28 قىركۇيەك – مۇحتار اۋەزوۆتىڭ تۋعان كۇنى. اتاۋلى داتا قارساڭىندا مۇحتار اۋەزوۆتىڭ نەمەرەسى, مۇرات مۇحتار ۇلىنىڭ قىزى زيفا-الۋا اۋەزوۆا, لولا ەرنارقىزى اۋەزوۆا, الماتىداعى «اۋەزوۆ ءۇيى» عىلىمي-مادەني ورتالىعىنىڭ ديرەكتورى ديار قوناەۆ, «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد, قانات رازاقوۆ سەمەي قالاسىنا ارنايى كەلدى.
قۇرمەتتى قوناقتاردى بيىل اشىلعانىنا 120 جىل تولاتىن م. اۋەزوۆ اتىنداعى سەمەي پەداگوگيكالىق كوللەدجىنىڭ باسشىسى شاعانگۇل جاناەۆا قارسى الىپ, الاشتىڭ وقۋ ورداسىنىڭ اشىلۋ تاريحى مەن قازىرگى كەزەڭدەگى باعىندىرعان بەلەستەرى, قانداي تاريحي تۇلعالاردىڭ شىڭدالۋ مەكتەبى بولعانىن اڭگىمەلەپ بەردى.
– بۇل – تاۋەلسىز ەلىمىز ءۇشىن ۇلتتىق سانانىڭ قالىپتاسۋىنا ىقپال ەتكەن تۇڭعىش وقۋ ورنى. شاكىرتتەرىمىزگە كۇللى الاش قايراتكەرلەرى, اتاپ ايتقاندا, جۇسىپبەك ايماۋىت ۇلى, قانىش ساتباەۆ, مۇحتار اۋەزوۆ, الكەي مارعۇلان باستاعان ۇلت زيالىلارىنىڭ ءبىتىم-بولمىسى, ۇلت بولاشاعى جولىندا اتقارعان ىستەرى جايىندا كەڭىنەن ناسيحاتتالادى. مۇرات مۇحتار ۇلى وسىدان بەس جىل بۇرىن كەلىپ, كوللەدجىمىزدىڭ تورىندە بولعان. كوللەدجدىڭ تاريحي ماڭىزىن وتە تەرەڭ تۇسىنەدى, – دەيدى م. اۋەزوۆ اتىنداعى سەمەي پەداگوگيكالىق كوللەدجىنىڭ ديرەكتورى ش.الدامجارقىزى.
عاسىردان اسا تاريحى بار وقۋ ورنىنىڭ تاعى ءبىر ەرەكشەلىگى – عيماراتىنىڭ باسپالداقتارى و باستان سالىنعان قالپى, بۇگىنگى كۇنگە دەيىن ب ۇلىنبەي ساقتالىپ كەلەدى. وسى تۇستا تاعى ءبىر ايتا كەتەتىن دەرەك, پەداگوگيكالىق كوللەدج 1967 جىلدان باستاپ, م.اۋەزوۆتىڭ ەسىمىمەن اتالادى. جازۋشى ەسىمىنىڭ بەرىلۋىنە سول كەزدەگى وقۋ ورنىنىڭ باسشىسى اسىلحان بەكباەۆتىڭ سىڭىرگەن ەڭبەگى زور.
تاعىلىمدى كەزدەسۋدە مۇرات مۇحتار ۇلىنىڭ «قازاق رۋحى», اناسى فاتيما عابيتوۆانىڭ «ورتەڭدە ونگەن گۇل» كىتاپتارىنىڭ تۇساۋكەسەرى دە ەرەكشە سالتاناتپەن ءوتىپ, تاماشالاعان جۇرتشىلىقتى ءتانتى ەتتى. سونداي-اق «مۇحتار اۋەزوۆ ءومىرىنىڭ سەمەي كەزەڭى» اتتى تاقىرىپتا كانديداتتىق ديسسەرتاتسيا قورعاعان بەلگىلى عالىم, ۇلاعاتتى ۇستاز راۋشان مۇقاجانوۆا دا زەرتتەۋى تۋرالى ويىمەن ءبولىستى.
– قازاقتىڭ ءبىرتۋار تۇلعاسى م.اۋەزوۆتىڭ ءومىرى مەن شىعارماشىلىق جولى, ىزدەنىستەرى جونىندە كەڭەستىك كەزەڭدە كولەمدى زەرتتەۋلەر جۇرگىزىلگەنىمەن, ونىڭ كەي تۋىندىلارى ساياسي سىنعا توتەپ بەرە الماي, تاسادا قالىپ كەلگەنى شىندىق. بۇگىندە وسى ولقىلىقتىڭ ورنىن تولتىرىپ, كوپشىلىك نازارىنان تىس قالىپ كەلگەن شىعارمالارىن قايتا جاڭعىرتاتىن ۋاقىت جەتتى. سول تۇرعىدا جازۋشىنىڭ ءومىرى مەن شىعارماشىلىعىندا سەمەي جەرىنىڭ ماڭىزى ەرەكشە, – دەيدى فيلولوگيا عىلىمدارىنىڭ كانديداتى, دوتسەنت ر.مۇقاجانوۆا.
م.اۋەزوۆتىڭ تۋعان كۇنى قارساڭىندا ۇلى جازۋشىنىڭ تۋىپ-وسكەن جەرىنە كەلۋدى مۇرات ەتكەن مارتەبەلى قوناقتار بۇدان كەيىن اباي اۋدانىنا ساپارلاپ, جيدەبايداعى اباي, شاكارىم كەسەنەسىنە بارىپ, اقشوقىعا ايالداپ, قۇنانباي وسكەنباي ۇلى مەن اۋەز بابالارىنىڭ رۋحىنا تاعزىم ەتتى. جازۋشىنىڭ كىندىك قانى تامعان جەرى – بورىلىگە كەلىپ, اكەسى ومارحان مەن اناسى نۇرجامالدىڭ كەسەنەسىندە بولىپ, م.اۋەزوۆتىڭ مۋزەي-ءۇيىن دە تاماشالادى.
ەل ىشىندە ەرتەدەن ساناعا سىڭگەن «اباي دەسە, مۇحتار اۋەزوۆ, مۇحاڭ دەسە, اباي ەسكە تۇسەدى», دەگەن ءسوز بار. ال وسىناۋ داتا – اۋەز اۋلەتى ءۇشىن عانا ەمەس, كۇللى سەمەي جۇرتىنىڭ جىلدا اسىعا كۇتەتىن مەزەتى. ونى بىلاي قويعاندا, «ەل اڭگىمەشى, ەل اڭگىمەشى بولعان سوڭ, جەر اڭگىمەشى» دەگەن ۇلى جازۋشىدان قالعان ءسوزدىڭ قۇدىرەتى دە تارتىپ تۇراتىنى شىندىق.