ءماجىلىستىڭ بۇگىنگى جالپى وتىرىسىندا دەپۋتات بولات كەرىمبەك شەكارا بەكەتتەرىن ماتەريالدىق-تەحنيكالىق قامتاماسىز ەتۋدەگى تۇيتكىلدى ماسەلەنى كوتەرىپ, پرەمەر-ءمينيستردىڭ ءبىرىنشى ورىنباسارى رومان سكليارعا, قورعانىس ءمينيسترى رۋسلان جاقسىلىقوۆقا دەپۋتاتتىق ساۋال جولدادى, دەپ حابارلايدى Egemen.kz تومەنگى پالاتانىڭ ءباسپاسوز قىزمەتىنە سىلتەمە جاساپ.
«بيىل شىلدە ايىندا حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەلەرى, بىرنەشە دەپۋتات جەتىسۋ مەن جامبىل وبلىستارىنداعى شەكارا اسكەري بولىمدەرىندە بولىپ, قاۋىپسىزدىك ماسەلەسىن ىشتەي زەردەلەدىك.
بىرقاتار اسكەري بولىمدەردە قاجەتتى جاعداي جاسالماعان. اۋىزسۋ, جىلۋ, جارىق بەرۋ, كادر سونداي-اق الەۋمەتتىك قورعاۋ ماسەلەسى دە بار. سونىمەن بىرگە شەكارانى قورعاۋدىڭ تەحنيكالىق جانە بايلانىس قۇرالدارىنىڭ ەسكىرۋى, ينفراقۇرىلىمنىڭ توزۋى قاتتى الاڭداتادى. ماسەلەن, بۇگىندە شەكارا زاستاۆالارىنىڭ كەيبىرى اپاتتىق جاعدايدا تۇر. 1950-1960 جىلدارى سالىنعان, ابدەن توزىعى جەتكەن ەسكى عيماراتتا ورنالاسقان. شەكارا شەبىن بەكەمدەۋ ماقساتىندا 2006-2010 جىلدارعا ارنالعان مەملەكەتتىك باعدارلاما قابىلدانعان ەدى. بۇل باعدارلاما اياسىندا 68 نىساننىڭ قۇرىلىسى جوسپارلانىپ, قاجەتتى قاراجات بولىنگەن. الايدا 15-ءىنىڭ قۇرىلىسى اياقسىز قالعان. 2017 جىلى وسى 15 نىساننىڭ قۇرىلىسىنا اۋديتورلىق تەكسەرىس جۇرگىزىلىپ, ناتيجەسىندە ولاردىڭ ۇشەۋى اپاتتىق دەپ تانىلسا, 9 نىساننىڭ قۇرىلىسى تالاپقا ساي بولماي شىققان. مۇنداي كەمشىلىكتەردى سولتۇستىك قازاقستان وبلىسىنداعى زاستاۆالاردى ارالاعاندا دا كوردىك. قۇرىلىس كومپانيالارى جۇمىستى اياقتاماي جاتىپ قۇرىلىس ماتەريالدارى قىمباتتادى دەگەن جەلەۋمەن سمەتالىق قۇنىنان قوسىمشا اقشا سۇرايدى, قۇرىلىستى سوزبالاڭعا سالادى. وسىنداي مەردىگەر كومپانيالاردىڭ كەسىرىنەن زاستاۆالارداعى ماسەلەنىڭ كۇرمەۋى شەشىلمەيدى. 2024-2028 جىلدارعا ارنالعان شەكارا قاۋپسىزدىگىنىڭ كەشەندى جوسپارى ازىرلەنگەن. سونىمەن قاتار مەملەكەتتىك شەكارا ينفراقۇرىلىمىن دامىتۋ ماسەلەلەرى بويىنشا جول كارتاسى بەكىتىلدى. بۇل شارۋانى تياناقتى اتقارۋعا 700 ميلليارد تەڭگە قاجەت. الايدا ماجىلىستە قارالىپ جاتقان بيۋدجەتتە شەكارا ماسەلەسىن شەشۋگە ءتيىستى قاراجات ەنگىزىلمەگەن», دەدى ب.كەرىمبەك.
ءماجىلىس دەپۋتاتى الەمدەگى گەوساياسي جاعدايدى ەسكەرە وتىرىپ, ەلدىڭ ەگەمەندىگىن, اۋماقتىڭ تۇتاستىعىن, ۇلتتىڭ قاۋىپسىزدىگىن قامتاماسىز ەتۋ ماقساتىندا ۇكىمەتكە بىرنەشە ۇسىنىس ايتتى.
ب.كەرىمبەك 2020 جىلعا دەيىنگى قارۋلى كۇشتەرى تۇجىرىمداماسىنىڭ ورىندالۋىن قامتاماسىز ەتۋ, اتاپ ايتقاندا: شەكارا قىزمەتىندە باستاپقى سەرجانتتان گەنەرالعا دەيىنگى اسكەري كادرلاردى دايارلاۋ, شەتەلدىڭ جەتەكشى جوعارى وقۋ ورىندارىندا كۋرستىق دايىندىقتان ءوتۋ, اسكەري قىزمەتشىلەردىڭ الەۋمەتتىك پاكەتىن جەتىلدىرۋ, شەكارا ينفراقۇرىلىمىن جاڭعىرتۋعا باعىتتالعان ارنايى ءىس-شارالار قابىلداۋ, شەكارا قىزمەتىن جانە قورعانىس سالاسىن قارجىلاندىرۋدى ىشكى جالپى ءونىمنىڭ كەم دەگەندە ءبىر پايىزىنا جەتكىزۋدى زاڭمەن بەكىتۋدى ۇسىندى.