ونى قازىر الەۋمەتتىك جەلىدەن ءجيى كورەمىز. ال شىعارمالارى كوبىنەسە شەتەلدىك كورمەلەردە كوبىرەك قويىلىپ ءجۇر. ماسەلەن, جۋىردا ارگەنتينانىڭ بىرنەشە قالاسىندا, يراكتا, تۇركيادا, يتاليادا وتكەن كورمەلەردە تۋىندىلارى كورسەتىلدى. ءوزى سۋرەتشى بولسا دا سۋرەتشىلەر وداعىنا مۇشە ەمەس (ونىڭ دا سىرى بار), ەسەسىنە, شەتەلدىك سۋرەتشىلەر وداقتارىنا مۇشە. تاقىرىبى – الەۋمەتتىك ماسەلە, اۋديتورياسى اۋقىمدى. ءار كارتيناسىندا قوعامنىڭ ءبىر شىندىعى جاتادى. ازاماتتىق ۇستانىمىنا ساي اقىلى سۋرەت سالمايدى, شىعارماسىن دا ساتپايدى. ول – سۋرەتشى-انيماتور اڭساعان مۇستافا.
ناعىز قازاق قىزىنىڭ وبرازى قاشاننان بيىك دەڭگەيدەگى ۇعىم سانالعان. ول ۇعىم ونەردە دە سول دەڭگەيدە سۋرەتتەلدى. سۋرەت الەمىندە قازاق قىزىنىڭ وبرازىن جاساماعان قىلقالام شەبەرى كەمدە-كەم. دەسەك تە زامان وزىپ, قوعام اۋىسقان تۇستا قانشاما جىلدارعا ۇلاسقان, ءبىر كۇيدە قاتىپ قالعان قاساڭ تۇسىنىكتەر دە ءوز ۋاقىتىنىڭ تىنىسىنا قاراي وزگەرەدى. بۇل – زاڭدىلىق.
اڭساعان مۇستافا – ءوز زامانداستارىن اسىرەلەمەي سول قالپىندا بەينەلەگەن بىرەگەي سۋرەتشى. ونىڭ كەيىپكەرلەرى, نەگىزىنەن, قىزدار. قيالداعى ءمىنسىز, سۇلۋ قىزدار ەمەس, ارىعى دا, تولىعى دا, اداسىپ كەتكەنى دە, جول ىزدەگەنى دە بار, ءبىرى مەيىرىمدى بولسا, ءبىرى اشۋلى. سۋرەتشى كەيىپكەرلەرىن ءوزىمىز ءسۇرىپ جاتقان ومىردەگى كىشكەنتاي تاعدىرلاردان قۇرايدى. ءبارى دە كوزىمەن كورگەن, جۇرەكپەن سەزگەن وقيعاداعى ادامدار – قۇلاعان, جىلاعان, اداسقان, قايتا تۇرعان تاعدىرلار. مىسالى, سۋرەتشىنىڭ «مامام مەنى ولتىرەتىن شىعار» تۋىندىسى ءبىزدىڭ قوعامداعى وسى مادەني ديسسونانس پەن جالعان ەتنوتسەنتريزمنىڭ كورىنىسىن بەرەدى. جالپى, ۆيزۋالدى ارت قانداي فورمادا بولماسىن شىنايى, ياعني ومىرمەن تىعىز بايلانىستى بولسا كەرەك. زاماناۋي ونەردە جاساندى, ومىردە جوق يدەالداردى ناسيحاتتاي بەرۋ دە ءتيىمسىز.
اۆتور شىعارمالارى ارقىلى قوعامعا پايداسىن تيگىزگىسى كەلەدى. ءار شىعارماسىندا اينالامىزدا بولىپ جاتقان ءتۇرلى الەۋمەتتىك ماسەلەلەردى بەينەلەيدى. بۇگىندە وسى تاقىرىپتاعى كارتينالارىنىڭ سانى 200-گە تاياعان. ول تۋىندىلارىن ەڭ العاش الەۋمەتتىك جەلىدە جاريالادى. بۇگىندە الەۋمەتتىك جەلى ارقىلى سۋرەتتەرىنىڭ بارماعان ەلى جوق سياقتى. سونىڭ ءبىرى – «تازالىق». سۋرەتشىنىڭ ايتۋىنشا, تۋىندى, نەگىزىنەن جاس قىزدارعا ارنالىپ سالىنعان. كەيدە ولار سۇيگەنىمەن ايىرىلىسىپ, ماحابباتتان قايعىرىپ جۇرگەن كەزدە ءبارىن ۇمىتۋ ءۇشىن ميى مەن جۇرەگىن تازالاپ الاتىن كىرجۋعىش ماشينانىڭ بولعانىن ارماندايتىن كەزدەرى بولادى. اۆتور سۋرەتتى جۇرەگى جارالى قىزدارعا ارناعان. ال تەلەفون قۇشاقتاعان بالانىڭ سۋرەتى كارانتين كەزىندە سالىنىپتى. ءيا, سول كەزدەرى بالالار تەلەفوندارىن قۇشاقتاپ, ساباقتى ۇيدەن وقىدى. بىراق ءدال مەكتەپتەگىدەي وقۋعا دەگەن بەلسەندىلىكتەرى دە, قىزىعۋشىلىقتارى دا بولماعانىن بىلەمىز. سۋرەت وسىنى سيپاتتايدى.
