سوڭعى ۋاقىتتا كوپ تالقىلانىپ جۇرگەن «قىز الىپ قاشۋ» سالتى تۋرالى سان ءتۇرلى پىكىر بار. بۇل ارەكەتتى قولدايتىندار بولسا, تۋرا سول سياقتى قولدامايتىندار دا جەتەرلىك.
«قازىرگى ۋاقىتتا «الىپ قاشۋ» دەگەن دۇرىس ەمەس. ەكى جاستىڭ كەلىسۋىمەن بولعان جاعدايدا ونى الىپ قاشۋ دەپ اتاعان دۇرىس ەمەس بولار. ال زورلاپ, قيناپ, ەركىنەن تىس الىپ قاشۋ زاڭمەن قۋدالانادى. قىزدى الىپ قاشقان ازامات زاڭ اياسىندا جازالانۋى ءجون دەپ ويلايمىن. ءبىز ۇل-قىزدارىمىزعا جاۋاپكەرشىلىكتىڭ نە ەكەنىن, ءوزىنىڭ قۇقىعىن ءبىلۋدى ۇيرەتۋىمىز كەرەك. ولاردى وقىتىپ-توقىتىپ, ءبىلىمدى قىلىپ ءوسىرۋىمىز كەرەك», دەيدى بەلگىلى جۋرناليست ءلايلا سۇلتانقىزى.
ايتا كەتۋ كەرەك, قىز الىپ قاشۋ – قازاقتىڭ كونە سالتى بولسا دا, ەگەر ول قىزدىڭ ەركىنەن تىس بولسا, زاڭ بويىنشا ادام قۇقىقتارىن جانە بوستاندىق پەن تەڭدىكتىڭ نەگىزگى قاعيدالارىن بۇزۋ بولىپ سانالادى. بۇل اۋىر قىلمىس قاتارىنا جاتاتىندىقتان, باس بوستاندىعىنان ايىرۋ تۇرىندەگى جازا تاعايىندالاتىنىن ەسكەرگەن ءجون.
سونداي-اق قىز الىپ قاشۋعا بايلانىستى ارەكەتتەر ءمان-جايلارعا بايلانىستى ادامدى ۇرلاۋ (قىلمىستىق كودەكستىڭ 125-بابىمەن 15 جىلعا دەيىنگى مەرزىمگە باس بوستاندىعىنان ايىرۋ قاراستىرىلعان) نەمەسە باس بوستاندىعىنان زاڭسىز ايىرۋ (قىلمىستىق كودەكستىڭ 126-بابى, 10 جىلعا دەيىنگى مەرزىمگە باس بوستاندىعىنان ايىرۋ كوزدەگەن) دەپ سارالانۋى مۇمكىن.