جۋىردا ونەركاسىپ جانە قۇرىلىس ۆيتسە-ءمينيسترى ءىلياس وسپانوۆ باستاعان وتاندىق دەلەگاتسيا گەرمانيانىڭ حارتسۆينكەل قالاسىنداعى CLAAS زاۋىتى تاجىريبەسىمەن تانىسىپ قايتتى.
وتاندىق دەلەگاتسيا وندىرىستىك ۇدەرىستەرمەن جانە كومپانيانىڭ جۇمىس بارىسىندا قولداناتىن جاڭا تەحنولوگيالارىمەن كەڭىنەن تانىستى. بۇل ساپار ساپا مەن ءوندىرىس تيىمدىلىگىن ارتتىراتىن ۇدەرىستەردىڭ باستاۋى بولعانداي.
زاۋىتقا ساپار بارىسىندا «اگروماشحولدينگ KZ» اق, «ۆوستوكماشزاۆود» اق, «كامليت KZ» جشس, «قازاقستان اگرويننوۆاتسيالىق كورپوراتسياسى» جشس, «رەيمان» جشس سياقتى وتاندىق ماشينجاساۋ سالاسىنداعى كاسىپورىندار قۇرامداس بولشەكتەردىڭ الەۋەتتى جەتكىزۋشىلەرىمەن كەلىسسوزدەر دە جۇرگىزدى.
CLAAS كومبايندارىنا ۇسىنىلاتىن نەگىزگى نۇسقالاردىڭ كەڭ اۋقىمى جانە قوسىمشا فۋنكتسيالارى مەن جابدىقتارىن ورناتۋ جۇمىستارىنىڭ كۇردەلىلىگىن مەيلىنشە ەسكەرە وتىرىپ, بۇل ۇدەرىستەردىڭ ءوندىرۋشى ءۇشىن وڭايعا سوقپايتىندىعىن اڭعارۋعا بولادى. ونىمەن قوسا ءوندىرىستى جوسپارلاۋ, بولشەكتەردى جەتكىزۋ لوگيستيكاسى, نەگىزگى قۇراستىرۋ جانە ورناتۋ كۇردەلىلىگى دە قاجىرلى ەڭبەكتى قاجەت ەتەدى.
شىنىن ايتۋ كەرەك, CLAAS كومبايندارى – الەمدەگى ەڭ كۇردەلى اۋىلشارۋاشىلىق ماشينالارىنىڭ ءبىرى. زاۋىت شىعاراتىن استىق جيناعىش كومبايندار 15 مىڭعا دەيىنگى جەكە قۇرامداس بولشەكتەن قۇراستىرىلادى. بۇل زاۋىتتا كومبايننىڭ تازالاۋ جۇيەلەرى, نەگىزگى جانە قايتالاما ءداندى ايىرۋ جابدىقتارى, سونداي-اق استىق بۋنكەرلەرى مەن ءارتۇرلى باسقا دا كومپونەنتتەر قۇراستىرىلادى جانە بويالادى.
بۇل جولعى ءىس-شارا ەكى ەل اراسىنداعى سەرىكتەستىكتى بارىنشا نىعايتۋعا كومەكتەسەدى. اگرارلىق سالانى دامىتىپ, اۋىلشارۋاشىلىق تەحنيكاسىن وندىرۋدە قازاقستان مەن CLAAS اراسىنداعى ىنتىماقتاستىقتىڭ ماڭىزدىلىعىن ارتتىرا تۇسپەك.