زامانىندا ءماشھۇر ءجۇسىپتىڭ ءوزى قولدانعان جەكە زاتتارى وبلىس ورتالىعىنداعى كورمەگە اكەلىندى. قۇران كىتابى مەن كىتاپ قورجىنى, ءتىس تازالاعىشى جانە قولجازبالارىنىڭ كوشىرمەسى كوپشىلىككە ۇسىنىلىپ, جۇرتشىلىق ۇلىدان قالعان جادىگەردى تاماشالاۋعا اسىقتى.
كوشپەلى حالقىمىز الا قورجىنمەن اس-سۋىن الىپ جۇرسە, ءماشھۇر ءجۇسىپ اتامىز ساپارلاي قالسا جانىنان تاستامايتىن قورجىننان قولجازبالارى مەن كىتاپتارى ۇزىلمەگەن. عۇلامانىڭ تەرى سىڭگەن كونە قورجىنىنا كەزىندە تالاي مارجان دۇنيەلەردىڭ تەڭدەي سالىنعانى انىق. ال ءتىس تازالاعىشى دا قىزىق جادىگەر. ەرەكشە قاتتى اعاشتان جاسالعان, ۇزىن بويىنا تىلىگى بار. باياناۋىل جەرىندە تۇزدى كولدەر جەتكىلىكتى, سول كەزدەگى ادامدار ءتىس پاستاسىنىڭ ورنىنا تۇزدى كولدەردىڭ جاعاسىنا جينالاتىن مينەرالدى توزاڭدى پايدالانعان ەكەن.
«تاشكەنت, بۇحارا, سامارقانعا بارعان ساپارلارىندا ءماشھۇر اتامىز ءتىس تازالاۋعا ارنالعان قۇرالدى, قازىرگى ءتىس ششەتكالارىنىڭ ءتۇپ بەينەسىن كورىپ ساتىپ العان, ءوزى دە قولدانعان, جۇرتقا دا ۇسىنعان. وسىلايشا, ول قازاقتاردى باسقا حالىقتاردا باردى ۇيرەنۋگە شاقىرعان. اتامىز اعارتۋشىلىق قىزمەتپەن دە اينالىسقان. مۇراعا قالعان زاتتارى ارقىلى قاسيەت يەسىنىڭ تىلسىم سىرى مەن اۋليەلىگىن ايگىلەۋ ماقسات ەتىلۋدە. جالپى, وسى ۋاقىتقا دەيىن ءبىزدىڭ قوعام ءماشھۇر ءجۇسىپ كوپەي ۇلىن عالىم, وقىمىستى رەتىندە عانا تانىپ كەلگەن ەدى» دەيدى ءماشھۇر ءجۇسىپ كوپەەۆتىڭ شوبەرەسى, اقىننىڭ مەموريالدىق مۇراجايىنىڭ باسشىسى اسەت پازىلوۆ.
كوزى تىرىسىندە قۇراننىڭ نەبىر ءتۇرىن ۇستاعان عۇلامانىڭ ايگىلى كوك قۇرانىن, وكىنىشكە قاراي, كورمەدەن كورە المادىق. ءماشھۇر ءجۇسىپ ومىرىندە جالعىز عانا سۋرەتكە تۇسكەنىن, وعان سەبەپشى بولعان دوسى ابدىرازاق اللاجار ۇلى بولعانىن ايتۋىمىز كەرەك. سول سۋرەتتە اتامىزدىڭ شاپانىنان قۇران كىتاپتىڭ شەتى شىعىپ تۇرعانىن اڭعارۋعا بولادى. كەرەكۋلىك فوتوگراف دميتري باگاەۆ سۋرەتكە ءتۇسىرىپ جاتقاندا عۇلاما «يەلەرىم شوشيدى» دەپ, قۇراندى كەۋدەسىنە باسىپ قويعان. مۇراجاي قىزمەتكەرلەرىنىڭ ايتۋىنشا, ول قۇران كىتاپ تا ەسكەلدىدەگى مۇراجايدا ساقتاۋلى تۇر.
ايتىپ وتەيىك, بۇل كۇندەرى بۇقار جىراۋ اتىنداعى ادەبيەت جانە ونەر مۋزەيىندە ءماشھۇر ءجۇسىپ كوپەي ۇلىنىڭ 165, سۇلتانماحمۇت تورايعىروۆتىڭ 130 جىلدىعىنا ارنالعان «بابالار مۇراسى» اتتى تاقىرىپتىق كورمە جۇمىس ىستەپ تۇر.
پاۆلودار