قاراعاندى وبلىسىندا پيلوتتىق تارتىپتە رەسپۋبليكادا العاش رەت وتباسىعا كومەك كورسەتۋ ورتالىعى اشىلدى. جاڭا پوليتسيا بولىمشەسى ءوڭىر باسشىسى ەرماعانبەت بولەكپاەۆقا تانىستىرىلدى. ءبىر ەرەكشىلىگى – ءبولىم قىزمەتكەرلەرىنىڭ بارلىعى ايەل ادامدار, دەپ حابارلايدى Egemen.kz Polisia.kz سايتىنا سىلتەمە جاساپ.
ء«بىز قازاقستاندا وتباسىنا كومەك كورسەتۋدىڭ العاشقى بىرىڭعاي ورتالىعىن قۇردىق. وبلىس اكىمدىگىنىڭ قولداۋىمەن تۇرمىستىق زورلىق-زومبىلىققا قارسى كۇرەس بويىنشا قاناتقاقتى جوبا ىسكە قوسىلدى. يدەيا مىنادا: پوليتسيا ورگاندارىنا وتباسىلىق جانجالدار, توبەلەسكىشتەر تۋرالى حابارلامالار كەلىپ تۇسەدى, ءبىز مالىمدەمەلەر بويىنشا جۇمىس جۇرگىزەمىز, بىراق جابىرلەنۋشىلەر تەك قۇقىقتىق كومەككە عانا ەمەس, الەۋمەتتىك, پسيحولوگيالىق كومەككە دە ءزارۋ. ءبىز مۇنىڭ ءبارىن بىرىكتىردىك. ورتالىق ءبىر تەرەزە قاعيداتى بويىنشا جۇمىس ىستەيدى. مۇندا پوليتسيادان, زاڭگەرلەردەن, پسيحولوگتان, سوت ورىنداۋشىسىنان, تەولوگتان جانە ەرىكتىلەردەن كومەك الۋعا بولادى. سونداي-اق مەدياتور, داعدارىس ورتالىقتارىنىڭ وكىلدەرى بار», دەدى قاراعاندى وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى قۇرمانعالي يسماعۇلوۆ.
تۇرمىستىق زورلىق-زومبىلىقپەن كۇرەسۋدىڭ جاڭا ادىستەرىن ەنگىزۋ كەزىندە حالىقارالىق تاجىريبە ەسكەرىلگەن. وتباسىنا كومەك كورسەتۋ ورتالىعىن كوپ جىلدار بويى ايەلدەردى زورلىق-زومبىلىقتان قورعاۋ جونىندەگى اعا ينسپەكتور بولىپ جۇمىس ىستەگەن گۇلبانۋ ساتباەۆا باسقاردى. ەكسپەريمەنتالدى نەگىزدە ايەلدەر پوليتسيا بولىمشەسى قۇرىلدى. ونىڭ قۇرامىنا تەرگەۋشى, يۋۆەنالدى جانە كوشى-قون پوليتسياسىنىڭ ينسپەكتورلارى, ەسىرتكى قىلمىسىنا قارسى كۇرەس جونىندەگى جەدەل ۋاكىل, پروباتسيا قىزمەتىنىڭ وكىلى جانە ت.ب. كىرگەن. قارىم-قاتىناستى مۇمكىندىگىنشە سەنىمدى ەتۋگە تالپىنۋ ماقساتىندا ءبولىم قىزمەتكەرلەرى ايەل ادامداردان عانا قۇرالعان.
ورتالىق بارلىق قاجەتتى زاتتارمەن جابدىقتالعان. قىزمەتكەرلەر جەدەل اقپاراتقا قول جەتكىزۋى ءۇشىن قۇقىق قورعاۋ ورگاندارىنىڭ ۆەدومستۆولىق بازالارىنا قوسىلعان. الەۋمەتتىك بلوكتا كوپتەگەن ماسەلەلەر قاراستىرىلعان. مۇندا ينكليۋزيا, قورعانشىلىق جانە قامقورشىلىق ماماندارى جۇمىس ىستەيدى. كەلۋشىلەر پسيحولوگتىڭ كومەگىن الا الادى. ءتىپتى قارجىلىق كەڭەسشى بار, ول وتباسىلىق بيۋدجەتتى دۇرىس ءبولۋ تۋرالى جانە ينتەرنەت-الاياقتاردىڭ ايلا-امالدارىنا قالاي تۇسپەۋ كەرەكتىگىن ايتادى. «ورتالىقتىڭ جۇمىسىنداعى ەڭ ماڭىزدى نارسە – ازاماتتىق قوعامنىڭ, جەرگىلىكتى اتقارۋشى ورگاندار مەن پوليتسيانىڭ ۇزدىكسىز ءوزارا ءىس-قيمىلىنىڭ كوپىرىنە اينالۋى ءتيىس», دەپ اتاپ ءوتتى جوبا باستاماشىلارى.
تۇپكى ماقسات – وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىقتاردى ازايتۋعا نەگىزدەلگەن. ەستەرىڭىزگە سالايىق, وسى جىلدىڭ 1 شىلدەسىنەن باستاپ قر اكىمشىلىك قۇقىق بۇزۋشىلىق تۋرالى كودەكسىنە تۇزەتۋلەر ەنىپ, وعان سايكەس وتباسىلىق-تۇرمىستىق زورلىق-زومبىلىق ءۇشىن جازا كۇشەيتىلگەن بولاتىن.