قۇتقارۋشىلار جۇمىسى قاشاندا اقتارا ايتىپ, اق العىسىڭدى بىلدىرۋگە ابدەن لايىقتى. ماماندىقتىڭ ءتۇر-ءتۇرى بار, دەگەنمەن جانىن شۇبەرەككە ءتۇيىپ ءجۇرىپ, وزگەنىڭ ءومىرىن قورعاپ قالاتىن ورەندەردىڭ ەڭبەگى – ءوز الدىنا ءبىر توبە.
سول كۇنى وبلىس ورتالىعىنىڭ ىرگەسىندەگى قوپا كولى بۇرق-سارق ەتىپ اقباس تولقىندارى اسپانعا اتىپ, اشۋعا بۋلىعىپ جاتقان. انشەيىندە موپ-موماقان كولدىڭ مۇنداي كەيىپكە ءتۇسۋى سيرەك. سولتۇستىك باتىستان سوققان جەل سىرلى توستاعانداي شاعىن كولدى اۋدارا توڭكەرىپ, ساپىرا شيرىقتىرىپ, كوبىك شاشقان ساباسىن كۇمپىلدەتە ءپىسىپ جاتقانداي. كەزەكشى ءبولىمنىڭ تەلەفونى بەزگەگى ۇستاعانداي قايتا-قايتا شىرىلداسىن-اي كەلىپ. سۋىت حابار. كۇننىڭ رابايسىز جايسىزدىعىنا قاراماي, كول بەتىنە شىققان قايىق قاۋىپكە كەز بولسا كەرەك. حابارلاۋشىلاردىڭ ايتۋىنا قاراعاندا, ءۇش ادامى بار قايىق ىعىپ بارا جاتىر. وبلىستىق توتەنشە جاعدايلار دەپارتامەنتى ءورت ءسوندىرۋ جانە اۆاريالىق قۇتقارۋ جۇمىستارى قىزمەتىنىڭ بولىمشە باستىعى رۇستەم مۋجۋپوۆ باستاعان جەدەل توپ وقيعا ورنىنا بىردەن اتتانعان. كوزدى اشىپ-جۇمعانشا كول شەتىنە جەتىپ, موتورلى قايىقپەن كومەككە ۇمتىلعان. كول سۋى مۇزداي ءارى كوز بايلانىپ كەلە جاتقان ۋاقىت. تولقىن اراسىندا ىعىپ بارا جاتقان قايىق بىردە كورىنىپ, بىردە عايىپ بولادى. كورىنبەي كەتكەن سايىن جۇرەك قوبالجىپ, كۇدىك مولايا تۇسەتىندەي. موتورلى قايىقتىڭ ءوزى قاسات قارعا مالتىققان شانا قۇساپ ءجۇرىسى ونبەي قويدى. اۋپىرىمدەپ جەتە بەرگەندە ىققان قايىقتىڭ ۇستىندەگى ەرەسەك ەكى ادامنىڭ بىرەۋى سۋعا سەكىرىپ كەتكەن. انىق كوردى. ايتسە دە رۇستەم دوستيار ۇلى بۇل ارەكەتتىڭ سەبەبىن تۇسىنە العان جوق. ىشىنە سۋ تولىپ, كول تۇبىنە شوگە باستاعان كىشكەنتاي قايىق جانىمىزدى ساقتاپ قالماس دەپ ويلاعان بولار. ماسەلەنىڭ مانىسىنە كەيىن جان شاقىرىپ, ەس جيعاننان كەيىن بارىپ جەتكەن. سويتسە, ەر ادام كىشكەنتاي بالاسى بار كەلىنشەكتى كول بەتىندە قايىقپەن سەرۋەندەۋگە شاقىرعان. كۇننىڭ داۋىلداتىپ, كولدىڭ الاسۇرىپ جاتقانىن دا ەسكەرمەگەن. ال قاۋىپ تونگەن كەزدە سەرۋەندەۋگە الىپ شىققان ادامدارىن تاستاپ, قايىقتان سەكىرىپ كەتكەن. ابىروي بولعاندا قۇتقارۋشىلار الدىمەن قايىقتاعى كەلىنشەك پەن بالانى انىق ءتونىپ كەلگەن اق اجالدىڭ اۋزىنان ج ۇلىپ الدى. ارادا از ۋاقىت وتكەننەن كەيىن قايىقتى تاستاي قاشقان ەر ادام دا قۇتقارىلدى. قاس-قاعىم ءساتتىڭ اراسىندا جالپاق تىلمەن ايتقاندا, انا دۇنيەگە ءبىر بارىپ قايتقان ءۇش بىردەي ادامدى امان الىپ قالدى. كورەر جارىقتارى بار ەكەن.
