سەنات توراعاسى ماۋلەن اشىمباەۆ Digital Nomads قاۋىمداستىعىنىڭ وكىلدەرىمەن كەزدەستى. شەتەلدە تۇراتىن جانە الەمنىڭ جەتەكشى تەحنولوگيالىق كومپانيالارىندا جۇمىس ىستەيتىن قازاق جاستارىن بىرىكتىرەتىن قاۋىمداستىقتىڭ مۇشەلەرى استانادا ءوتىپ جاتقان Digital Bridge حالىقارالىق تەحنولوگيالىق فورۋمىنا قاتىسۋ ءۇشىن ارنايى كەلگەن, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
پالاتا سپيكەرى سوڭعى جىلدارى Digital Bridge فورۋمى ايتارلىقتاي كەڭەيىپ, IT-يندۋستريانى دامىتۋ سالاسىندا تانىمال جانە بەدەلدى الاڭعا اينالعانىن اتاپ ءوتتى. بيىل اتالعان فورۋمعا 20 مىڭنان استام ادام قاتىسىپ جاتىر. ولاردىڭ قاتارىندا 300-دەن استام IT-كومپانيانىڭ وكىلدەرى مەن 30 ەلدەن كەلگەن دەلەگاتسيا مۇشەلەرى بار. م.اشىمباەۆ ەلىمىزدە ءىت سالاسىنا جوعارى دەڭگەيدە باسا ءمان بەرىلىپ كەلە جاتقانىن تىلگە تيەك ەتتى. قازاقستان ەلەكتروندى ۇكىمەت پەن فينتەحتى دامىتۋ يندەكسى بويىنشا الەمدىك كوشباسشىلار قاتارىندا ەكەندىگى دە ايتىلدى.
«مەملەكەت باسشىسى تاياۋدا جاريالاعان جولداۋىندا ءىت سالاسىنا ەرەكشە كوڭىل ءبولدى. پرەزيدەنتىمىز 2026 جىلعا قاراي ءىت قىزمەتتەرىنىڭ ەكسپورتىن ءبىر ميلليارد دوللارعا جەتكىزۋ جونىندە ستراتەگيالىق مىندەت جۇكتەدى. وسىعان بايلانىستى پارلامەنتتىڭ الدىندا اتالعان تاپسىرمانىڭ ورىندالۋىن قاجەتتى قۇقىقتىق بازامەن قامتاماسىز ەتۋ مىندەتى تۇر. ەلىمىزدەگى قازىر قولدانىستاعى جانە قالىپتاسىپ جاتقان قۇقىقتىق جاعداي حالىقارالىق كومپانيالاردىڭ ءبىزدىڭ نارىققا كەلۋىن ىنتالاندىرۋى كەرەك. سونداي-اق قازاقستاندىق IT-كومپانيالاردىڭ دامۋىنا ىقپال ەتۋگە ءتيىس», دەدى م.اشىمباەۆ.
كەزدەسۋدە ەلىمىزدە IT-سالانى قوعامنىڭ سۇرانىستارى مەن جاھاندىق ترەندتەردى ەسكەرە وتىرىپ دامىتۋدىڭ كەلەشەگى تالقىلاندى. جاساندى ينتەللەكتتىڭ دامۋىنا قاتىستى سىن-قاتەرلەر دە ايتىلدى. سونىمەن قاتار ءىس-شارادا جاستار ءوز تاجىريبەلەرىمەن ءبولىسىپ, سالانىڭ ساپاسىن ارتتىرۋعا ارنالعان جوبالاردى ىسكە اسىرۋ جونىندەگى ۇسىنىستارىن تالقىعا ۇسىندى.