سينگاپۋردا وتكەن روبوتوتەحنيكادان FIRST Global Challenge ەڭ ءىرى چەمپيوناتىندا قازاقستان وقۋشىلارى رەكوردتىق ناتيجەگە قول جەتكىزدى. اتالعان جەڭىسپەن ۇلتتىق قۇراما بىلتىر جەنەۆادا العان چەمپيوندىق اتاعىن قايتالادى, دەپ جازادى Egemen.kz.
قازاقستان قۇراما كومانداسىندا الماتى قالاسىنداعى نزم وقۋشىلارى نۇريسلام تۇرعىنباي, نۇرسۇلتان جانزاقوۆ, سەرگەي گاپونوۆ, دامەلى شايمەردەنوۆا, ءيمانالى كوكسال بولدى. ۇلتتىق قۇراما باپكەرلەرى – بەكزات ىڭكاروۆ پەن نۇرداۋلەت دوسماعامبەت.
ەلىمىزدىڭ ءار تۇكپىرىنەن 200 وقۋشى اراسىنان ۇلتتىق كەزەڭدە ىرىكتەلگەن مىقتى كوماندا سينگاپۋرعا كەلىپ, الەم چەمپيوناتىندا ۇپاي كورسەتكىشىمەن رەكورد ورناتقانىن تىلگە تيەك ەتكەن USTEM Foundation قوعامدىق قورىنىڭ جەتەكشىسى اسىلبەك مىرزاحمەتوۆ سونىمەن قوسا, كوماندانىڭ حالىقارالىق ىنتىماقتاستىق ءۇشىن تورەشىلەردىڭ ماراپاتتارىنا يە بولۋى ۇلكەن ماقتانىش ەكەنىن ءھام قازاقستاندا روبوتوتەحنيكا جىل وتكەن سايىن حالىقارالىق برەندكە اينالىپ كەلە جاتقانىن اتاپ ءوتتى.
جىل سايىن ءارتۇرلى ەلدە وتەتىن FIRST Global Challenge وليمپيادالىق ۇلگىدەگى جاھاندىق روبوتوتەحنيكا چەمپيوناتىنا بيىل 190-نان استام ەل قاتىسقان.
ەسكە سالساق, روبوتوتەحنيكا وليمپياداسىنىڭ ىرىكتەۋ كەزەڭدەرى شەڭبەرىندە ۇلتتىق قۇراما وقۋ-اعارتۋ مينيسترلىگىنىڭ قولداۋىمەن جاساقتالعان.