«جۇمىس كۇتىپ جاتىرمىن» تۋىندىسى دا كوپتىڭ نازارىن بىردەن اۋدارادى. قوعامداعى جۇمىسسىزدىق ماسەلەسىن قاۋزاعان شىعارمانىڭ يدەياسىن قىرىمبەك كوشەرباەۆ ايتقان ەكەن. «بىردە قىزىلوردا وبلىسىنىڭ اكىمدىگى كورمەگە شاقىرعان بولاتىن. قىرىمبەك كوشەرباەۆ مەنىڭ بارلىق سۋرەتتەرىمدى Facebook جەلىسى ارقىلى بىلەدى ەكەن. قولىمنان ۇستاپ الىپ ءار سۋرەتتى كورسەتىپ, مەنى ماقتادى. ءوزىم دە سۋرەتتەرىمدى تانىعانىنا قاتتى قۋانىپ قالدىم. سوسىن مەنىڭ ساعان بۇرىننان ايتايىن دەپ جۇرگەن يدەيام بار ەدى دەدى. «قازاقتىڭ كوبىسى ەشتەڭە ىستەمەي ۇيىندە جاتادى. نە ىستەپ جاتىرسىڭ دەپ سۇراسا, جۇمىس ىزدەپ جاتىرمىن دەپ جاۋاپ بەرەدى. بۇل نارسە ءبىزدىڭ وسۋىمىزگە, دامۋىمىزعا كەدەرگى بولادى. وسى تاقىرىپقا قاتىستى ءبىر كۇشتى سۋرەت سالشى, جاراي ما؟» دەدى. سودان استاناعا كەلگەندە وسى سۋرەتتى سالىپ شىقتىم», دەيدى سۋرەتشى.
ءيا, اڭساعان مۇستافا ءومىردىڭ ءوزىن سۋرەتتەيدى. تراگەديانى سول كۇيىندە ەستەتيكالىق تالعاممەن قاعازعا تۇسىرەدى. سودان دا بولار, اۆتوردىڭ شىعارماشىلىعىنا قىزىعاتىندار, جاڭا دۇنيەسىن كۇتەتىندەر جەتەرلىك. سۋرەتشىلەر وداعىنا مۇشە بولماسا دا, ۇزىن-سونار اتاق-داڭققا, ماراپاتقا يە بولماسا دا ونىڭ كورمەسىنە كەلۋشىلەر قاشاندا كوپ.
«جالپى يلليۋستراتسياسىز دا ءومىر سۇرۋگە بولادى دەپ ويلايمىن. بىراق قولىمنان كەلگەنى سول, سۋرەت سالۋ. سۋرەت ارقىلى كەيبىر ادامدارعا, كەيبىر پروبلەمالارعا قاتىستى وي سالعىم كەلەدى. وسىنداي قاتەلىك جاساماسىنشى, ويلانسىنشى دەپ ءار دەتالعا كوپشىلىكتىڭ كوڭىلىن اۋدارعىم كەلەدى. مەنىڭ ءار سۋرەتىم ءبىر ماقالا سياقتى. ماعان «مىناداي سۋرەتتەرمەن ءبىر نارسە وزگەرتە الامىن دەپ ويلايسىڭ با؟» دەگەندەي سۇراقتار قوياتىندار دا بار. ءيا, وزگەرتە الامىن دەپ ويلايمىن. قازاقتا «تامشى تاس تەسەدى» دەگەن ءسوز بار. مىسالى, «مامام مەنى ولتىرەتىن شىعار» دەگەن سۋرەتىمە قاتىستى ەكى وقيعانى جەكە وزىمە كەلىپ ايتتى. ءبىرىنشى وقيعا: ءبىر قىز تۇسىك جاساتقالى جۇرگەن جەرىنەن, مەنىڭ سۋرەتىمدى كورىپ, قۇرساقتاعى سابيىنەن كەشىرىم سۇراپ, ومىرگە اكەلگەن. ەكىنشى وقيعانى ءبىر جىگىت بايانداپ بەرىپ ەدى. ول ەكى جاققا كەتكەن قوس عاشىققا مەنىڭ سول سۋرەتىمدى كورسەتىپ, بالانىڭ امان-ەسەن ومىرگە كەلۋىنە, قازاققا تاعى ءبىر وتباسى قوسىلۋىنا ىقپال ەتكەن. ال مەن بىلمەيتىن وقيعالار قانشاما. «قورقام, اكە, ۇرماشى» دەگەن سۋرەتتى كورگەن ەكى ازامات حابارلاستى. وزدەرى وكىنىپ, «ەندى ەشقاشان بالاما قول كوتەرمەيمىن» دەگەن جىگىتتەر دە بولدى», دەيدى سۋرەتشى. ءيا, اڭساعاننىڭ ارمانى – ءوز تۋىندىلارى ارقىلى قوعامنىڭ دەرتىن ەمدەۋ.
سۋرەتشى الەۋمەتتىك تاقىرىپتاعى سۋرەتتى ويشا ۇزاق ويلانىپ ءجۇرىپ, 30 مينۋت – 1 ساعات ارالىعىندا سالادى. ال ەگەر جەيدەلەرگە سالىناتىن سۋرەت بولسا, 2-3 كۇن ارالىعىنداعى ۋاقىت كەتەدى دەيدى. ايتا كەتەيىك, اۆتور سۋرەتتەرىن جەڭىل كيىمدەرگە كورنەكىلىك رەتىندە جابىستىرىپ, ونى ساتىلىمعا شىعارىپ, تۇراقتى كاسىپكە اينالدىرىپ وتىر.