تۇركىستان وبلىسى اكىمىنىڭ ءباسپاسوز قىزمەتى ءمالىم ەتكەندەي, اتالعان وبلىس ورتالىعىندا كۇش اتاسى قاجىمۇقان مۇڭايتپاسوۆتى ەسكە الۋعا ارنالعان ەرەسەكتەر اراسىندا قازاق كۇرەسىنەن ازيا كۋبوگى دوداسى باستالدى. بايراقتى باسەكەگە قازاقستان, موڭعوليا, قىتاي, ءۇندىستان, وزبەكستان, قىرعىزستان, تاجىكستان جانە تۇركىستان وبلىسى كوماندالارى قاتىسىپ جاتىر, دەپ جازادى Egemen.kz.
ءدۇبىرلى دودانىڭ اشىلۋ راسىمىندە وبلىس اكىمىنىڭ ورىنباسارى بەيسەن تاجىباەۆ, «Qazaq kuresi» اسسوتسياتسياسىنىڭ باس ديرەكتورى ەرلان ەستەك, وبلىستىق ءماسليحات توراعاسى نۇرالى ابىشەۆ جارىسقا قاتىسۋشىلاردى قۇتتىقتادى.
«وسى كۇندەرى الەمدەگى 40-تان اسا ەلدە ۇلتتىق كۇرەسىمىزدەن فەدەراتسيالار قۇرىلىپ, جۇمىستار اتقارىپ جاتىر. وزدەرىڭىزگە بەلگىلى, قازاق كۇرەسىنەن الەم, ازيا, افريكا جانە ەۋروپا چەمپيوناتتارى وتكىزىلىپ, دامۋدىڭ جاڭا دەڭگەيىنە كوتەرىلدى. اتالعان ءىس-شارالار بۇقارالىق سپورتتىڭ دامۋىنا وزىندىك زور ۇلەس قوسىپ وتىر. ازيا كۋبوگىنىڭ ۇيىمداستىرۋشىلارى مەن قاتىسۋشىلارىنا جانە تورەشىلەر قۇرامىنا وبلىس حالقىنىڭ اتىنان العىسىمدى بىلدىرەمىن», دەدى بەيسەن تاجىباەۆ.
ءبىرىنشى كۇنى بەس ءتۇرلى سالماقتاردىڭ بەلدەسۋلەرى بولىپ, ەكىنشى كۇنى ءۇش ءتۇرلى سالماقتارمەن قاتار «تۇيە بالۋان» جەڭىمپازى انىقتالادى. جالپى 8 سالماق دارەجەسى بويىنشا بارلىعى 150 بالۋان بوز كىلەم كوركىن قىزدىرادى.
ءبىرىنشى ورىنعا 200 مىڭ, ەكىنشى ورىنعا 100 مىڭ, ءۇشىنشى ورىنعا 50 مىڭ تەڭگە اقشالاي سىياقى بەرىلەدى. ال «تۇيە بالۋانعا» تەمىر تۇلپاردىڭ كىلتى تابىستالادى.