پرەزيدەنتكە «قازپوشتا» اكتسيونەرلىك قوعامىنىڭ بيىلعى 8 ايدا اتقارعان جۇمىستارىنىڭ ناتيجەسى جونىندە باياندالدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
اتاپ ايتقاندا, كومپانيا شىعىنداردى وڭتايلاندىرۋ, ەلەكتروندى كوممەرتسيانى جانە باسقا دا قارجىلىق قىزمەتتەردى دامىتۋ ەسەبىنەن سوڭعى 5 جىلدا العاش رەت شىعىنى از, تابىستى مەكەمەگە اينالىپ وتىر. «قازپوشتانىڭ» 8 ايداعى كىرىسى وتكەن جىلدىڭ وسى كەزەڭىمەن سالىستىرعاندا 44 پايىزعا نەمەسە 16,7 ميلليارد تەڭگەگە ارتتى.
اسەل جاناسوۆانىڭ ايتۋىنشا, ەلىمىزدىڭ شالعاي ەلدى مەكەندەرىندە «قازپوشتانىڭ» بولىمشەلەر جەلىسىن كەڭەيتۋ جوسپارلانىپ وتىر. بۇل پوشتا, قارجى, اگەنتتىك, الەۋمەتتىك جانە مەملەكەتتىك قىزمەتتەردى قامتاماسىز ەتۋگە مۇمكىندىك بەرەدى.
مەملەكەت باسشىسىنا «قازپوشتا» اكتسيونەرلىك قوعامى ەلەكتروندى كوممەرتسيا نارىعىنىڭ سۋبەكتىلەرى ءۇشىن بىرىڭعاي ەكوجۇيە قۇراتىنى جونىندە مالىمەت بەرىلدى. ول ءۇشىن كومپانيا فۋلفيلمەنت ورتالىقتارىن دامىتۋ, وتاندىق جانە شەتەلدىك تانىمال ماركەتپلەيستەر ءۇشىن تاپسىرىستار بەرۋ پۋنكتتەرىن اشۋ, قويمالار مەن پوشتامات جەلىلەرىن كەڭەيتۋ جۇمىستارىن جۇرگىزىپ جاتىر.
سونىمەن قاتار پرەزيدەنتكە اقتوبە قالاسىندا, تۇركىستان جانە الماتى وبلىستارىندا لوگيستيكالىق حاب سالۋ جوسپارى تانىستىرىلدى. مۇنداي لوگيستيكالىق حاب وسى اپتادا استانا قالاسىندا اشىلماق.
كەزدەسۋ سوڭىندا قاسىم-جومارت توقاەۆ كومپانيانىڭ قارجىلىق جاعدايىن جاقسارتۋ جۇمىستارىن جالعاستىرۋدى, اۋىل تۇرعىندارىنا كورسەتىلەتىن الەۋمەتتىك جانە مەملەكەتتىك قىزمەتتەر اياسىن ۇلعايتۋدى تاپسىردى.