بالاسىنىڭ ورىسشا شۇلدىرلەپ بارا جاتقانىنا الاڭداعان اتا-انالار بالاسىن قازاقتىلدى بالاباقشاعا بەرگەنىمەن ناتيجە بولماي تۇر. ارىپتەسىمىز ايدانا شوتبايقىزى وسى ءبىر وتكىر ماسەلەنى «بالامدى قازاقشاعا ءبىل دەپ بەردىم» اتتى ماقالاسىندا كوتەرىپتى.
اۆتور بالاسىن قازاقتىلدى بالاباقشاعا بەرىپ, بىراق بالاسى وندا كەرىسىنشە ورىسشا شۇلدىرلەپ كەتكەن مىسالدى كەلتىرگەن. قازاق توبىنا باراتىن 25 بالانىڭ ەكەۋى عانا قازاقشا سويلەيدى ەكەن. قازاق توبىنداعى ورىسشا سويلەيتىن 23 تاربيەلەنۋشىنىڭ اتا-اناسى بالالارىن قازاقشاعا ءبىلسىن دەپ بەرىپتى. ال ولار قازاقشا بىلەتىن بالالاردى ء«بۇلدىرىپ» ءجۇر.
ماقالادا وقۋ-اعارتۋ ءمينيسترى عاني بەيسەمباەۆتىڭ مەملەكەتتىك بالاباقشالاردىڭ قازاق تىلىندە بولۋى قاداعالانىپ جاتقانى تۋرالى ايتقان ءسوزى كەلتىرىلگەن. سول سوزىندە ۆەدومستۆو باسشىسى ع.بەيسەمباەۆ: «2022 جىلدان باستاپ مەملەكەتتىك بالاباقشالاردىڭ قازاق تىلىندە بولۋى قاداعالانىپ وتىر. دەي تۇرعانمەن, ءتىلى ورىس تىلىندە شىققان بالالاردىڭ دا بەيىمدەلۋ كەزەڭىنەن وتۋىنە بايلانىستى قازىر ماماندار جۇمىس ىستەپ جاتىر. ادىستەمەلىك دۇنيەلەردى ەنگىزۋ ارقىلى ءبىز بۇل بالالارعا دا ءتيىستى كومەك كورسەتۋدى قولعا الىپ جاتىرمىز. سوندىقتان بۇل ماسەلە دە ءوز شەشىمىن تابادى دەگەن ويدامىن», دەگەن.
وسى ورايدا اۆتور مينيستر ايتقان ادىستەمەلىك دۇنيەلەر جايىندا وقۋ-اعارتۋ مينيسترلىگىنە قاراستى بالالاردى ەرتە دامىتۋ ينستيتۋتىنىڭ ديرەكتورى مانار اداموۆادان سۇراپ كورگەن. ول: «رەسپۋبليكا بويىنشا تازا قازاق تىلىندە ءبىلىم بەرەتىن بالاباقشالاردىڭ ۇلەسى 70 پايىزعا جۋىقتايدى. تىلدىك ورتانى قالىپتاستىرۋ مەن قازاق تىلىنە باسىمدىق بەرۋگە باعىتتالعان «تىلگە بويلاۋ» دەپ اتالاتىن قازاق ءتىلىنىڭ باعدارلاماسى بار. وسى باعدارلامانى ازىرلەپ, سىناقتان وتكىزگەن نازارباەۆ زياتكەرلىك مەكتەبىنىڭ وكىلدەرى مينيسترلىكتە جالپى بالاباقشالار مەن مەكتەپتەرگە ەنگىزۋدى ۇسىندى. بۇل باعدارلامانى جۇيەلى ەنگىزۋ ءۇشىن پەداگوگتەردى دايارلاۋ كەرەك. وعان قوسا, ءبىلىم بەرۋ ۇيىمىنداعى ءاربىر قابىرعا, كابينەت, بولمە مەن دالىزگە دەيىن قازاقشا «سويلەپ» تۇرۋعا ءتيىس. بىردەن ەنگىزۋ قيىنداۋ, سول سەبەپتى كەزەڭ-كەزەڭىمەن ەنگىزۋ جوسپارلانعان», دەپ جاۋاپ بەرىپتى.