استانادا ءوتىپ جاتقان VI Nobel Fest حالىقارالىق فەستيۆالى اياسىندا ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ الەمگە ايگىلى اۆتو-ديزاينەر فرەنك ستيۆەنسونعا «الامان بايگە» كارتيناسىن سىيعا تارتتى. كارتينا اۆتورى – قازاقستان سۋرەتشىسى ەرلان ايتۋاروۆ, دەپ حابارلايدى Egemen.kz.
يسلامبەك سالجانوۆ اتاپ وتكەندەي سىيلىق كەزدەيسوق تاڭدالماعان.
«5 مىڭ جىل بۇرىن اتا-بابامىز, ياعني كوشپەندى جىلقى جانۋارىن ءبىرىنشى بولىپ ەرتتەپ مىنىپ, بۇكىل ادامزات وركەنيەتىندە سەرپىلىس جاسادى. مىنە, وسى ساتتەن باستاپ جىلقى ەڭ جىلدام ءارى نەگىزگى كولىك قۇرالىنا اينالدى. بۇل – تاريحتىڭ باعىتىن وزگەرتتى. جىلقىنى العاش قولعا ۇيرەتكەن – قازاق دالاسى. ءسىز ديزاينىن جاساعان Ferrari كولىگىندە ات بەينەلەنگەن ەمبلەما بار.
سىزگە تارتۋ ەتكەن كارتينادا الامان بايگە بەينەلەنگەن. ول – قازاقتىڭ ۇلتتىق ات جارىسى. بىرنەشە مارتە چەمپيون بولعان فورمۋلا-1 سياقتى تەمىر تۇلپار جارىسىنىڭ باستاۋىندا وسى الامان بايگە تۇر دەپ ايتۋعا بولادى.
ءسىزدى 2024 جىلى قىركۇيەكتە استانادا وتەتىن V دۇنيەجۇزىلىك كوشپەندىلەر ويىندارىنا شاقىرامىن», دەپ تۇيىندەدى ءسوزىن يسلامبەك سالجانوۆ.
فرەنك ستيۆەنسون تارتۋ ەتىلگەن سىيلىقتى جوعارى باعالايتىندىعىن, ال زاماناۋي شىعارماشىلىقتى شابىتتاندىرۋدا تاريحتىڭ ماڭىزى بيىك ەكەندىگىن ايتتى. ديزاينەر يسلامبەك سالجانوۆقا ونەر تۋىندىسى مەن V دۇنيەجۇزىلىك كوشپەندىلەر ويىندارىنا شاقىرعانى ءۇشىن العىسىن ءبىلدىردى.