. سونىڭ نەگىزىندە پارتيا اتىنان دەپۋتاتتىق ماندات العان ازاماتتارمەن ءتۇرلى قوعامدىق ماسەلەنى بىرلەسە تالقىلايمىز, – مادەنيەت جانە اقپارات مينيسترلىگى جانىنداعى «قوعامدىق كەلىسىم» رمم ديرەكتورى ەلينا ماساگۋتوۆا.