ميزامشۋاق مەزگىلگە شومىلىپ تۇرعان مەگاپوليستە رەسپۋبليكا كۇنى مەرەكەسى قارساڭىندا ەكو-بەلسەندىلەردىڭ مۇرىندىق بولۋىمەن «جاڭا قازاقستان. تازا تابيعات» اتتى جالپىقالالىق سەنبىلىك قانا وتكىزىلىپ قويماي, كۇزگى كوشەتتەر وتىرعىزىلدى.
الماتى قالاسى ءماسليحاتىنىڭ دەپۋتاتتارى دا اتسالىسقان اكتسيانىڭ ارقاسىندا دەمالىس ايماقتارى, ساياباقتار, سكۆەرلەر, اۋلا اۋماقتارى ايناداي تازارتىلدى. 5 مىڭ تەكشە مەترگە جۋىق قوقىس جينالىپ, 9 مىڭنان استام اعاش وتىرعىزىلدى. ەكولوگيالىق ناۋقانعا 34 مىڭنان استام قالا تۇرعىنى قاتىسىپ, 239 تەحنيكا جۇمىلدىرىلدى.
نەگىزگى تازالاۋ جۇمىستارى كوكتوبە باۋرايىندا, ALA ساياباعىندا, الماتى يندۋستريالىق ايماعى مەن «باتىس» زيراتىنىڭ سانيتارلىق-قورعاۋ ايماعى اراسىنداعى ۋچاسكەدە, كوكقاينار شاعىن اۋدانىنداعى بورالداي وزەنىنىڭ جاعاسىندا ءوتتى.
كۇزدىڭ ەرەكشە جايماشۋاق كۇندەرىنە تاپ كەلگەن سەنبىلىكتە الماتى اكىمدىگى كوشەت ەگۋ مەن تازالاۋعا قاجەتتى قۇرال-جابدىق (قولعاپ, قاپ, كۇرەك, تىرما) بەرىپ, جينالعان جۇرتتى اۋىز سۋ, تاماقپەن قامتاماسىز ەتتى. جىل سايىن وتەتىن ساۋاپتى باستاما, مەرەكە ىسپەتتەس سەنبىلىك كەزىندە مادەني-ويىن-ساۋىق باعدارلاماسى دا ۇمىت قالمادى. ال جينالعان قوقىس ارناۋلى پوليگونعا شىعارىلدى.
جالپىقالالىق ناۋقانعا اۋدان اكىمدىكتەرى دە قالىس قالعان جوق, ءوز اۋماقتارىندا كوممۋنالدىق قىزمەتتەرمەن بىرىگىپ تۇركسىب اۋدانىندا ءۇاا بويىنداعى باۋم توعايىندا, «جاس قانات» شاعىن اۋدانىندا, جەتىسۋ اۋدانىنداعى «اينابۇلاق-4» شاعىن اۋدانىندا, مەدەۋ اۋدانىنداعى كوكتوبە باۋرايىندا, المالى اۋدانىنداعى سايران كولىنىڭ شىعىس جاعالاۋىندا, اۋەزوۆ اۋدانىنداعى سايران كولىنىڭ باتىس جاعالاۋىندا, الاتاۋ اۋدانىندا بورالداي وزەنىنىڭ جاعاسىندا, بوستاندىق اۋدانىندا «دوستىق» ساياباعىنىڭ اۋماعىندا, ناۋرىزباي اۋدانىنداعى شۇعىلا شاعىن اۋدانىندا جەرگىلىكتى سەنبىلىكتەر وتكىزدى.
ورايى كەلىپ تۇرعاندا الماتىدا «بالدىرعان» اللەياسى پايدا بولعانىن اتاپ ءوتۋ ءلازىم. ويتكەنى بيىل «بالدىرعان» جۋرنالىنىڭ جارىق كورگەنىنە 65 جىل تولىپ وتىر. سونداي-اق جۋرنالدىڭ تۇڭعىش باس رەداكتورى بولعان حالىق جازۋشىسى مۇزافار الىمباەۆتىڭ تۋعانىنا – 100 جىل.
بۇل باسىلىمنىڭ بۇكىل تاريحىندا ءۇش قانا رەداكتورى بار. جۋرنالدى 27 جىل باسقارعان مۇزاعاڭنان كەيىن قازاقتىڭ كلاسسيك اقىنى تۇماعاڭ, تۇمانباي مولداعاليەۆ شيرەك عاسىر شىعاردى. قازىرگى باس رەداكتورى – دۇيسەنبەك ماعلۇموۆ.
سەنبى كۇنى «قازاق گازەتتەرى» سەرىكتەستىگىنىڭ الماتىلىق قىزمەتكەرلەرى مەن جۋرنال ۇجىمى الماتى قالاسىنىڭ ەڭ كورىكتى جەرلەرىنىڭ ءبىرى – ەسەنتاي وزەنىنىڭ جاعالاۋىنداعى دوستىق ساياباعىندا «بالدىرعان» اللەياسىنىڭ اشىلۋىنا قاتىستى. ارىپتەستەرىمىز گيبسيكۋس تۇقىمداسىنا جاتاتىن اعاش كوشەتتەرىن وتىرعىزدى.
الماتى