– بۇل ءبىر عانا ءسات, دەيدى رۇستەم دوستيار ۇلى, – نەگىزى مۇنداي وقىس وقيعا ءجيى كەزدەسەدى ەمەس پە؟ بىراق ءبىزدىڭ ارىپتەستەرىمىز ءوز ءىس-ارەكەتىن ەشقاشان ەرلىككە بالامايدى. سايىپ كەلگەندە, جۇرەك قالاۋىمىزبەن تاڭداپ العان ماماندىعىمىز. تەك قىسىلتاياڭ ساتتە ابىرجىپ قالماي, باتىل شەشىم قابىلداپ, ءوز باسىڭا ءتونىپ تۇرعان قاۋىپ-قاتەردى دە ەلەمەي, جۇرەكتىلىك كورسەتۋىڭ قاجەت. تۇتاستاي العاندا, قۇتقارۋشىلاردىڭ ءابجىل قيمىلى تالاي ادامدى اجالدان امان الىپ قالعانىن بىلەمىن.
ەندى بىردە سۋ قويماسىنا جاس قىز باتىپ كەتكەن ەكەن. كۋاگەرلەردىڭ ايتۋىنا قاراعاندا, وقيعانىڭ شاپشاڭ وربىگەنى سونشالىقتى, بايعۇس بالاعا قول ۇشىن بەرۋ ەشكىمنىڭ قولىنان كەلمەگەن. ەندىگىسى – سۋ تۇبىندە قالعان ءمايىتتى تابۋ. ادامگەرشىلىك پارىز. زار ەڭىرەگەن اتا-اناسىنىڭ دا تىلەگى – وسى. تەرەڭدىگى 20 مەتردەن اساتىن سۋ قويماسىنىڭ تابانىنان ون ەكىدە ءبىر گ ۇلى اشىلماي جاتىپ وپات بولعان بەيكۇنا قىزدى تابۋ وتە قيىن بولعان ەكەن. وسى زامانعى قۇرال-جابدىقتار دا قولدانىلعان. تاجىريبەلى قۇتقارۋشىلاردىڭ كۇش-جىگەرى جۇمىلدىرىلعان. ءۇشىنشى كۇنى رۇستەم دوستيار ۇلى تاپقان. بۇك ءتۇسىپ, سۋىققا توڭعان ادامشا ءبۇرىسىپ جاتىر ەكەن. جاعالاۋعا الىپ شىققانشا جۇرەگى اتقاقتاي سوعىپ, ەلجىرەپ كەتكەن. قايعىدان قارا جامىلعان اتا-اناسىنىڭ قاسىرەتىن ايتىپ جەتكىزۋ مۇمكىن ەمەس. كۇيرەي قينالىپ, ءوز بەتتەرىن وزدەرى جىرتىپ, جانىن قويارعا جەر تابا الماي جان ۇشىرعان اتا-اناسى ءمايىتتى سۋ بەتىنە الىپ شىققان قۇتقارۋشىلارعا العىسىن جاۋدىرىپ جاتىر.
– كەيدە ءبىر وتكەن ءومىر بەلەستەرىڭنىڭ ورنەكتى جولى ىسپەتتى ادامدارعا شاراپاتىڭ ءتيىپ, جاقسىلىعىڭ جان-دۇنيەسىن نۇرلاندىرىپ جاتقانىن كورگەننەن ارتىق باقىت جوق. ويتكەنى العىس ءبىزدىڭ قىزمەتىمىزگە وراي ماڭدايىمىزعا جازىلعان ەل سىيى ەمەس پە؟! – دەيدى ءبىزدىڭ كەيىپكەرىمىز.
وتكەن جىلى تۇركيادا جەر سىلكىنىسى ورىن العان كەزدە ءزىلزالانىڭ زاردابىن جويۋعا قاتىسقان. ءتۇبى ءبىر تۇركى ەلىنىڭ اقساقالدارى قازاقتىڭ ازاماتتارىنىڭ قاجىرلى ەڭبەگىنە ءتانتى بولىپ, اق باتاسىن بەرىپتى. قانشاما قۇتقارۋشى كۇن سايىن وقتاۋلى مىلتىقتىڭ ۇڭعىسىنىڭ ۇشىنداعىداي قاۋىپ-قاتەرگە كەۋدەسىن توسەپ جۇرسە دە قوس قولتىعىنان دەمەپ, جەبەيتىن پەرىشتە پەيىل, اق نيەتتى ادامداردىڭ القاۋسىز العىسى شىعار. كوپتىڭ العىسىن العانعا نە جەتسىن, شىركىن!
اقمولا وبلىسى