جەر مارجانى باياناۋىل تورىندە «اقبەتكە قونعان اققۋ جىر» اتتى پوەزيا كەشى ءوتتى. ادەمى كەشتىڭ اتاۋى بايانداعى بيىك شىڭ – اقبەتپەن استارلاسۋىندا وزىندىك ءمان بار. ەلىمىزدىڭ ءار وڭىرىنەن كەلگەن اقىن قىزداردىڭ شىعارماشىلىعى نەگىزىنەن ماحاببات ليريكاسىنا ارنالدى.
اقبەت شىڭىنىڭ اڭىزىنا قۇلاق تۇرسەك, ەرتەدە بۇل ولكەدە اقبەت قىز عۇمىر كەشىپتى. اكەسى بۇركىتباي اقبەت سۇلۋدى قاۋساعان شالعا ۇزاتپاق بولعان ەكەن. عاشىعىمەن قول ۇستاسىپ قاشۋعا نيەتتەنگەن اقبەتتىڭ جولى كەسىلىپ, جىگىت ولتىرىلەدى دە, قىز ۇيگە قامالادى. قايعى جۇتقان ارۋ عاشىعىمەن بىرگە تاڭدى قارسى الاتىن شىڭعا شىعىپ, توڭىرەگىنە سوڭعى رەت كوز سالىپ, قۇزدان قۇلاپ مەرت بولىپتى. قوينىنا وسىنداي ماحاببات بايانىن بۇككەن اقبەت شىڭى تاۋ عانا ەمەس, سەزىمنىڭ دە ءرامىزى دەسەك بولادى.
شىمىلدىعى فاريزا اقىننىڭ «ولەڭ, مەن سەنى ايالاپ وتەم» جىرىمەن تۇرىلگەن كەش تىزگىنىن وڭىرگە بەلگىلى جاس اقىندار, كورەرمەن كوزايىمىنا اينالعان ەلامان قابدىلاشىم مەن ايبەك ورالحان ۇستادى. پوەزيا كەشىندە «الاش» حالىقارالىق ادەبي سىيلىعىنىڭ لاۋرەاتى ءارى تانىمال تەلەجۋرناليست تاناكوز تولقىنقىزى, «اقپارات سالاسىنىڭ ۇزدىگى», اقتاۋلىق انار شامشادينوۆا, حالىقارالىق «شابىت» فەستيۆالىنىڭ جەڭىمپازى ساعىنىش نامازشاموۆا, استانا قالاسىنان جاس اقىن ايزادا راحىمجانوۆا, اقىن ءارى تانىمال تەلەجۋرناليست تولقىن قابىلشا, ەكىباستۇزدىق قالامگەر, اقىن جانارگۇل قادىروۆا, حالىقارالىق تۇركى الەمى جاس جازۋشىلار وداعىنىڭ مۇشەسى گۇلناز فايزۋللا قاتىسىپ, جىرسۇيەر قاۋىمدى ليريكاعا تولى ولەڭدەرىمەن سۋسىنداتتى.
ءبىز تانىستىرعان اقىن قىزداردىڭ بايان ەلىنە بوتەنى جوق: تاناكوز, ساعىنىش, انار, وسى ەلدىڭ تۋماسى جانارگۇل جاس اقىن-جازۋشىلاردىڭ «باياناۋىل – 2007» فورۋمىنا قاتىسىپ, باياناۋىلدىقتاردى جىرعا بولەگەنى ەسىمىزدە. ال ايزادا مۇسا شورمانوۆتىڭ 200 جىلدىق تويى اياسىندا ۇيىمداستىرىلعان ءمۇشايرادا «كەمەڭگەر» ولەڭىمەن باس جۇلدەنى جەڭىپ العان. انار جاسىبايعا ارناپ جىر جازسا, تولقىن بيىل كيەلى توپىراقتا ءماشھۇر ءجۇسىپ كوپەي ۇلى, جۇسىپبەك ايماۋىت ۇلى تۋرالى دەرەكتى فيلمدەر تۇسىرگەن. گۇلناز قازاق اقىندارىنىڭ جىرلارىن تۇرىك, ازەربايجان تىلدەرىنە اۋدارىپ, تۇركىتىلدەس ەلدەر اراسىندا رۋحاني كوپىر بولىپ ءجۇر.
جەتى اققۋعا ۇقساعان جەتى اقىنعا اپپاق گۇل شوقتارى تارتۋ ەتىلىپ, باياناۋىلدىق جانە ەكىباستۇزدىق ونەر يەلەرى قالامگەرلەردىڭ قۇرمەتىنە اننەن شاشۋ شاشتى. جىر مەرەكەسىندە كەش قوناقتارىمەن بىرگە باياناۋىلدىق ونەرپازدار دا ولەڭ وقىدى. تاناكوز تولقىنقىزىنىڭ «وسىلاي دا ادام ساعىنادى ەكەن...», جانارگۇل قادىروۆانىڭ «جەتىنشى قابات», ايزادا راحىمجانوۆانىڭ ء«بىز ەكەۋمىز بىرگە بولساق...», تولقىن قابىلشانىڭ «ادالدىق» ولەڭىن وقىعان ورەندەردىڭ ونەرىن جۇرت سۇيسىنە تاماشالاپ, قوشەمەت كورسەتتى.
پاۆلودار وبلىسىنىڭ قۇرمەتتى ازاماتى, مەملەكەتتىك قىزمەت ارداگەرى, ەل اعاسى قوراباي شاكىروۆ ءسوز الىپ, رۋحانيات سالاسىنداعى ءوزىن تولعاندىرىپ جۇرگەن جايتتاردى اقىندارعا امانات رەتىندە جەتكىزدى. باتاگوي قاريا ابدىقومار سالىق ۇلى اقىندارعا اق باتاسىن بەرسە, جەرگىلىكتى اقىندار – تاڭات احاتوۆ پەن جەڭىسبەك ءپازىل جىر وقىدى. ال «مادەنيەت سالاسىنىڭ ۇزدىگى» جامبى ءماشىم سىڭلىلەرىنە اق جول تىلەدى. اقىندارعا وبلىس اتىنان ءماشھۇر ءجۇسىپ كوپەي ۇلىنىڭ 10-تومدىق جيناعى سىيعا تارتىلدى.
پاۆلودار وبلىسى,
باياناۋىل اۋدانى