اقىلزات سەيىتجاپار جولسەرىك بولىپ قىزمەت ەتەدى. قاراپايىم جولسەرىكتى «جۇلدىز» ەتكەن - الەۋمەتتىك جەلى. ونىڭ پويىز ىشىندە قۇيقىلجىتا سالعان ءانى ءاپ-ساتتە الەۋمەتتىك جەلىگە تاراپ, تالايعا تاڭداي قاقتىردى. «قانداي كەرەمەت ايتادى ءاندى. مىناۋ جولسەرىك ءانشى قىزدىڭ ورنى ۆاگون ەمەس, ساحنا عوي» دەيدى ءماجىلىس دەپۋتاتى, بەلگىلى اقىن قازىبەك يسا. استانا-شىمكەنت باعىتىندا جولاۋشىلارعا جايلىلىق سىيلاپ قانا قويماي, اسەم انىمنەن دە تەربەتەتىن تالانتتى تەمىرجول قىزمەتكەرىمەن ديدارلاسۋدىڭ ورايى كەلدى.
– ءسىزدى تانىمال ەتكەن الەۋمەتتىك جەلى. انشىلىك ونەردى كاسىبي مەڭگەردىڭىز بە, الدە قاننان دارىعان تالانت پا؟
– جوق, كاسىبي ماماندىعىم تەمىرجول سالاسىمەن بايلانىستى. بالا كەزىمنەن ءان ايتۋعا اۋەستىگىم ارتتى. ويتكەنى اكەم - ءانشى. ءانشى بولعاندا ساحنادا ەمەس, دالا توسىندە ءان ايتقان. جىلقى باقتى. انام اۋىلدىق اكىمدىكتە قىزمەت ىستەدى. قازىر ەكەۋى دە زەينەتكەر. ءوزىمىز ءتورت اعايىندىمىز, ءۇيدىڭ ۇلكەنى اعام, وزىمنەن كەيىنگى باۋىرلارىمنىڭ دا ءبىر قايىرارى بار ونەردەن. بالا كەزىمنەن ۆيتاستىڭ رەپەرتۋارىنداعى اندەردى شىرقايتىنمىن. «ۇيالماعان ءانشى بولادى» دەمەكشى, بار داۋسىممەن ۇيدە ءان ايتام. سوندا كورشىلەر اناما كەلىپ, «راديونىڭ داۋسىن سۇڭقىلداتپاي باسەڭ قويىڭدار» دەپ سەس تە كورسەتەدى ەكەن. ولار مەنىڭ جاندى داۋىستى ءان شىرقاعانىمدى راديونىڭ ءۇنى دەپ ويلاسا كەرەك.
– اكەڭىزدەن دارىعان ونەردىڭ جولىن تاڭداماعانىڭىز قىزىق ەكەن.
– ءانشى اتانعىم كەلدى. بالا كەزىمنەن اكەم ەسىمحانمەن بىرگە ءان ايتىپ, اۋىل اراسىنداعى توي-تومالاقتا, مەكتەپىشىلىك كونكۋرس, بايقاۋلارعا ساحناعا شىعىپ ءجۇردىم. اتام سەيىتجاپار دا دومبىرامەن كۇي شەرتىپ, اۋەلەتىپ ءان سالعاندا زامانداستارى تامسانىپ وتىرۋشى ەدى. بابامىزدان دارىعان ونەردىڭ ىزىنە تۇسكىم-اق كەلگەن, بولمادى. ءبىر كۇنى الماتى قالاسىندا وتەتىن كونكۋرسقا باراتىن بولدىق. مەزەتى تاياعاندا جولىمىزعا قاراجات تابا الماي قىسىلدىق. سول كەزدە قاتتى قىستىعىپ جىلادىم. «مەن بۇگىن قالاداعى كونكۋرسقا قاتىسۋعا قاراجات تاپپاي وتىرمىن, بۇدان كەيىن دە مۇمكىندىك تۋمايدى عوي» دەگەن ۋايىم انشىلىكتى ەمەس, تەمىرجول سالاسىن تاڭداۋىما اسەر ەتتى.
– الەۋمەتتىك جەلىدە تانىمالدىعىڭىز ارتتى, بىرنەشە تەلەباعدارلاماعا قاتىستىڭىز. جولاۋشىلار دا تانىپ, ءان سۇراپ قولقا سالا ما؟
– استانا-شىمكەنت باعىتىندا قىزمەت كورسەتەمىز. جولاۋشىلار تانىپ العان, «وپەرا ءانشىسى» دەپ كوتەرمەلەپ تە جىبەرەدى. ءتىپتى كەيىنگى ساپارىمىزدا ۇلكەن كىسىلەر قاۋمالاپ الىپ, بىرنەشە ءان ايتقىزىپ, تامبۋردا بيلەپ كوڭىلدى كەلدىك.
– تويعا شاقىراتىندار دا بولا ما؟ ەڭبەكاقىڭىزدى تولەيمىز دەپ قىزىقتىراتىندار دا كەزىگە مە؟
– ونداي ماقساتتا تەلەفون شالاتىندار دا جوق ەمەس. بىراق ءان ايتۋ – مەنىڭ ءحوببيىم. ونەردى مەن تابىستىڭ كوزى دەپ مالدانبايمىن. تەك تۋىس-تۋعاننىڭ تويىندا ءان سۇرايدى, تەگىن شىرقاپ, كوپشىلىكتىڭ كوڭىلىن كوتەرەمىن.
– ءسىزدىڭ ساحناڭىز ۆاگوننىڭ ءىشى بولعاندىقتان, جولاۋشىلاردىڭ قولقاسىنا وراي رەپەرۋتارىڭىزدى دا جاڭارتىپ جۇرەسىز بە؟
– نەگىزىنەن جەر ورتاسى جاسىنان اسقان, ەگدە تارتقان كىسىلەر ءان شىرقاساڭ دەپ ء وتىنىش ايتادى. ءشامشى قالداياقوۆتىڭ اندەرىن سۇرايدى, كلاسسيكالىق اۋەندى قالايتىندار وپەرا ورىنداپ بەرسەڭ دەپ قيىلادى. سازگەرلەردەن ارنايى ءان جازدىرتپايمىن, انشىلەردىڭ ورىنداۋىنداعى تۋىندىلاردى شىرقايمىن.
جۋىردا «مانكەنت» شيپاجايىندا ەم الدىم. سول جەردە دە كۇندە كەشكىلىك ۋاقىتتا مەنىڭ «جەكە شىعارماشىلىق كەشىم» ۇيىمداستىرىلىپ, شيپاجايدان كەتكەنشە ەم الۋشىلارعا ءان شىرقاپ بەردىم.
– ءوزىڭىزدىڭ بالالارىڭىز ونەرگە جاقىن با؟
– ۇلىم ونشا قىزىقپايدى, قىزىم ءان شىرقاعاندى قالايدى.