سەناتور گەننادي شيپوۆسكيح ءوزىنىڭ دەپۋتاتتىق ساۋالىندا تەمىرجولشىلاردىڭ زەينەتكە شىعۋ جاسىن 55 جاسقا دەيىن تومەندەتۋدى جانە ولاردىڭ جالاقىسىن كوتەرۋدى ۇسىندى, دەپ حابارلايدى Egemen.kz.
ونىڭ ايتۋىنشا, تەمىرجول سالاسى قىزمەتكەرلەرىنىڭ ءومىرىن جاقسارتۋ سالاسىندا كوپتەگەن ماسەلە بار. سەناتور ەلىمىزدە سالانى دامىتۋ ءۇشىن ءتىپتى جاڭا مينيسترلىك قۇرىلعانىن اتاپ ءوتتى. الايدا شيپوۆسكيح اتاپ وتكەندەي, مەملەكەتتىك ورگان تەمىرجولشىلاردىڭ نەگىزگى ماسەلەلەرىن, ونىڭ ىشىندە جالاقىنىڭ تومەندىگىن, تۇرعىن ءۇيدىڭ جوقتىعىن جانە زەينەتكە شىعۋ جاسىن تومەندەتۋ ماسەلەسىن ءالى شەشكەن جوق.
دەپۋتات كولىك مينيسترلىگىنىڭ اقپاراتى بويىنشا ەڭ تومەنگى ساناتتاعى «بايلانىس جانە دابىل» ماماندارىنىڭ جالاقىسى اقتوبەدە 382 مىڭ تەڭگەنى, قىزىلوردادا 354 مىڭ تەڭگەنى, ال ەڭ تومەنگى ساناتتاعى «جولشىنىڭ» جالاقىسى اباي وبلىسىندا 280 مىڭ تەڭگەنى جانە پاۆلودار وبلىسىندا 280 مىڭ تەڭگەنى قۇرايتىندىعىنا نازار اۋداردى. بىراق بۇل, سەناتور اتاپ وتكەندەي, شىندىققا سايكەس كەلمەيدى.
«وڭىرلەردەگى تەمىرجولشىلاردان العان مالىمەتتەرگە سۇيەنسەك, ەڭ تومەنگى ساناتتاعى «بايلانىس جانە بەلگى بەرۋ» ماماندارىنىڭ قولعا الاتىن جالاقىسى اقتوبەدە جوبامەن 200 مىڭ تەڭگە, قىزىلوردادا 180 مىڭ تەڭگە, ءدال سولاي ەڭ تومەنگى ساناتتاعى «جول جوندەۋشىنىڭ» جالاقىسى اباي وبلىسىندا 160 مىڭ تەڭگە, پاۆلودار وبلىسىندا 205 مىڭ تەڭگەنى قۇرايدى. مينيسترلىك پەن وڭىرلەردەگى تەمىرجولشىلاردان العان اقپارات ەكەۋى ەكى ءتۇرلى. ءبىز قايسىسىنا سەنەمىز؟ ارينە, حالىقتىن اقپاراتىنا سەنەمىز», دەدى سەناتور.
سەناتور وسى دەرەكتەردى العا تارتا وتىرىپ, تەمىرجولشىلاردىڭ ماسەلەلەرىن تولىعىمەن شەشە الاتىن بىرقاتار شەشىم ۇسىندى. قازىر بۇل سالادا 140 مىڭعا جۋىق ادام جۇمىس ىستەيدى, دەمەك ونىڭ ەكونوميكالىق اسەرى دە ۇلكەن بولادى.
«بىرىنشىدەن, «قازاقستان تەمىر جولى» ۇلتتىق كومپانياسىنىڭ جىلدىق تابىسىن, مەملەكەت تاراپىنان بەرىلەتىن سۋبسيديانى جانە ينفلياتسيانى ەسكەرە وتىرىپ, تەمىر جول سالاسىنىڭ قاراپايىم جۇمىسشىلارىنىڭ جالاقىسىن كوتەرۋ كەرەك. ەكىنشىدەن, تەمىر جول سالاسىنداعى قاراپايىم جۇمىسشىلارعا كورپاراتيۆتىك كەلىسىم نەمەسە باسقاشا تەتىكتەردى قاراستىرا وتىرىپ, 55 نەمەسە 57 جاستان زەينەتكە شىعارۋدى قامتاماسىز ەتۋ كەرەك. ۇشىنشىدەن, تەمىر جول قىزمەتكەرلەرىنە ارنالعان تۇرعىن ءۇي باعدارلاماسى ازىرلەنۋى كەرەك, سونداي-اق باعدارلامانىڭ تەتىكتەرىن بارلىق وڭىرلەرگە ەنگىزىپ, جەرگىلىكتى اتقارۋشى ورگاندارمەن ناقتى الگوريتمى جاسالۋى ءتيىس», دەدى سەناتور.